Read Ibibio Contemporary Bible 2020 Adiyaara 16 Bible Online

Adiyaara 16 - Ibibio Contemporary Bible 2020 bible

Adiyaara 16

¹Ndin ami mmaakop ekamba uyo nte ato tembịd abo mme enyere itiaba ado ate: “Ikaa ikitoomo mme bọwịd ifiobesịd Abasi itiaba ado iduọọñọ ke ederimbod.”

²Akpa enyere amaaka aketop bọwịd ifiobesịd amọ aduọk ke isọñ, ndin ndiọi ndọk a-akesañake mme akpọsọñ ubiak emaebomo ewuọọñọ ke idem mbon e-emaekebọ idiọọñọ idiọọk unam enyʌñ ekpono mbiod amọ.

³Ayọhọ enyere iba amaatop bọwịd ifiobesịd ake amọ aduọk ke akpa mmọọñ, ndin anye amaakappa ado iyiib nte ake awo a-amaakpa, ndin afịd mme adu uwem ñkpọ ke inyañ emaekpañña.

⁴Ayọhọ enyere ita amaatop bọwịd ifiobesịd ake amọ aduọk ke mme inyañ, mme idịm mmọọñ, ndin ammọ emaekappa iyiib.

⁵Ndin mmaakop naña enyere andise ñkpọ mbaña mmọọñ abo: “Afo amenen ke mme ubioom ikpe ami, Afo a-abaahaba, a-akenyʌññọ ababa Afo a-adooho Adisana, sia Afo abiireke ikpe ntom;

⁶sia ammọ emaeduọk iyiib mme ndisana awo mfo ye mme brọfed ndin afo amenọ ammọ iyiib enwọñ naña adot ye ammọ.”

⁷Ndin ami mmaakop naña ibọọrọ awuọ ke itie uwa adi: “Ih Abọọñ Abasi Andikan Ñkan, akpanikọ mme unen edoñño mme ubiooro ikpe mfo.”

⁸Ayọhọ enyere inaañ amaaduọk ake amọ ke utịn, ndin emaenọ utịn adudu edita mme awo mme ikañ.

⁹Idem ammọ amaayaaña ato ke akpọsọñ ufiop, ndin ammọ emaesueeñ anyịñ Abasi, Andikara mme unọmọ ado, ado ammọ emaesịn adikappa esịd ñnyʌñ nnọ anye ubọọñ.

¹⁰Ayọhọ enyere ition amaaduọk bọwịd ake amọ ke ebekpo idiọọk unam ndin akịm amaafʌk abio ubọọñ amọ. Mme awo emaedoom mme edeme ammọ ke ntak akpọsọñ ubiak

¹¹enyʌñ esueeñ Abasi ke abio ubọọñ Abasi ke ntak akpọsọñ ubiak mme ndọk ammọ, enyʌñ esịn edikappa esịd ñkpọñ se ammọ ekenam.

¹²Ayọhọ enyere itiokeed amaaduọk bọwịd ake amọ ke akwa akpa mmọọñ Yufretis, ndin mmọọñ amọ amaasat ma enam usʌñ enịm enọ mme ndidem usakka utịn.

¹³Ndin mmaakịt mme ndiọi sịbidịd ita e-ekebitte mme mfuọd; ammọ ekewuọọñọ ke inua drakọn, ewuọọñọ eto inua idiọọk unam ye mme asʌhọ nsu brọfed.

¹⁴Ammọ edoñño mme sịbidịd ndiọi sịbidịd e-enaññake mme ñyọ-ñyọ idiọọñọ, ndin ammọ ewuọọñọ ebịne mme ndidem afịd ederimbod edikoono ammọ nọ edinwana ekọñ ke ekamba usen Abasi Andikan Ñkan.

¹⁵“Sese mmedi nte inọ! Afọfọn anọ anye a-atabake idab anyʌñ asịne afọñ amọ ke idem, mbaak anye adisaña ifed adia abuud.”

¹⁶Ndin emaekoono mme ndidem ederimbod eka itie ekoodo ke ikọ Ibru Amakedọn.

¹⁷Enyere ayọhọ itiaba amaatop bọwịd ake amọ aduọk ke afịm ndin ekamba uyo amaato tembịd awuọ ke ebekpo abo “Enam ema!”

¹⁸Ndin mme unwana akepkep emaesaiya, ndukuunọ, ntoomo aduma mme akpọsọñ unyekisọñ emaeba. Unyekisọñ ado amaakpon tutu, tọọñọ awo aketọọñọ aba ke ederimbod, akenaanam unyekisọñ a-abaaha ntodo ibaaha.

¹⁹Ekamba abio amaasakka ke mbaak ita, mme abio ke mme idịd mme idịd emaenyʌñ ewuuro. Abasi amaatoiyo Babidọn ekamba abio anyʌñ anọ anye iko a-ayọhọke ye ukọd akpọsọñ ifiobesịd amọ.

²⁰Afịd mme isuọ emaefeeñe, awo ikanna inyʌñ ikịd aba mme ikpọ abod.

²¹Mme edịm itiad e-ekedoppoke eyọhọ baun ikie emaeto ikpaanyọñ ediduọññọ etọọñ mme awo. Ndin ammọ emaesueeñ Abasi ke ntak unọmọ edịm itiad ado, sia unọmọ ado amaanie ndịk abọhọ.