Read Ibibio Contemporary Bible 2020 Adiyaara 19 Bible Online

Adiyaara 19 - Ibibio Contemporary Bible 2020 bible

Adiyaara 19

¹Ke ami amaakeboiyo, mmaakop se ikiba nte uyom ekemba atu awo ke abio ubọọñ Abasi naña ebọñọ ñkpo. “Haadeduya! Edinyaaña mme ubọọñ ye adudu enie Abasi ñnyịn sia ubiire ikpe,

²amọ ado unen mme akpanikọ. Anye abiom ekamba akpara ado ikpe, anye a-akedubiamma ederimbod ke mme efịbe amọ. Anye asio anye usieene iyiib mme isʌñutom amọ.”

³Ndin ammọ emaana ebọñ ñkpo ete: “Haadeduya! Nsʌñikañ a-atooho anye adọọk aka ke nsi-nsi nsi-nsi.”

⁴Mme mbioawo edịp mme inaañ ado, ye mme aduuwem unam ado emaeduọọñọ ke isọñ ekpono Abasi, a-aketieeghe ke ebekpo. Ndin enyʌñ ebọọñ ete: “Amen, Haadeduya!”

⁵Ndin uyo amaato ebekpo ate: “Ekpono Abasi ñnyịn, afịd ndufo mme isʌñutom, ndufo e-efegheke anye, ntək-ntək mme ikpọ!”

⁶Ndin mmaakop se ikiba nte ekamba atu awo, nte uyom adufụụd mmọọñ mme nte nsakka uwak aduma, naña ebo: “Haadeduya! Sia Abọọñ Abasi Andikpon Ñkan ñnyịn akara.

⁷Yak ñnyịn idaara inyʌñ inemesịd inyʌñ inọ anye ubọọñ! Sia ini ndọ Ayịn Edọñ adi, ndin anwaan ndọ abeeñe idem.

⁸Emaenọ anye uyaiya nsem-nsem ye nsana dinen asịne” (Uyaiya dinen ada anọ ndinen utom mme ndisana awo Abasi.)

⁹Ndin enyere amambo miin ate, “Wet: Afọfọn anọ mbon e-ekoodo ebo edi usọrọ ndọ Ayịn Edọñ!” Anyʌñ adian do ate “Emi edoñño mme akpanikọ Abasi.”

¹⁰Ke emaeketañ ami, ami mmaaduọ anye ke ukod edikpono anye, ado anye amambo miin ate: “Kuunam ado! Ami ndo emọ-emọ isʌñutom nte afo mme nditọ usọ e-emʌmmọ ikọ ntiense ekama. Kpono Abasi! Sia ikọ ntiense Yisọs ado Sịbidịd brọfesi.”

¹¹Mmaakịt abio ubọọñ Abasi naña ana inwañ, ke iso mmi afia enañ mbakara ada, ekood andiwad anye Nsọọnọda ye Akpanikọ. Ke unen anye akpe ikpe anyʌñ anwana ekọñ.

¹²Anyen amọ esak nte ndubek ikañ, anye anyʌñ ayara uwak anyanya ke iwuod. Anye anie anyịñ e-ewette anye ke idem adooho awo ndomokeed mfen idiọọñọke ibọhọke anye ke idem amọ kpọd.

¹³Anye asịne afọñ e-ekenyiine ke iyiib, ndin anyịñ amọ ado ikọ Abasi.

¹⁴Mme udim ekọñ abio ubọọñ Abasi emaekeene anye, ewaad ke anyọñ mfia enañ mbakara enyʌñ esiine uyaiya dinen, mfia ye nsaana.

¹⁵Akañkañ a-asọppọ afịbe anye ke inua ma anye adat akpi mme idịd. “Anye ayaakara ammọ ye esañ ukwak.” Anye ado andidioho unuak ukọd iyadesịd ye ifiopesịd Abasi Andikpon Ñkan.

¹⁶Ewet anyịñ amọ ke afọñidem amọ ye ke ifʌkkọ amọ: adidem mme ndidem ye abọọñ mme mbọọñ.

¹⁷Ndin ami mmaakịt enyere naña ada ke utịn a-akebọññọ ke ekamba uyọ anọ afịd mme inuen se ifuurọ ke ufọọd anyọñ, “Idi, idiboho itie keed ke ekamba usọrọ udia Abọọñ Abasi,

¹⁸nọ ndufo eta abʌk mme ndidem, ikpọ mbon ukara ekọñ, ye mme awo e-ekoppo adudu, mme enañ mbakara ye mme andiwat, mme abʌkidem afịd awo, amanaisọñ mme ifʌn, ntək mme ikpọ.”

¹⁹Ndin mmaakịt idiọọk unam ye mme adaukara ederimbod ye mbon ekọñ amọ naña ebono itie keed edinwana ekọñ ye andiwad afia enañ mbakara mme mbon ekọñ amọ.

²⁰Ado emaemʌm idiọọk unam, ye nsu-nsu brọfed e-ekesinamma mme utịbe idiọọñọ ke iwuod amọ. Mme idiọọñọ ado ke anye akesikama ayaañ mbon e-ekebọọhọ idiọọñọ idiọọk unam enyʌñ ekpono mbiod amọ. Emaetop ammọ awo iba edọñ ke ibiok ikañ sọọfọ.

²¹Mbon se ikisʌhọ emaewood ye akañkañ a-akewuọọhọ ke inua andikiwat enañ mbakara, ndin afịd mme inuen emaeta eyʌkkọ ke abʌk ammọ.