Read Ignaciano Mateo 10 Bible Online

Mateo 10 - Ignaciano bible

Mateo 10

¹Ema Jesús máichu'awakapa ena dósekeneana máimitureana, máijarakawakapa eta náitupajijiasirawanayare, narata'airayare nákijika ena éreanana, tási'a apaesa nakanaraka nákani nakajumakeneana'i, énapa ena katiru'ana'i.

²Eta juka, eta naíjareana ena dóseana apústuleana: Ema tínapuika ema Simón Pedro, émapa ema maparapeichu Andrés, ema Santiago émapa ema maparapeichu Juan, machichanaveana ema Zebedeo,

³Ema Felipe, ema Bartolomé ema Tomás, émapa ema Mateo, ema tive'ara'ini eta tawacha eta apake'e taye'e eta Roma, ema apana Santiago machicha ema Alfeo, tási'a émapa ema Tadeo,

⁴ema Simón ema Cananeo, émapa ema Júlasi Iscariote, ema tíjarareka'i ema Jesús.

⁵Ema Jesús mawanekawakapa ena dósekeneana tikametarairuanayare'i. Ánipa máicha: “Wa'i ekuyana te náwasana ena maimatira'ana ema Viya. Wá'iware ekuyana naye'e ena samaritanuana,

⁶eyanayare te awasareana náwasana'i ena israelítana. Taicha ena nakuti'i eta uvesana mákenureana.

⁷Eyana ekametarairuyare naye'e, eta mawasa ema Viya akenuka te anuma takachakayaipa.

⁸Ekanarakawakayarepa'i ena karachameana énapa nákani tikatajiwana'i taicha eta apana jumare. Ekaechepukayarewa ena náepenakeneana. Ekuchukayarewa ena éreanana. Eti, wa'i ewachareruina'i eta juka ítupajijiasirawa'i, wá'iware ekuyaseaka eta ewachaina nákani ekanararuanayare.

⁹“Wá'iware iámaima'i eta uru, etapa eta plata, eta reale

¹⁰étapa eta eniruruka'a eta epaisirayarepa'i te achene. Wa'iware ekuama eta itsiwajiasiawa eta emuiri'a, étapa eta éparupewana, étapa eta eyupairiki, taicha ema tikaematanera'i taurikayare naijaraka eta manikakene.

¹¹“Te ítekapaucha jákani awasare, etanukayare ema achane tiuri, témunara'i. Enasinumayare taye'e, tiámainukawa te táitekapa eta iúchusirayare te awasare, epaenumawaya ejunijika eta ítekapi'a'i.

¹²Te esiapayarepa taye'e eta peti, échejikaya ena tikapenana.

¹³Te tiúriana'i ena achaneana tikapenana'i eta peti, ímiyanawa eyaseuchayare eta náurikakarewaina. Té'esera te wa'i nakuri, wa'i eyaseuchaima'i.

¹⁴Te wá'ipuka nakujakapa'e te jákani awasare, wá'iware nakuwara'a nakusama'e, iúchukawaneyare. Étatapewachawanumayasera eta máteji te íwapeana, táikutiarayare eta máikuñasirawakayare ema Viya taicha eta namawaraira'i najakapa'e'ini.

¹⁵Nutupiruwa numetaka'e, te táitekapa eta juicio, tiápajupanaya eta náikuñayare, takachurikayare eta nakaikuñaira'i ena achaneana wínarajikeneana tikawasanaini te Sodoma étapa eta Gomorra.

¹⁶“¡Íma'a! Nuwaneka'e'i, ekuti'i eta uvesana te tamuri eta sárare táiñe'ikene ichini. Échemara'iyaresera ekatiuchirawayare ákuti eta kichare, tasi'asera ekutiyare eta paluma eta tamansuwa'i.

¹⁷Échapawa, taicha tikarataka'eanainapa, tiáma'eanainapa naye'e ena tuparairukana, téstaka'eanainapa te peti náurujisirarewa ena juriyuana

¹⁸tási'a ena tiáma'eanaya te namira'u ena akenukana, té'eware te namira'u ena reyeana, táichavene'i eta é'isiranu'i, taka'e ekamapurawainapa échejisianuyare eta nuye'e te namira'u ena maimatira'ana ema Viya.

¹⁹Te'esera te nama'epa te namira'u ena akenukana, wa'i ekueñamawa eti eta échejiuchirawayare, ekatiuchirawayare, taicha te taitekapapa eta uraya eta, échejiuchirawayare ema Viya tijaraka'eyare eta tauriwayare eta échejisirayare.

²⁰Eti wa'i échejikaima'i, émayare ema Machanewa Viya ema techejiucha'eyare.

