Read Ibibio Contemporary Bible 2020 Ibru 12 Bible Online

Ibru 12 - Ibibio Contemporary Bible 2020 bible

Ibru 12

¹Ndin sia utọ akwa udịm mme ntiense ami ikannake ñnyịn akʌk, yak ñnyịn itoomo afịd mme ñkpọ e-esibiọñọke ñnyịn iduọọñọ, nduọhọ a-asiñyʌññọ imʌm ñnyịn ukad iduọọñọ, ñko yak ñnyịn isịn ifịk ifeghe itọk mbuba e-ekemekke inọ ñnyịn.

²Yak ñnyịn iwuuk anyen ñnyịn ke Yisọs, andido ntọọñọ ye andinam mbuọdidem ñnyịn afọn ama, a-akedooho ke ntak inemesịd e-ekenịmme ke iso amọ, anye akeyọ krọs, amiim ndọk amọ, anyʌñ asuuk atie ke ubọk udom ke ebekpo Abasi.

³Kere baña anye a-akeyọọhọ utọ mfiomo ado ke ubọk mme ndiọi awo, mbaak afo udukop mmemidem unyʌñ uduọ esịd.

⁴Ke ndutʌkkọ mfo adibọkkọ idiọọkñkpọ, unwanake dion ukuwuọ itie adiduọk iyiib mfo.

⁵Ñko, nte ndufo emefre ikọ nsọọñọukod i-ikotto ndufo nte nditọ? “Ayịn mmi, kuudat ntʌnọ Abasi nte ado mfefeere ñkpọ, ñko kuunyʌñ uyak esịd uduọ ke ini anye asuaaha unọ,

⁶sia Abọọñ asitʌnọ mbon a-anye amaaha, anyʌñ anọ mbon a-anye akoodo adat ufen.”

⁷Iyọ nsọñọñkpọ nte ntʌnọ Abasi asʌkkọ ikama ndufo nte nditọ, sia anie ayịn ke ete mmiitʌnọke?

⁸Adieke ndufo miibọọhọ ntʌnọ (ndin afịd awo e-ebọ ntʌnọ) awuọ ndufo idooho ata nditọ.

⁹Ñko, afịd ñnyịn imainie mme ete abʌkidem e-eketʌnọke ñnyịn, ñnyịn ñko imaikpono ammọ ke ntak ado. Ke die ndin ke ñnyịn idiitre adisuuk idem nnọ Ete mme Sịbidịd ñnyʌñ ndu uwem!

¹⁰Mme ete ñnyịn emaitʌnọ ñnyịn ke etək-etək ini ke usʌñ ake ammọ ekekịtte ebo ke afọn; ado Abasi itʌnọ ñnyịn ke ufọn ñnyịn, nọ ñnyịn ikeene iwuana ke nsana mma amọ.

¹¹Ntʌnọ ndomokeed inieeghe inem ke ini afo abọọhọ anye, ado akama ubiak. Ado akem ko-o, anye adat idọk eti uwem ye emem asọk mbon e-emaekebọ ukpeeb ke anye.

¹²Ke ntodo, inam mme ubọk ndufo e-emaekemeem ye mme edọñ ndufo emaana esọọñ!

¹³“Inam afañ usʌñ ndufo ada ukem-ukem inọ ndufo,” mbaak afekke ukod adikappa mbʌñọ, ado abọ nsọñidem.

¹⁴Inwana ke afịd usʌñ adiba ke emem ye afịd awo ye adinie adisana uwem; adisana uwem mmiibaaha, awo ndomokeed idiikịtte Abọọñ.

¹⁵Ikịt ibo ke awo ndomokeed itịppe mfọn Abasi, ñko ke idod-idod adʌñ ikọttọ idinam mfịna inyʌñ ibiad umiañ.

¹⁶Ikịt ibo ke ndufo ndomokeed idooho asịn efịbe me anana Abasi, inyʌññọ iba nte Isọ, a-akedooho ke ntak usan ndidia keed anye akenyam unen udeme amọ nte andikpon ñkan nte akpa ayịn.

¹⁷Nte ndufo ediọọñọke, akema, ke ini anye akediyemme unen mfọn ado, emaesịn anye. Anye ikikanna inam nọ ekpəhọ esịd, akpesʌk ado anye aketuaaha mmọọñayịd ayem adidiọñ ado.

¹⁸Ndufo idieghe ibịne abod e-ekemeke adituuk, a-anyʌññọ asak ikañ; ke akịm, ukuud ye ayobio;

¹⁹me uyom adukpəñ me utọ uyo a-atañña mme ikọ a-mme andikop ekpeiyeke-kpeiye ebo ke mmimọ iyemme adikop utọ ikọ ado aba,

²⁰sia ammọ ikikanna iyọ aba se ekenọ ewʌhọ ebaña: “Akpedodo unam atuuk abod ado, ana etọ ke itiad.”

²¹Ndise amaanie ndịk tutu Moses amaabo, “Idem adiinyeenyek ye ndịk.”

²²Ado ndufo emedi Abod Sayọn, Yerusedem ake abio ubọọñ, idʌñ aduuwem Abasi. Ndufo edi adikịt tọsịn mme tọsịn mme enyere ke mboho idaara,

²³ke ufọkabasi mme andikito mmana, e-emaekewet anyịñ ammọ ke abio ubọọñ Abasi. Ndufo emedi ebịne Abasi, akpe ikpe afịd awo, edi ebịne mme Sịbidịd mme nti awo e-emaekenam efọọn ema,

²⁴edi ebịne Yisọs andida ubiọñ ke ufa edioomo, ye ke adisiime iyiib a-atañña ikọ a-afọnnọ akan iyiib ake Ebeed.

²⁵Ikịt ibo ke ndufo isịnne anditañ ikọ ami. Adieke ammọ mmiikibọkkọke ke ini ekesịnne adikop uyo anye a-aketañña ikọ anọ ammọ mi ke isọñ, die ndin ke ñnyịn idiibọkkọ, adieke ñnyịn ikannake iso ikpọñ anye a-atieeghe ke abio ubọọñ Abasi atañ ikọ inọ ñnyịn?

²⁶Ke idahado uyo amọ amaanyek isọñ, ado idahami anye a-añwọñọ abo, “Ini keed mfen, ami ñyaanyeeñe, idooho ederimbod ikpọọñ ado mme ikpaanyọñ ñko.”

²⁷Mme ikọ ami, “ini keed mfen” ewọt adibenne mfep afịd ñkpọ se ekeme inyeeñe a-adooho mme ñkpọ se ekebobot nọ ato do afịd se awo mmiikanna inyeeñe esʌhọ.

²⁸Ke ntodo, sia ñnyịn ibọọhọ abio ubọọñ a-ñkpọ miikanna inyeeñe, yak ñnyịn inọ ekọọm inyʌñ ikpono Abasi ke eti usʌñ ke uteñe ye ata ndịk,

²⁹sia “Abasi ñnyịn ado ikañ a-ataahata.”