Read Ibibio Contemporary Bible 2020 2 Bita 3 Bible Online

2 Bita 3 - Ibibio Contemporary Bible 2020 bible

2 Bita 3

¹Mme ndima ufan, ami ado ayọhọ deta iba a-nnọọhọ esọk ndufo. Ñwed naña iba editoiyo adinam ndufo enie eti akikere.

²Ñyem ndufo etoiyo mme ikọ mme ndisana brọfed eketaña ke anyan ini a-akeboiyeke ye ewʌhọ Abọọñ ye Andinyaaña ñnyịn akinọọhọ ato mme abọsịd ndufo.

³Ke kpa ifed; ana ediọọñọ ebo ke mme akpatre usen, mme anọọ awo ñyọọ eyaedi, enọọ ñyọọ enyʌñ ekeene mme ndiọi udọñ ammọ.

⁴Ammọ eyaebo, “Mmọ anye ‘editịmme ndi’ a-anye akenwọñọke? Sia tọọñọ mme ete ñnyịn ekekpañña, afịd ñkpọ aba naña akesʌk aba tọọñọ ke ntọọñọ ederimbod.”

⁵Ado ammọ ekookoi efre ete ke anyan ini, ato ke ikọ Abasi ikpaanyọñ amaaba, ye isọñ, e-ekesiooho eto mmọọñ enyʌñ edat mmọọñ ebod.

⁶Ato mmọọñ ami ñko ke ekedat efʌk enyʌñ esobo ederimbod a-akebaaha idahado.

⁷Ato kpasʌk ke ikọ ado e-enịm ikpaanyọñ ye isọñ abaaha idahami enọ ikañ, sia enịm enọ usen ikpe ye edisobo mbon a-amidiọọñọke Abasi.

⁸Ado ekiifre ñkpọ keed ami, mme ndima ufan, usen keed ke anyen Abọọñ aba nte tọsịn isua, tọsịn isua anyʌñ aba nte usen keed.

⁹Abọọñ iyeede ke adinam enwọñọ amọ, naña mme awo ekere ebo ke anye a-ayeet. Anye akap anie anyan ime ye ndufo, inyʌññọ iyem ba awo keed atak, ado ayem afịd awo etua ñkpọfiọk enyʌñ ekappa esịd.

¹⁰Ado usen Abọọñ adiiwat nte inọ. Ikpaanyọñ ayaaboiyo afep ye ekamba uyom; ikañ ayaasobo se edat ebot ederimbod, ndin isọñ ye afịd ñkpọ adina ukpọk.

¹¹Sia ediisobo afịd ñkpọ ntom, nso utọ mme awo ke akpena ndufo edo? Akpena ndufo edu adisana ye uwem ke uteeñe Abasi

¹²naña ndufo etie ebet usen Abasi enyʌñ eyem asọsọp adi. Usen ado ke ediisobo ikpaanyọñ ke ikañ, ñko se edat enam ebot ederimbod eyaetara ke akpọsọñ ufiop.

¹³Ado akeene enwọñọ amọ ñnyịn idot anyen ibet ufa anyọñ ye ufa isọñ, idʌñ adinenido.

¹⁴Ke ntodo, mme ndima ufan, sia ndufo etieeghe ebet mme ñkpọ ami, esịn afịd ifịk nọ edikịt ndufo naña enana ntọi, enana ndo enyʌñ eba ke emem ye anye.

¹⁵Enyʌñ edat nte ke anyan ime Abọọñ ñnyịn awuọ adinyaaña, kpa naña adima ayịnete ñnyịn Bọọd adat ifiọk Abasi akenọọhọ anye awet anọ esọk ndufo.

¹⁶Anye awet afịd ñwed amọ ke usʌñ keed, atañ abaña mme ñkpọ ami. Ubaak ñkpọ a-adọñọke ke mme deta amọ a-asọñ edinwaña awo, ndin mbon ndisịme ye mbon una iwuuk eyʌttọ ikọ ado enịm, kpa naña ammọ enam ye ikọ Abasi ñnwen, edat esobo idem ammọ.

¹⁷Ke ntodo, mme ndima ufan, sia ndufo emaekediọdiọọñọ ñkpọ ami, ekpeme mbaak mme abiad ibed ediben ndufo etịn usʌñ enyʌñ enam ndufo eduọọk itie nsọọñọnda ndufo.

¹⁸Ado ekọọd ke mfọn ye ifiọk Abọọñ ye Andinyaaña ñnyịn Yisọs Krais. Yak ubọọñ anie anye ke ami ye ke nsi-nsi, Amen.