Read Ibibio Contemporary Bible 2020 Adiyaara 12 Bible Online

Adiyaara 12 - Ibibio Contemporary Bible 2020 bible

Adiyaara 12

¹Ekamba mme utịbe idiọọñọ amaawuọ ada ke abio ubọọñ Abasi: awonwaan amaasịne utịn ke idem, nte afọñidem, afiik afiọñ ke idak ñkpad amọ anyʌñ ayara ntinya ntantaafiọñ duob mme iba ke iwuod amọ.

²Anye akesaña mme idịp anyʌñ asio ñkpo ubiak uman ke ini anye ayemme adiman ayịn.

³Ndin idiọọñọ mfen amaawuọ ada ke abio ubọọñ Abasi: ata ekamba ndad-ndad drakọn a-akenieeghe iwuod itiaba mme nnʌk duop ye ntinya itiaba ke mme iwuod amọ.

⁴Isịm amọ amaakwọọk keed ke ubaak ita mme ntantaafiọñ e-ewuọọñọke ke ikpaanyọñ eduọọñọ ke isọñ. Drakọn ado amaada ke iso awonwaan ado a-akeyemme adiman ayịn, nọ ayịn ado amaasʌk amamana anye aben amen.

⁵Anye amaaman ayịn awodeen a-adiikara afịd idịd ke esañ ukwak ndin emaewappa anye ayịn amọ ebọ, eben esọk Abasi ke ebekpo amọ.

⁶Awonwaan ado amaafeghe anyọñ akpautatan, itie a-Abasi akediọññọ anịm anọ anye, e-ediise anye anyen inyʌñ ikama anye ke mme usen tọsịn keed mme ikie iba mme ata (1,260).

⁷Ndin ekọñ amaasakka ke abio ubọọñ Abasi. Maiked ye mme enyere amọ emaenwana ye drakọn ado, ndin drakọn ado ye mme enyere amọ enyʌñ enwana ye ammọ.

⁸Ado anye drakọn ikisọññọ adudu ikem, ndin anye amaaduọọk itie ammọ ke abio ubọọñ Abasi.

⁹Emaetop ekamba drakọn eduọọk ke isọñ, akaan udʌkikọd ado e-ekoodo anye andidiọọk me Setan, anye a-anamma afịd ederimbod ewuọ ekpọñ usʌñ. Emaetop anye eduọọk ke isọñ ye mme enyere amọ.

¹⁰Ndin mmaakop naña ekamba uyo ke abio ubọọñ Abasi nte abo: “Idahami adinyaaña ye adudu mme abio ubọọñ Abasi ñnyịn adi ye ukara Krais amọ sia esio anye a-asidotto nditọeka ñnyịn ikọ eduọọk ke isọñ, anye a-asidotto ammọ uyo ke iso Abasi ñnyịn ke uweemeayo mme akonayo.

¹¹Ammọ emaekan anye ke iyiib Ayịn Edọñ mme ke ikọ ntiense ammọ; ammọ ikimaaha uwem ammọ ikisịm itie adisịk idem nsio mbaak ñkpa.

¹²Ke ntodo edaara, mme ikpaanyọñ mme ndufo edʌññọ ke esịd! Ado adọdiọọk anọ isọñ mme inyañ, sia andidiọọk asọiyọ ibịne ndufo! Anye ayọhọ ye ifiobesịd sia adiọọñọ abo ke ini imọ adisʌhọ etək-etək.”

¹³Ndin ke drakọn amaakekịt ibo ke itop imọ eduọọk ke iso isọñ, anye amaabịne awonwaan a-akemanna ayịn awodeen ado.

¹⁴Emaenọ awonwaan ado mba ekamba nturukpuum iba nọ anye akan afuuro aka itie e-ekediọọññọ enịm enọ anye ke akpa ntatan, itie e-ediise anye anyen ke etək ini ye ubaak, mbaak idiọọk udʌkikọd ado adisịme anye.

¹⁵Ndin udʌkikọd ado amaatop mmọọñ asio ke inua amọ nte inyañ, ayem adikpuud awonwaan ado mben ke udiọñ mmọọñ ado.

¹⁶Ado isọñ amaanwam awonwaan ado ke aditat inua amọ mmen mmọọñ inyañ ake drakọn ado akekọkkọ ke inua amọ.

¹⁷Ndin drakọn amaanekke ayat esịd mme awonwaan ado anyʌñ adọñ idem aka adikinwana ekọñ mme ukeed mfịd idịb amọ se ikisʌhọ, mbon e-enịmme mme ibed Abasi, enyʌñ emʌm ikọ ntiense Yisọs ekama.