Read Ibibio Contemporary Bible 2020 Adiyaara 14 Bible Online

Adiyaara 14 - Ibibio Contemporary Bible 2020 bible

Adiyaara 14

¹Ndin mmaase ñnyʌñ ñkịt Ayịn Edọñ naña ada ke iso mmi ke Abod Sayọn ye mme awo 144,000 e-emaekewet anyịñ Ayịn Edọñ mme anyịñ Ete amọ ke mme akpọiso ammọ.

²Ndin mmaakop uyom naña ato abio ubọọñ Abasi a-akeyomoke nte ndufuud mmọọñ mme nte aduma asakka. Uyom mfen añkekoppo akeba nte ikwọ ndido a-mme andibre ebreke.

³Ndin ammọ emaekwọ ufa ikwọ ke iso ebekpo ye ke iso mme aduuwem ñkpọ unam inaañ ye mme ñyobioawo ado. Awo ndomokeed ikikanna ikpeeb ufa ikwọ ado ibọhọke mme awo 144,000 ado e-emaekefak esio ke ederimbod.

⁴Mbon ami ekedo mbon a-mmiikisappake idem ammọ ye ibaan, sia emaenịm idem ammọ ke edisana. Ammọ esʌk ekeene Ayịn Edọñ nte anye akaaka. Emaedep ammọ esio ke atu awo, ete ke ammọ edo akpa mfịd enọ Abasi ye Ayịn Edọñ.

⁵Nsu ndomokeed ikibaaha ammọ ke inua; ammọ enana ndo.

⁶Ndin mmaakịt enyere mfen naña afụụro ke ufọọd afịm, ndin anye amaanie nsi-nsi eti etob adikwọrọ nnọọ mme andidʌñ ke ederimbod: afịd mme idịd, aduuk, usem mme afịd ubon awo.

⁷Anye amaabo ke akpọsọñ uyo, “Baak Abasi nyʌñ nọ anye ubọọñ sia awa ubioro ikpe amọ adikem. Kpono anye a-akenamma mme ikpaanyọñ, ederimbod akpa inyañ, ye mme idịm mmọọñ.”

⁸Ayọhọ enyere iba amaakeene anye abo, “ ‘Aduọ! Ekamba Babidọn aduọ,’ anye a-akenamma afịd mme idịd enwọñ mmịn edamma mme efịbe amọ.”

⁹Ayọhọ enyere ita amaakeene ammọ ndin abo ke akpọsọñ uyo: “Adieke awo ndomokeed akponoke idiọọk unam mme mbiod idem amọ, anyʌñ abọ idiọọñọ ke akpọiso mme ke ubọk amọ,

¹⁰anye ñko ayaanwọñ ifiobesịd Abasi nte ukọd e-emaeketọkkọ idọñ ayọhọ kọọb iyadesịd amọ. Eyaedutʌkkọ anye ke ikañ sọọfọ ke iso mme ndisana enyere mme Ayịn Edọñ.

¹¹Ndin nsʌñikañ ndutʌkkọ ammọ adọọk anyọñ ke nsi-nsi nsi-nsi. Nduọkadudu ibaaha uweeme me akoneyo inọ mbon e-ekponoke idiọọk unam ado ye mbiod amọ, ye awo ake adodo a-abọọhọ idiọọñọ anyịñ amọ.”

¹²Ñkpọ ami ayem ime ye adiyọ nto mme ndisana awo e-enịmme mme ibed Abasi enyʌñ esọñọ eda ke Yisọs.

¹³Ndin mmaakop uyo naña ato ke abio ubọọñ Abasi abo: “Wet: Afọfọn anọ mme akpañkpa e-ekpaaha ke Abọọñ tọọñọ ke ami.” “Ih,” Sịbidịd abo, “ammọ eyaeduọk adudu ke utom ammọ sia mme adinam ammọ eyaekeene ammọ.”

¹⁴Mmaase, nnyʌñ ñkịt ke iso mmi afia ntọñanyọñ, ndin andikitie ke ntọñanyọñ ami akeba nte ayịn awo ayara ntinya kood ke iwuod amọ anyʌñ akama usọb ikwa ke ubọk amọ.

¹⁵Ndin enyere mfen amaawuọ ke tembịd adikood andikitie ke ntọñanyọñ ke akpọsọñ uyo, ate: “Ben usọb ikwa mfo tọọñọ adikpeeñe ukpeeñe, sia ini idọk adikem sia ukpeñe ederimbod adad.”

¹⁶Ndin andikitie ke ntọñanyọñ amaakanna usọb ikwa ukpeeñe amọ akpeeñe ukpeeñe ederimbod.

¹⁷Enyere mfen amaawuọ ke tembịd Abasi ke abio ubọọñ Abasi adi, anye ñko amaakama nsọsọbọ usọb ikwa ukpeeñe.

¹⁸Enyere mfen a-asiseeghe ñkpọ abaña ikañ, ato itie uwa adi anyʌñ akood andikikama usọb ikwa ukpeeñe ke akpọsọñ uyo: “Ben ikwa ukpeeñe mfo nyʌñ kpịkke mme ayọ kreb siooño ke fain ederimbod, sia kreb a-adat.”

¹⁹Enyere ado amaatop usọb ikwa amọ akanna anyʌñ akpịkke mme kreb ederimbod atop adọñ ke akwa udʌñ unuak ukọd ifiobesịd Abasi.

²⁰Emaetịm ammọ enuak ke udʌñ unuak ukọd ke uwuọñkpọñ abio, ndin iyiib amaaduọkkọ ato udʌñ unuak ukọd, awak tutu adọọk akeda ke idaha inua enañ mbakara anyʌñ anyọọñ ke nte stedia 1,600.