Read Ibibio Contemporary Bible 2020 Adiyaara 9 Bible Online

Adiyaara 9 - Ibibio Contemporary Bible 2020 bible

Adiyaara 9

¹Enyere ayọhọ ition amaafịt adukpəñ amọ, ndin ami mmañkịt ntantaafiọñ a-amaaketo ikpaanyọñ ididuọ ke isọñ. Emaenọ ntantaafiọñ ado ukpọhọde Abis.

²Ke anye amaakekpọkkọ usʌñ Abis, nsʌñikañ a-aketooho awuọ akebit nsʌñikañ ekamba ubabara ikañ. Utịn ye ikpaanyọñ ekediinweenwen ke ntak nsʌñikañ a-akewuọọhọ ato Abis ado.

³Mme ñkukuñkpọyọriyọ emaeto nsʌñikañ ado ewuọọñọ edọñọ ederimbod, ndin emaenọ ammọ adudu nte eke mme ikpeyen ederimbod.

⁴Emaedọkkọ ammọ ebo yak ekubiad mme mbid ke ederimbod mme eto se ikọkọt ndomokeed, ado yak eta afịd mbon awo emiinieeghe idiọọñọ ufiikñkpọ Abasi ke akpọiso ammọ.

⁵Awo ikinọọhọ ammọ adudu adiwowot ammọ, akedo aditọtʌkkọ ammọ ke ñkpọ nte afiọñ ition. Ndin ubiak se mme awo ekebọ aketie nte ntoob mba-mba ke anye atoppo awo.

⁶Ke idaha mme ini ado mme awo eyaeyem ñkpa, ado idiikịtte; ñkpa ayaawʌt ammọ, ado ñkpa aya feghe akpọñ ammọ.

⁷Mme ñkukuñkpọyọriyọ ado ekebiod mme enañ mbakara e-emaekebeeñe idem adika ekọñ. Ammọ ekeyara ñkpọ nte ntinya kood ke iwuod ammọ, ndin iso ammọ ekebiod iso awo.

⁸Ided ammọ aketie nte ided ibaan, ndin eded ammọ ekebiod eded ekpe.

⁹Ammọ emaenie ufʌk ikpanesịd a-akebiotto ukwak, ndin uyom mba ammọ ekenamma ekeyomo nte ikpad uwak enañ mbakara e-edʌttọ ke ukpadñkpọ e-efeeñeke eka ekọñ.

¹⁰Ammọ emaenieeñe nsịm mme ntoob nte mba-mba, ndin nsịm ammọ emaenieeñe adudu aditʌkkọ mme awo ke afiọñ ition.

¹¹Adidem ammọ akedo enyere Abis, ami ke usem Ibru akekoodo Abadọn, ndin ke usem Krik ekekood Abọdiọn (awọọhọke adibiad ñkpọ).

¹²Akpa ukuud aboiyo, ukuud iba ako idisịñmme diin.

¹³Ayọhọ enyere itiokeed amaafịt adukpəñ amọ, ndin mmaakop naña uyo awuọ ato mme nnʌk itie uwa nte kood a-abaaha ke iso Abasi adi.

¹⁴Anye abo enyere ayọhọ itiokeed a-akekamake adukpʌñ “Tat mme enyere inaañ e-ekebọppọ ke ekamba akpa Yufretis.”

¹⁵Ndin mme enyere inaañ e-ekenịmme ke mbeeñeidem enọ awa ami, mme usen, mme afiọñ, mme isua ami emaetat ammọ eyaak ebo ewood ayọhọ ubaak keed ke itie ita ke ubon awo.

¹⁶Ibad mbon ekọñ se ikidoro ke enañ mbakara mme ukpadñkpọ ekedo midiọn ikie iba. Mmaakop ibad ammọ.

¹⁷Mme enañ mbakara ye mme andiwaad ammọ añkekịtte ke ñkukịd mmi ekebañña ntom: Mme ufuuk ikpanesịd ammọ ekeba ikañ-ikañ, ndad-ndad, akịm-akịm bru, mme uto-uto nte sọọfọ. Mme iwuod mme ena mbakara ado akebiod mme iwuod ekpe, ndin ikañ, nsʌñikañ ye sọọfọ emaewuọọñọ eto inua ammọ.

¹⁸Mbaka keed ke itie ita se ito uduod awo emaewot ato ke unọmọ ita ami a-adooho ikañ, nsʌñikañ ye sọọfọ a-akewuọọñọke ato inua ammọ.

¹⁹Adudu mme enañ mbakara ami ekesịne ke inua mme nsịm ammọ; sia mme nsịm ammọ ekebañña nte udʌkikọd e-enieeñeke iwuod ammọ ekamake enọọñọ mme awo unan.

²⁰Mbon awo se ikisʌhọ amme a-unọmọ ami mmiikiwotto ikisʌkkọ ikakappa esịd ibaña mme ubọkutom ammọ; ammọ ikitreke adikpono ndiọi sịbidịd, ye mme ubobod ñkpọ kood, sịrifa, brọnsi, itiad ye eto, mme ubobod ñkpọ e-emiikanna ikịt usʌñ, ikoppo ikọ, inyʌññọ isaña isañ.

²¹Ammọ ikikappake esịd ibaña uwood awo, ubre mayịk, usịn efịbe ye uyiib inọ.