Read Ibibio Contemporary Bible 2020 Adiyaara 22 Bible Online

Adiyaara 22 - Ibibio Contemporary Bible 2020 bible

Adiyaara 22

¹Ndin enyere amañwọt miin inyañ uwem a-asanake nte Krista, a-afegheke ato ebekpo Abasi ye ake Ayịn Edọñ

²adiwuọ ke ufọọd ekamba usʌñ abio ado. Ke mbeñ iba inyañ ado eto uwem ada a-ayịreke ayọ mfịd duop mme iba anyʌñ asio mfịd afịd-afịd afiọñ. Ndin mme mfañ eto ado, ado se edat ekọk mme idịd udọñọ.

³Nsue idiibaaha aba. Ebekpo Abasi mme ake Ayịn Edọñ adiiba ke abio ado, ndin mme isʌñutom amọ eyaenam ñkpọ enọ anye.

⁴Ammọ eyaekịt anye iso, ndin anyịñ amọ ayaawere ammọ ke akpọiso.

⁵Akoneyo idiibaaha aba, ammọ idiiyemme unwana utuenikañ mme unwana utịn, sia Abọọñ Abasi ayaanọ ammọ unwana. Ndin ammọ eyaedat ukara ke nsi-nsi nsi-nsi.

⁶Enyere amaambo miin, “Mme ikọ ami e-edot se enịm ke akpanikọ enyʌñ edoñño akpanikọ. Abọọñ, Abasi mme Sịbidịd mme brọfed, amaadọñ enyere amọ akewọt mme isʌñutom amọ mme ñkpọ a-anaaha esọp etịppe.”

⁷“Sese, Ami nsʌk nsọp ndi! Afọfọn anọ awo a-anịmme mme ikọ brọfesi adọñọke ke ñwed ami.”

⁸Ami, Yọọn, ami ndo andikikop ñnyʌñ ñkịt mme ñkpọ ami. Mmaakekop ñnyʌñ ñkịd ammọ, mmaaduọ ke isọñ ke ukod enyere ado adikpono anye a-akeñwọttọ miin mme ñkpọ ami.

⁹Ado anye amaambo miin: “Kuunam ntodo, ami ndo emọ-emọ isʌñutom mme afo ye nditọ usọ mme brọfed mme afịd se inịm mme ikọ ñwed ami. Kpono Abasi.”

¹⁰Ndin anye amaambo miin: “Kuukʌp ufiik ikọ brọfesi ñwed ami sia ini a-akpere.

¹¹Yak andinam idiọọk aka iso anam idiọọk; yak andido ndubiam akaiso ado ndubiam; yak anam etiñkpọ akaiso ke adinam eti ñkpọ; ndin yak andido adisana akaiso ado edisana.

¹²“Sese, Ami nsʌk nsọp ndi! Mme utịb Mmi mmọdo mme Ami, ndin ñyaanọ afịd awo akeene se ammọ ekenam.

¹³Ami ndo Arfa ye Omeka, Akpa ye Akpatre, Ntọọñọ ye Utịd.

¹⁴“Afọfọn anọ mbon e-eyette afọñ ammọ, nọ enie unen ke eto uwem enyʌñ eboiyo eto inuaatob adʌk ke esịd abio.

¹⁵Ke esion mme ewa eba, mme anam mayịk mme esịn efịbe, nsaña use, mme awọd awo, mme akpono ndem mme afịd awo se ima inyʌñ inam nsu-nsu uwem.

¹⁶“Ami, Yisọs, mmedọñ enyere Mmi aduunọ fiin mme ikọ ntiense ami enọ mme ufọkabasi. Ami ndo Adʌñ mme Ntịppe Defid, mme ñyayama Ntantaafiọñ ubakusen.”

¹⁷Sịbidịd mme ufa anwaan ndọ ete, “Di!” Ndin yak anye a-akoppo abo, “Di!” Awo ake adodo i-itọñ asatta, yak anye adi. Ndin awo ake amama, yak anye adibọ enọ mfọn mmọọñ uwem.

¹⁸Ami mmewuuk afịd awo se ikop mme ikọ brọfesi ñwed ami: Awo ake adidian ñkpọ ndomokeed ke mme ikọ ami, Abasi ayaadian mme unọmọ e-etañña ebaña ke ñwed ami anọ anye.

¹⁹Ndin adieke awo ndomokeed asiooho ikọ ndomokeed afep ke ñwed brọfesi ami, Abasi ayaasio udeme amọ afep ke eto uwem ye ke adisana abio, e-etañña ebaña ke ñwed ami.

²⁰Anye a-atañña mme ikọ ntiense ami abo, “Ih, Ami nsʌk nsọp ndi.” Amen. Di, Abọọñ Yisọs.

²¹Yak mfọn Abọọñ Yisọs aba mme nditọ Abasi. Amen.