Read Ibibio Contemporary Bible 2020 Taitọs 2 Bible Online

Taitọs 2 - Ibibio Contemporary Bible 2020 bible

Taitọs 2

¹Afo anie adikpeeb se isaña ikikem ye nti ukpeebñkpọ.

²Kpeeb mme ñkaan ideen enie mfuud-mfuud ido a-adoddo mme ukpono, mfadidem, ye nsọñidem ke mbuọdidem, ke ima ye ke adiyọ ukuud.

³Ntodo ñko, kpeeb mme ñkaan ibaan adinie ukpono ke usʌñ naña ammọ edu uwem, ekuudoñño mme abiad awo anyịn mme mbon ukpa mmịn amegheke, ado ekpeeb se ifọn.

⁴Ndin ammọ ekeme adikpeeb mme ñka ntək ibaan adima mme ebe ammọ ye mme nditọ,

⁵adinie mfadidem ñnyʌñ ndoñño ndisana, adima inam ñkpọ ke ufọk, adinie ido se ifọn adinyʌñ nsuukiwuod nnọ mme ebe ammọ mbaak ato do awo ba keed adibiad ikọ Abasi.

⁶Ntoro ñko, sọọñọ mme ñkparawa ikpad ate ammọ enie mfadidem.

⁷Ke afịd ñkpọ wọt ammọ nda usʌñ ke adinam se ifọn, ke ukpeebñkpọ ndufo iwọt etiido, akpan ekikere, ye

⁸nnen-nnen usʌñ utañ ikọ a-awo mmiikemeke ikịt ndudue nọ ato do mbon i-ibiọọñọke ndufo ekop abuud ke ntak adooho ammọ inieeghe idiọọkñkpọ ndomokeed aditañ idian ñnyịn.

⁹Kpeeb mme ifʌn adisuuk iwuod nnọ mme eteufọk ammọ, ke afịd ñkpọ, enwana adinam se inem eteufọk ammọ esịd, ekuubọọrọ ammọ ikọ,

¹⁰ndin ekuunyʌñ uyịp ñkpọ ammọ, ado awọd nte ke amekeme inịm ammọ ke akpanikọ, nọ ato do ammọ ekpenam ukpeebñkpọ a-abañake Abasi Andinyaaña ñnyịn ado uyai-uyai.

¹¹Sia mfọn Abasi a-adatta adinyaaña adi awuọ awọd idem anọ afịd awo.

¹²Anye ikpeeb ñnyịn adibo “iyo-o” ke unana adisana ido Abasi ye akwa idiọọk udọñ ñkpọ ederimbod, ye edidʌñ ke mfadidem, uwem a-adooho nnen-nnen ye mme nti uwem ido Abasi eyo mfịn ami,

¹³adaña ini ñnyịn ibette idodanyen adidiọñ uyai adiwuọ ñwọd idem, akwa Abasi ye Andinyaaña, Yisọs Krais,

¹⁴a-akeyakka idem amọ anọ ke ntak ñnyịn nọ ifak ñnyịn asio ke afịd idiọọkñkpọ adinam asana anọ idem amọ mme awo e-edoññoke ata ake amọ, e-enieeghe udọñ adinam se ifọn.

¹⁵Ami ndin ado mme ñkpọ se ekpekpeeb. Nọ nsọọñọ ñkpad nyʌñ isua nọ ke afịd adudu. Kuuyak awo ba keed use fiin ke ndek.