Read Ibibio Contemporary Bible 2020 2 Bita 2 Bible Online

2 Bita 2 - Ibibio Contemporary Bible 2020 bible

2 Bita 2

¹Ado mme brọfed abiaaña emaebiọññọ ke ufọọd mme awo kpa naña mme andikpeeb abiaaña ediinyʌñ iba ke ufọọd ndufo. Ammọ eyaedat ndịbe-ndịbe nsosobo asen ukpeebñkpọ edi kpa ye adikañ andikọñ ñkan Abọọñ a-akedeppe ammọ, ndin edat nsobo usọp-usọp esọk idem ammọ.

²Uwak awo eyaenyʌñ ekeene usʌñ abʌkidem ammọ, ndin ato ammọ, mme awo eyaetañ idiọọk ikọ edian usʌñ akpanikọ.

³Ke idiọọk itọñ ammọ mme andikpeeb abiaaña ami eyaenam udod eto mbʌk a-ammọ enamma ke idem ammọ. Tọọñọ ke esed ubiom ikpe ammọ itreke edibịne mbon ami, nsobo ammọ inyʌññọ iyeed idap.

⁴Sia adieke Abasi miikiyakka mme enyere e-ekedueehe ebọkkọ, ado atop ammọ aduọk ke itie ufen, anyʌñ asịn ammọ ke ñkịm-ñkịm ukpe, ate enịm ammọ do tutu ubiire ikpe;

⁵adieke anye miikinyʌñọ iyak akaan ederimbod ebọkkọ, ado adat mmọọñ ukwọ asobo mbon unana Abasi, ado akpeme Nua, akwọrọ adinenido ye awo itiaba mfen;

⁶adieke anye akefọppọ mme abio Sọdọm ye Komora ekappa ntọñ, adat ammọ anam uwọdñkpọ anọ mbon em-miikponoke abasi;

⁷ñko, adieke anye akenyañake Dọd, nnen-nnen awo, akefʌhọke abaña nseseppe ido mbon mmiinịmme ibed

⁸(sia naña nnen-nnen awo ado akedʌñ ke atu ammọ, se anye akekịt anyʌñ akop akenam etiesịd amọ akịd mfịna ke usen ke usen ye atịme-atịme adinam ammọ),

⁹akpedo ntodo, Abọọñ adiọọñọ naña adinyaaña mbon e-ekponoke anye, asio ammọ ke idomo, ado anịm mme idiọọk awo ke itie ufen tutu asịm usen ikpe;

¹⁰akpan-akpan mbon e-esañake ke ndek-ndek idiọọk itọñ abʌkidem edu uwem enyʌñ emiom mme adaukara. Ammọ edoñño mbon usanya ye mbon nsọñ-iwuod, ndịk inama ammọ edisueeñ mbon ekamake itie ubọọñ;

¹¹ado mme enyere akpesʌk ado e-ekoppo idem enyʌñ enie udịd ekan ammọ, itañña ikọ se ibiad utọ ibon ado ke iso Abọọñ.

¹²Ado mbon ami etañ nseseppe ikọ ebaña se adodo a-ammiinwañake ammọ. Ammọ eba nte unam afai ammiinieeghe iwuod, mbon emanake ke uduod unam ma emʌm ammọ ewot; ndin nte unam ikọd ammọ eyaetak.

¹³Ediikpe ammọ utịp idiọọk akeene idiọọk se ammọ enam. Se ammọ edad ke ado udia uwem ado ammọ adinam abʌd-abʌd uwem ata uweemeayo. Ammọ edoñño ñkpọ abuud ye esuenne, ke ini adooho ammọ esʌk ekop inem adinam abʌd-abʌd uwem ado esʌk ediwuana ubọk ndidia ye ndufo.

¹⁴Anyen ammọ ayọhọ ye efịbe, ammọ inyʌññọ itre adinam idiọọk; ammọ etap mbon e-enanake iwuuk; mbon idiọọk itọñ, ammọ edoñño nditọ isuuñọ!

¹⁵Ammọ ekpọñ nnen-nnen usʌñ eduyo ebịne afañ Badam ayịn Beo, a-akemaaha utịb ukwañ ido:

¹⁶Ado dọñki amaasua idiọọk ido amọ anọ anye, unam ammiinieeghe usem, amaatañ ikọ ke uyo awo, anam idat brọfed ado atre.

¹⁷Mbon ami edoñño idịm am-mmisakkake mmọọñ ye ntəkube a-ayobio abenne afịme aboiyo; e-enịm ata abubịd akịm enọ ammọ.

¹⁸Sia ammọ etañ ikpuikpu ikọ ñkpoon inua enyʌñ edat adukpo ido esañake idiọọk itọñ abʌkidem, etap mbon esʌkkọ ebọkkọ mbon edʌññọ ke ndudue.

¹⁹Ammọ enwọñọ adinọ ammọ uwọọrọufʌn, ke ini adooho ammọ ke idem ammọ edoñño ifʌn abʌd-abʌd ido ammọ, sia awo adʌk afʌn anọ ñkpọ se ikara anye.

²⁰Sia adieke ammọ emaekesaña ke ifiọk Abọọñ ye Andinyaaña ñnyịn Yisọs Krais e-emaana ekewañ idem ke se isappa awo, enyʌñ eyak ñkpọ ado akan ammọ ubọk, utịd ammọ akappa adiọọk akan akpa.

²¹Akpaakefọn ammọ adikpitre adikidiọọñọ usʌñ adinenido akan adidiọọñọ mmaa, ndin ewọññọ ekpọñ adisana ewʌhọ e-ekenọọhọ ammọ.

²²Ke abaña ammọ mme ñke ami ado akpanikọ: “Ewa atịmme akedia se akekọk,” ñko, “Edi e-eyette idem amaana aka akewere ke mbad.”