Read Ibibio Contemporary Bible 2020 Yemsi 1 Bible Online

Yemsi 1 - Ibibio Contemporary Bible 2020 bible

Yemsi 1

¹Yemsi ayịnufọk ake Abasi mme ake Abọọñ Yisọs Krais, Anọ esion duop mme iba e-esuanake ke atu mme idịd: Ekọọm.

²Dat ami ke ata idaara, mme nditọete mmi, ini ake ndufo ekịtte ndutʌkkọ ke nsio-nsio usʌñ,

³sia ndufo emediọọñọ ke adidomo mbuọdidem ndufo anam ndufo e-enie ata ime.

⁴Ime ana akweeñe utom amọ nọ atoodo ndufo ediọọñọ idem ayọhọ-ayọhọ, inanake ñkpọ ndomokeed.

⁵Adieke awo ke atu ndufo ndomokeed ananake ifiọk akpena anye abịp Abasi, a-anọọhọ afịd awo ke ntadubọk, ikịtte ndudue ndomokeed, ndin ayaanọ enye.

⁶Ado anye amaabịp, anye ana anịm ke akpanikọ ndin inieeghe eyịghe, sia awo a-anieeghe eyịghe aba nte mbufuud mmọọñ, a-afịm afịtte anyʌñ atop.

⁷Utọ awo ado akekere ke imọ iyaabọ ñkpọ ndomokeed ito Abọọñ;

⁸anye ado awo esịd iba, inieeghe iwuuk ke afịd se anye anam.

⁹Mme andinịm Abasi ke akpanikọ ke usuuk itie akpena enie uko sia ammọ ekpon ke iso Abọọñ.

¹⁰Ado anye a-amọiyọke imọ akpena anem esịd ke ini Abasi asuuhọ anye itie, sia anye ayaaboiyo afep nte frawa ke ikọd.

¹¹Sia utịn asakka mme akpọsọñ ufiop anyʌñ ayeeme se etọ; mme nseghe amọ eduọññọ ndin ebiad uyai amọ. Ke ukem usʌñ ado, awo imọ ñko ayaayeeme ke ini anye asʌkkọ akaiso ke mbubeghe amọ.

¹²Afọfọn anọ awo a-anieeghe ime ke ini anye akịtte idomo sia anye amaakan idomo anye ayaabọ anyanya uwem ake Abasi amaakeñwọñọ anọ mbon e-emaaha anye.

¹³Ke ini idomo, awo ndomokeed akuubo, “Abasi andomo miin.” Sia idiọọkñkpọ ikemekke adidomo Abasi, anye ñko inyʌññọ idomo awo ndomokeed;

¹⁴ado edomo awo keed-e-keed ato ke idiọọk udọñ amọ, edʌt anye esio ndin etap anye.

¹⁵Ndin, ke idiọọk udọñ amaayommo udọñ ami, anye aman idiọọkñkpọ, ndin idiọọkñkpọ amaakpon ama, aman ñkpa.

¹⁶Kuuyak ubiaña fiin, mme ndima nditọete mmi.

¹⁷Afịd ntiñkpọ ye afịd mfọnmma enọ ato anyọñ, asọiyọ ato Ete unwana anyọñ, a-mmiikpəhọke nte mme ndukpọñ ekpuuñọke.

¹⁸Anye amaamek adibon ñnyịn ito ke ikọ akpanikọ, nọ ato do ñnyịn ido nte akpa mfịd, ke atu afịd se anye abot.

¹⁹Mme ndima nditọete, idat ukpeebñkpọ ke ami: Afịd awo esọp adikop, ekuusọp aditañ, ekuusọp ñko ediyaad esịd.

²⁰Sia iyadesịd awo idatta adinen uwem a-Abasi ayemme idi.

²¹Ke ntodo, isịññe mme afịd mbubiam edu uwem ye mme idiọọkñkpọ e-ebañake ewak ini ami, ndin ke nsuukidem inyịmme ikọ e-etọọhọ ke esịd ndufo a-akemeke adinyaaña ndufo.

²²Ikiikpañ utọñ ikop ikọ kpọd, ndin ndufo ebiaaña idem ndufo. Enam se ikọ atañ.

²³Awo ake adodo akeakoppo ikọ ami ado inamma se anye atañ aba nte awo a-aseeghe iso amọ ke ukịdiso,

²⁴ndin, amaase idem amọ ima inyʌñ idakka, ke ndo-ndo ado anye afre naña anye aba.

²⁵Ado awo a-asọññọ anyen ase mfọnmma ibed a-asiooho awo ke ufịn anyʌñ akaiso adinam ami, ifreke se anye akekop, ado akaiso anam anye eyaediọñ anye ke se anye anam.

²⁶Adieke mme awo edatta idem ammọ nte mme anam ikọ Abasi ado ammọ imʌmmọ edeme ammọ ke akpọsọñ ubọk, ammọ ebiaaña idem ammọ ndin ikọ Abasi ammọ ado ikpu-ikpu.

²⁷Ikọ Abasi Ete ñnyịn adatta nte nsasana ndin inieeghe ndo ado ami; adise ñkpọ mbaña mme nditọ anana ete mme eka ye mme ebeakpa ke ini nnan anyen ammọ ye adinyʌñ nnịm idem amọ asana mbaak ederimbod adibiad anye.