Read Ibibio Contemporary Bible 2020 Ibru 13 Bible Online

Ibru 13 - Ibibio Contemporary Bible 2020 bible

Ibru 13

¹Ikaa iso edumakka keed aken nte nditọete.

²Ikiitre adikama mme isenawo, sia ke adinam ntodo mme awo emaekama mme enyere isen ke una adidiọọñọ.

³Itoiyo mbon e-ebaaha ke ufọk ñkpakọb nte akpedo ndufo ekeene ammọ edo mbon ñkpakọb, ye mbon e-ebọọhọ ndutʌkkọ nte a-ndufo ke idem ndufo ekpebaaha ke ukuud.

⁴Akpena afịd awo ekpookpono ndọ, akpena enyʌñ enịm ñkpana ndọ asana, sia Abasi ayaakpe ikpe ye mme asịn efịbe ye mme asaña use.

⁵Inịm uwem ndufo ikpọñ uma akʌk inyʌñ iyʌkkọ ke se ndufo enie sia Abasi amaabo, “Ami ndiikpọññọ ndufo; ndiiyʌññọ ifre ndufo ke nsi-nsi.”

⁶Ke ntodo ñnyịn isọọñọ ida ibo: “Abọọñ ado andiñnwam miin; ndịk idiinamma miin. Nso-o ke awo akeme adinnam miin?”

⁷Itoiyo mme adaiwuod ndufo, e-eketañña ikọ Abasi inọ ndufo. Ikere ibaña naña uwem ammọ aba inyʌñ idubọiyọ mbuọdidem ammọ.

⁸Yisọs Krais ado ukem-ukem ñkpọñ, mfịn ye ke nsi-nsi.

⁹Ikiiyak mme nsio-nsio isen ukpeebñkpọ enam ndufo edutịn usʌñ. Ado etiñkpọ esịd ñnyịn adisọọñọ nda ke mfọn, idooho ke mme ndidia usọrọ, e-mmiinieeghe udod inọ mbon e-ediaaha ammọ.

¹⁰Ñnyịn inie itie uwa amme andinam utom ke tabanakịd idiinieeghe unen adidia ñkpọ ke esịd.

¹¹Akwa aku asiben iyiib mme unam adʌk ke esịd Nsana Mma Ata Adisana Itie nte uwa idiọọkñkpọ, ado efọọmọ mme idem ammọ ke esiin.

¹²Ndin ke ukem usʌñ ado Yisọs akenyʌñ abọ ndutʌkkọ ke esiin inuaatob abio adinam mme awo esaana ato ke iyiib amọ.

¹³Yak ñnyịn, ndin, ika ibịne anye ke esiin inuaatob abio; ibọ esuenne a-anye akebọọhọ.

¹⁴Sia ke mmi ñnyịn inieeghe abio a-abaaha ke nsi-nsi, ado ñnyịn isʌk iyem abio a-adiidi.

¹⁵Ato ke Yisọs, ndin, yak ñnyịn afịd ini inọ Abasi uwa itooro, mfịd ñkpọkinua e-ekoodo anyịñ amọ.

¹⁶Ndin ikiifre adinam nti ñkpọ ñnyʌñ ñwuana se enie ye mbon mfen, sia utọ uwa ntodo asinem Abasi esịd.

¹⁷Ikop item inọ mme adaiso ndufo inyʌñ isuuk iwuod inọ ukara ammọ. Ammọ ese ñkpọ ibaña ndufo nte mbon e-ediibọọrọ mbịme iwuod ndufo, ikop item inọ ammọ ma utom ammọ ado ñkpọ inemesịd, idooho mbiomo, sia ñkpọ ntodo idiibaaha ufọn inọ ndufo.

¹⁸Ibọñ akam inọ ñnyịn. Ñnyịn imitʌm idiọọñọ ibo ke esịd ñnyịn anwaña, ñko iminie udọñ adidu uwem ukpono ke afịd usʌñ.

¹⁹Ami mmikpeiye ndufo akpan-akpan mbo ebọñ akam nọ ekan emaana ensaana miin eyaak inọ ndufo usọp-usọp.

²⁰Yak Abasi emem, a-aketooho ke ntak iyiib nsi-nsi edioomo akemaana aben Yisọs Krais a-amaakekpa adi, akwa Andikpeme mme edọñ ado,

²¹ibana ndufo idem ye afịd nti ñkpọ nọ ndufo enam uduak amọ, ñko yak anye anam ke idem ñnyịn ñkpọ a-anemme anye esịd, ato ke Yisọs Krais, a-anieeghe ubọọñ ke nsi-nsi, nsi-nsi. Amen.

²²Nditọete, mmikpeiye ndufo nte yak ekpañ utọñ ke mme ikọitem mmi, sia iwet ndufo ibio-ibio ñwed kpọd.

²³Ñyem ndufo ediọọñọ ke esio ayịnete ñnyịn Timoti ke ufọk ñkpakọb. Adieke anye asọppọ adisịm, ndiisaña ye anye ndikịt ndufo.

²⁴Kọọm afịd mme etubom ndufo ye mme afịd ikọd Abasi. Mbon e-etooho Itadi enọ ekọm isọk ndufo.

²⁵Mfọn Abasi aba ye afịd ndufo.