Read Ibibio Contemporary Bible 2020 Taitọs 1 Bible Online

Taitọs 1 - Ibibio Contemporary Bible 2020 bible

Taitọs 1

¹Bọọd, ayịnufọk Abasi mme abọsịd Yisọs Krais ke mbuọdidem mbon a-Abasi amekke ye ifiọk akpanikọ a-adatta aka ke ido Abasi,

²mbuọdidem mme ifiọk a-akọñọke ke idodanyen nsi-nsi uwem, ake Abasi, anye a-mmiisʌhọke nsu, a-akeñwọñọke mbemiso aditọọñọ ini,

³ndin ke adikem ini amọ e-ekenịmme anye adat ikọ amọ adiwọt unwana ato ke adikwọrọ ikọ e-ekeyakka ennọ ke ewʌhọ Abasi Andinyaaña ñnyịn.

⁴Awet anọ Taitọs, ata ayịn mmi ke ukem-ukem mbuọdidem a-ñnyịn iwuanake: Mfọn ye emem a-atooho Abasi Ete ye Krais Yisọs Andinyaaña ñnyịn.

⁵Ntak ami ñkukpọññọ fiin ke Kret akedo nọ afo aneeñe mme ñkpọ se awo miikikweñeke anịm anyʌñ amek mme adaidaha ke afịd abio, naña ami ñkuwọt fiin usʌñ.

⁶Adaidaha ufọkabasi ana anana ndo, ado ebe anwaan keed, awodeen a-nditọ amọ enịmme Abasi ke akpanikọ ndin idoññoke se esịn ke ibad atu mbon e-efaiyake afai enyʌñ etịtutọñ.

⁷Sia emaeyak utom Abasi esịn ke ubọk adaidaha, inaaha anye anie ndo ndomokeed, inieeghe nsọñido, isọppọ iyadesịd, inaaha akpa mmịn, inaaha anye aba afai-afai, idooho awo a-ayemme udodo ke usʌñ ñwo.

⁸Utu ke ado anye ana atat ubọk, awo a-amaaha se ifọn, a-anieeghe mfadidem, adinen awo, adisana mme atʌnọ-idem awo.

⁹Anye ana amʌm akama ke akpọsọñ ubọk eti etob naña ekekpeep, nọ ato do anye akan asọọñọ mbon ñko ukod ke ata eti ukpeeb anyʌñ asịn mbon e-ebiọọñọke ikọ Abasi.

¹⁰Sia ebañña mme uwak eniin-eniin, mme ñkaña mbon utaañ ikọ ye mme abiaaña-abiaaña, akpan-akpan mbon ñka e-enịmme mboppo.

¹¹Ana etre ammọ, sia ammọ ebiad afịd ufọk mme awo ato ke ammọ adikpeep se mmiikpinaaha ammọ ekpeeb, ndin ami ato ke ntak abiaaña udod.

¹²Kpa keed ke atu mme brọfed ammọ abo ate, “Mme mbon Kret afịd ini edoñño mme asu nsu, mme ndiọi unam afai-afai, mme mbon ifu, ediọi itọñ.”

¹³Ikọ ntiense ami ado akpanikọ. Ke ntak ado, sua nọ ammọ akpọsọñ, nọ atoodo ammọ ekpenie nsọñidem ke mbuọdidem

¹⁴ndin idiikpaaña utọñ inọ mme ñke Yuu mme ewʌhọ mbon e-esịnne akpanikọ.

¹⁵Ke mbon se isana, afịd ñkpọ ado adisana, ado mbon edoññoke abʌd-abʌd ibon, inyʌññọ inịm ikọ Abasi ke akpanikọ, ñkpọ ndomokeed isanake. Ke akpanikọ afịd esịd ammọ mme akikere ado abʌd-abʌd.

¹⁶Ammọ edat ke mmimmọ imidiọọñọ Abasi, ado ato ke edu uwem ammọ, ammọ ekañ anye. Ammọ edoñño mme mbon ndubiam, etre utọñ ndin idotto edidat nnam ñkpọ se ifọn.