Read Ibibio Contemporary Bible 2020 1 Bita 3 Bible Online

1 Bita 3 - Ibibio Contemporary Bible 2020 bible

1 Bita 3

¹Ibaan ndọ, ke ukem usʌñ ado isuuk iwuod enọ mme ebe ndufo nọ ato do awo keed ake adodo ke atu ammọ ake mmiinịmme ikọ Abasi ke akpanikọ, akappa esịd, itooho ke ukwọrọ ikọ, ado ato ke edu uwem ibaan ammọ;

²ke idaha a-ammọ ideen ekịtte naña ndufo ibaan enie adisana ido ye ukpono ke uwem ndufo.

³Uyai ndufo ikpinaaha ato mbana idem enyọñ-enyọñ, nte ke udọk ided ye edikọñọ ñkpọ mbana kood, ye adisịne uyaiya afọñidem.

⁴Ado uyai ndufo akpena ato esịd idem awuọ adi, nsi-nsi uyai dooho sʌñ-sʌñ ye ifuure sịbidịd a-adooho akpan ñkpọ ke iso Abasi.

⁵Sia ntom ke nti ibaan eyo esed e-ekedotto anyen ke Abasi ekesinam idem ammọ ayaiya. Ammọ emaesuuk idem enọ mme ebe ammọ,

⁶kpa naña Sera akesuuk idem anọ Ebraham, anyʌñ akood anye, “Abọọñ mmi.” Ndufo edoñño nditọ amọ ibaan, adieke ndufo enamma se ifọn, mmiinyʌññọ iyak ñkpọ ba keed anam ndufo edịkke.

⁷Mme ebe, kpasʌk ntodo, edu uwem ye ibaan ndufo nte mme enie-iwuod awo; enọ ibaan ukpono nte mbon ememme ekan ndufo, sia ammọ enyʌññọ ekeene ndufo ewana ke mfọn uwem, mbaak ñkpọ ndomokeed adibiọññọ akam ndufo.

⁸Ke akpatre, afịd ndufo inie esịd keed inọ keed aken; enie mbọm, ema nte nditọete, etua awo mbọm, enyʌñ esuuk idem ndufo.

⁹Ekiidat idiọọk isio usieene idiọọk; ekiinyʌñ isueñ awo ke ini esuueeñe ndufo; ado ikap ediọọñ ammọ sia ekikood ndufo ebo adinam ami nọ ndufo edat adidiọñ enie.

¹⁰Sia, awo a-adiima uwem, a-adiinyʌñ iyem edikịt nti usen ana anye amʌm edeme amọ asio ke idiọọk, anyʌñ akpeme ñkpọkinua amọ mbaak abiaaña ikọ.

¹¹Ana amọ ewọññọ ekpọñ idiọọk enyʌñ enam eti; Ana anye ayem emem, anyʌñ abịne anye,

¹²Sia anyen Abọọñ asʌk ase nnen-nnen awo, utọñ amọ anyʌñ akop akam ammọ; ado Abọọñ inenne iso ye mme anam idiọọk.

¹³Ndin, anie abiinam ndufo ibak adieke ndufo enieeghe udọñ unam etiido?

¹⁴Ado, adieke ndufo ekịtte ndutʌkkọ ñko ke ntak unenido, asʌk afọfọn inọ ndufo. Ikiifeghe ñkpọ se ammọ efeghe; ekiinyʌñ ikop ndịk.

¹⁵Ado ke esịd ndufo enịm Krais nte Abọọñ. Ebeeñe idem afịd ini edibọọrọ afịd awo i-ibịppe ndufo ebaña ntak idodanyen ndufo enieeghe. Ado ebọọrọ ke sʌñ-sʌñ ido mme ke ido nsuukidem ye ukpono,

¹⁶enie esịd atʌmmọ asana, nọ ato do mbon e-etañña ndiọi ikọ ebaña nti uwem ndufo ke Krais etịmme ebọ abuud ebaña ikọ ammọ idotto ndufo.

¹⁷Afọn, adieke adooho uduak Abasi, adibọ ufen ke adinam etiñkpọ ñkan ke adinam se idiọọk.

¹⁸Sia Krais ñko amaakpa ke ntak mme ndiọiñkpọ ini keed, awo a-anenne ke iwuod mbon mmiinenne, nọ anye idat ndufo asọk Abasi. Ekewot anye ke abʌkidem, ado enam anye adu uwem ke Sịbidịd,

¹⁹ato ke Sịbidịd anye amaakaa akekwọrọ ikọ anọ mme sịbidịd ke itie ñkpakọb

²⁰e-eketreke utọñ ke eyo ako, ke ini Abasi akebette ke ime ke eyo Nua tutu asịm ini ekebọppọ ubom. Ke ubom ami, ibatibat awo, itiaita kpọd, ke ekenyaaña ke mmọọñ,

²¹mmọọñ ami ada anọ uduọkmmọọñ e-edatta enyaaña ndufo idahami, ado ado uduọkmmọọñ a-mmiidooho uyed mbad ikpọkidem mfep, ado e-edatta enwọñọ adinie etiesịd ke iso Abasi. Anyaaña ndufo ato ke adised Yisọs Krais,

²²a-akenyọññọ abio ubọọñ Abasi atie ke ubọk udom Abasi, ye mme enyere, mme ukara ye mme adudu esuuk iwuod enọ anye.