Read Ibibio Contemporary Bible 2020 Adiyaara 8 Bible Online

Adiyaara 8 - Ibibio Contemporary Bible 2020 bible

Adiyaara 8

¹Ke anye amaakekʌppọ ayọhọ ufiikñkpọ itiaba, ndobo amaaba ke abio ubọọñ Abasi ke ñkpọ nte ubaak awa keed.

²Ndin ami mmaakịt mme enyere itiaba e-edaaha ke iso Abasi, ndin emaenọ ammọ adukpʌñ itiaba.

³Enyere mfen a-akekamake ñkpọ ufọb insensi e-enamma ke nte kood, amaadida ke itie uwa. Emaenọ anye uwak insensi adifọp, ye mme akam mme ndisana ikot Abasi ke itie ufọb uwa ake nte kood, ke iso ebekpo.

⁴Nsʌñikañ insensi ado, ye akam mme ndisana awo, emaediana keed esaña eto ubọk enyere ado edọọk eka iso Abasi.

⁵Ndin enyere ado amaaben ñkpọ ufọb insensi adọñ ikañ a-aketooho itie ufọp uwa, atop asuan ke iso isọñ; ndin emaekop uyom mme ndukuunọ aduma, enyʌñ ekịt unwana ikañ akepkep ye unyekisọñ.

⁶Ndin mme enyere itiaba e-ekekamake mme adukpʌñ itiaba emaebeeñe idem edifịt ammọ.

⁷Akpa enyere amaafịt adukpəñ amọ ndin edịm itiad a-asañake mme ikañ ye iyiib amaadep, ekenam afịd mme ñkpọ ami aduọkkọ ke ederimbod. Ubaak ederimbod keed ke atu ita amaata ikañ akweeñe, ubaak keed ke atu ita mme eto emaenyʌñ eta ikañ ekweeñe, afịd mme awawa mbid emaenyʌñ esak ekweeñe.

⁸Ayọhọ enyere iba amaafịt adukpəñ amọ. Emaetop ñkpọ a-akebaaha nte ata ekamba abod a-adooho asʌk asak ikañ asịn ke inyañ. Ubaak inyañ keed ke atu ita amaakappa ado iyiib.

⁹Ubaak keed ke atu mbaak ita ke atu afịd ñkpọ se ikidu uwem ke esịd inyañ emaekpañña, ndin ñko ubaak keed ke atu mbaak ita ubom emaebiaaña ke inyañ.

¹⁰Ayọhọ enyere ita amaafịt adukpəñ amọ, ndin ata ekamba ntantaafiọñ a-akeyammake nte tọọsidaid amaato ikpaanyọñ adiduọ ke akpa mmọọñ ayọhọ ubaak ita.

¹¹Anyịñ ntantaafiọñ ado akedo Wọọmwụụd. Ayọhọ ubaak keed ke itie ita mme mmọọñ emaekappa edodoro ndin uwak awo se ikiñwọñ emaekpañña eto naña mmọọñ ado akedoro.

¹²Ayọhọ enyere inaañ amaafịt adukpəñ amọ, ndin emaetuak ayọhọ ubaak keed ke itie ita utịn, ayọhọ ubaak keed ke itie ita afiọñ mme ayọhọ ubaak keed ke itie ita ntantaafiọñ tutu ayọhọ ita amọ ukeed adido abubịd. Ayọhọ ubaak ita usen ado ikinieeghe unwana, Ayọhọ ubaak keed ke itie ita akoneyo ñko ikinieeghe unwana.

¹³Ami ñkesʌk nse, ndikop naña nturukpuum keed a-akesʌkkọ afụụro ke ufọọd anyọñ abọọñ ke akpọsọñ uyo abo: “Adọdiọọk anọ! Adọdiọọk anọ! Adọdiọọk anọ mme andidʌñ ke isọñ, ato ke ntak uyo adukpʌñ a-enyere ita e-esʌhọke do ebooho ifịt do!”