Read Ibibio Contemporary Bible 2020 2 Timoti 3 Bible Online

2 Timoti 3 - Ibibio Contemporary Bible 2020 bible

2 Timoti 3

¹Nekke diọọñọ ami ñko: Idiọọk ini ayaadi ke ini utịd eyo.

²Mme awo eyaedoñño mme amaidem, ye mme ama akʌk, enyʌñ enam inua, ebuudo mbuudo, enyʌñ etaña abʌd-abʌd ikọ. Ammọ eyaesuuñọ mme awo, Esọñ iwuod ye mme ete ye mme eka, enana esịd ekọọm ye uteeñe Abasi,

³enana ima uduudawo, inyʌññọ iyem emem ye awo ake adodo, abiad awo anyịn, esua mbon se inam nti ñkpọ,

⁴ammọ eyaetap mme awo enọ mme asua, mme afai, enyʌñ ekop inem ederimbod ekan ima Abasi,

⁵mme awo ami enie ido ukpono Abasi ado ekañ adudu amọ. Kuudian idem mfo ye utọ ibon ami.

⁶Sia ammọ ekama ñkara edʌk ufọk awo; ebiaaña ibaan i-mmiinieeghe nsọọñọnda, idiọọk akara uwem ammọ; enyʌñ ekpeep ammọ nsu-nsu ukpeep ñkpọ, enie nsio-nsio ndiọi udọñ

⁷utọ ibaan ami etak ke ukpeebñkpọ ukeed ini, ado ikanna inie ifiọk akpanikọ.

⁸Ukem-ukem naña Yannes ye Yambresi ekenwana ye Moses, ukem ado ke mme utọ ibon ami enwana ye akpanikọ. Esịd ammọ amaabiaaña; kebaña mbuọdidem, emaesịn ammọ.

⁹Ado ammọ idiikaaha usʌñ aniọñ, kpa nte akemme ibon ado ndisịme ammọ ayaayaara anaa inwañ-inwañ ke iso afịd awo nte ake mbon ado.

¹⁰Ado afo amediọọñọ afịd se ami ñkpeeb, edu uwem mmi, ye uduak mmi, mbuọdidem mmi, anyan ime mmi, ima mmi, ye ñwaidem mmi,

¹¹ndubịnne, ufen, mme ñkpọ se ikitịppe innọ miin ke Antiọk, ye Aikonium, ye Distra, mmaayọ mme ukọbọ. Ado Abọọñ amannyaaña miin asio ke ukeed amọ.

¹²Ke akpanikọ, eyaedutʌkkọ ukeed awo e-yemme edidu eti uwem ke Krais Yisọs.

¹³Ado ndiọi awo ye mme anam abiaaña, eyaekaka iso ediọi ekan, enyʌñ eka iso ebiaaña awo, mme awo enyʌñ ebiaaña ammọ.

¹⁴Amaado afo yiire ke se akekpeeb anyʌñ adiọọñọ ke ado akpanikọ; sia amediọọñọ mbon a-afo akekpeebe ato,

¹⁵afo amediọọñọ tọọñọ ke etək-etək abaña Adisana ikọ Abasi, akemeke adinam afo ado awo aniọñ, anyʌñ anie adinyaaña ato ke mbuọdidem ye Krais Yisọs.

¹⁶Ekewet afịd-afịd ikọ Abasi ke adudu Sịbidịd Abasi, ndin afọn se ekama ekpeep awo ñkpọ, esua enọ awo, enyʌñ etemme awo usʌñ a-anenne ye ukpeep ñkpọ ke edinem ido,

¹⁷nọ atodo awo Abasi akeme edinie ayọhọ ifiọk, anyʌñ atʌm abeeñe idem ke ukeed-u-ukeed usʌñ, adinam afịd nti utom.