²¹“Ena kaparapekakana nawara'ainapa naimikapaka ema naparape. Tási'a nákani tikachicha'eana, nawara'ayarewa náijarareka ena nachichanaveana, tási'a nákani nachichanaveana nakanarainapa ena náiyana, tási'a náimikapakainapa.

²²Namutuya ena achaneana tikatianaka'eanayare táichavene'i eta é'isiranu'i, émasera mákani tikamicha'i te táitawapa tamutu, tiuchuku'ayare.

²³Te napanajika'epuka te jákani awasare iávi'a'i, ejunayare te apana awasare. Jé'esare ema Machicha ema Ajaira, mátiajapainapa. Wícha'a ekuita'i eti epaika eta awasareana taye'e eta Israel.

²⁴“Najina emanaina ena máimiture, nakutinasi'ini ema maye'e maestro, tási'a najinaware emanaina ema nakajurure mapajupanawa'ini maye'e ema makenu.

²⁵Mákani máimiture tiurisamureyare'i eta makutinasirayare ema maye'e maestro, tási'a ema mawanara makutiyare'i ema makenu. Émaipa ema achane tachutiri'a te mapena, naímijarecha'i Wínaraji, ¿taja'apuka nakayemayare eye'e eti nimiture'eana'i?

²⁶“Wá'isera ekupikawaka ena achaneana. Taicha tajina tiyumurukawaima'i eta naeñaureana, tamutuyare'i téchakareya, tájinaware tépakuchaima'i jákani nayumurureana, tamutuyare'i téchakareya.

²⁷Jákani nichakeneana'i te timapiku, eti íchayare te tijara'i. Étaipa eta nujajairu'e'i, epiarakainapa te petiana.

²⁸Wa'i ekupika nákani tikapakana eta iáke'e, taicha wa'i narata'aima'i nakapaka eta iáchanewa, makarichu epikayare ema Viya, taicha ema, marata'a'i makamitiekene'a eta iáchanewana taye'e eta táiñe'ikene ekuñaraki.

²⁹“¿Eta káyurechicha ímijachapapuka eti wa'i tasiwacha'ini eta? Téñamakareana'iware me Viya, ema téchawaka'i eta táitaresira'i.

³⁰Evetijipa eti, éñamakarepana'i maye'e ema. Ema técha'e'iware eta tatupa eta echutimakana.

³¹Eta taka'e, wa'i ekueñamawa eti, taicha tétavikawa'i eta emunawa'i eti maye'e ema.

³²“Namutu ena tímereuchawana'i eta náe'isiranu'i te namira'u ena achaneana, nuti apanaware nímereuchawaya eta nuchanerairawaka'i ena maye'e ema Tata Nukaiyakene, tiávi'a'i te anuma,

³³nákanisera wa'i tímereuchawana'i eta náe'isiranu'i, nuti apanawa wa'iware nimereuchaima'i eta nuchaneranaina'ini ena, te mamira'u ema Tata Nukaiyakene tiavi'a te anuma.

³⁴“Eti ímijachaipapuka eta nítesira'i, tájina takayemakaréma'i, wá'isera ene taka'e'ini, eta taka'e, nuwara'a échapirika eta juka é'isiranu'i.

³⁵Timitekanu'i nunakayare'i mákani achane, sukani esena, te natiari'i ena nachichanaveana, nakatichayare'i,

³⁶ene naka'eya, narari'iyare ena tachichanaveana eta peti tikatianakanaya ena náiyana.

³⁷“Ena temunakapanana ena naiyana, esupuka esu naena, wáipa tatuparaka'ini nuchaneranaina'ini, enaipa nákani tínajikawana eta náe'isiranu'i, éneichuware waipa tatuparaka'ini nuchaneranaina'ini,

³⁸tási'a nákani apaesaichu eta nawaraira'i té'ikanuana'i, waipaware tátuparaka'ini nuchaneranaina'ini.

³⁹Mákani téñamawa'i eta máitaresira, máwamira'u'i eta máe'isiranuya, émajiwayare tikamitiekene'awayare, émasera ema táimikapakapuka eta máe'isiranuya, ema tiúchuku'ayare eta máitaresirayare.

⁴⁰“Mákani tijachapa'eanayare eti, nuti'i tijakapanuana'i, tási'a mákani tijakapanu'i nuti, najakapa'iware ema Tata.

⁴¹Éneichuware mákani tijakapana'i ema profeta, nakutinasiyare ema profeta eta najachapirayare eta naikuchi'i, ena tijakapana ena achaneana tiuriana, nakutinasiyarewa ena tiuriana eta najachapiraya eta naikuchi'i.

⁴²Tási'a énaipa ena témunara'iana'i naye'e ena nani ánichichakeneana, te naesicha eta une, táichavene eta náe'isiranu'i, éneichuware jarari'i eta náikuchikene.”