Read Ignaciano Mateo 11 Bible Online

Mateo 11 - Ignaciano bible

Mateo 11

¹Te tamutupa eta máimitusira'i ema Jesús ena dósekeneana máimitureana, tiyanawarepa te awasareana taye'e eta Galilea, taicha mawara'a'i máimitukayare ena achaneana eta máechejiriruwa ema Viya.

²Ema Juan, mávine'i te nakaeratairare, masamairikapa eta máichakeneana'i ema Cristo. Taka'e máewatakapa ena máimitureana

³nayaserepanayare'i te yátupi'ipuka émaipa'i ema nakuchapakene'i, té'eserapuka tímiyanawayarepuka nakuchapaya ema apana.

⁴Ema Jesús májikapawakapa: “Eyana emétaka ema Juan eta juka íma'akeneana'i étapa eta esamakeneana'i.

⁵Emétakayare, eta nukaimairikawakaipa ena púchukiana, nímipaisiraipa ena masariana, nukanarakawakaipa eta najumanaini ena karachameana, énapa ena tú'ukiñana samara'ianapa, nukaechepusirawakaipawa ena náepenakeneanaini, éneichuware níchu'a'i ena páureana vimisamawaka'i eta Arairu echéjirirukawa.

⁶¡Tiurikakareya mákani achane, te wa'i makaetseraru eta mae'isiranu!”

⁷Te tiyananapa ena, ema Jesús tépanawapa téchejika'i, máechejisi'apa ema Juan, maka'epa: “¿Te eyanapa eti te máwapa'i apake'e, naja'a ima'apana'i? ¿Eta taflurena eta akutena te takayamurijiru'i eta tékatikawa?

⁸Te wa'ipuka ¿Taja'asika eta timikuchuka'e'i ima'akene'i? ¿Émana achane tuirinamuiri'a? Eti échaichu'i, ena tiurinamuiri'ana, ena tikapenana'i te napena ena reyeana.

⁹Taka'e ¿Nája'asika ema íma'apanakene'i? ¿Íma'apana'i ema émana profeta? Ene taka'e'i, ema íma'apanakene'i ema'i profeta.

¹⁰Ema Juan émara taechejisi'akene'i eta Ajureka: ‘Nuti nuwanekayare te pimira'u ema tikametarairuyare, apaesa matserereka eta achene.’

¹¹Nutupiruwa numetaka'e, te nasimutuwa ena achaneana nájina mákutima'i ema Juan Tikachasirikara'i, ena ánichichapana te anuma mawasa akenuka ema Viya, marari'i ema chapepana maye'e ema.

¹²“Te máitekapineichu'i ema Juan Tikachasirikara'i, puiticha, eta mawasa akenuka te anuma ema Viya, wa'i náurika'ini nasamararaka'ini, tanasi'i nakaticha'i ema,

¹³Namutu ena profetanaini tási'a eta wanairipi taechejisi'a'i eta maítesirayare'i ema Juan ema tikachasirikara'i;

¹⁴ema Juan émaipa'i ema profeta máiteruyare'i mawasiyare'i ema Elías, eta máinapumirauchiranuyare.

¹⁵Nákani tikakiñana'i nasamararaka.

¹⁶“¿Naja'apuka nímikuticha ena achaneana puiti juka sácheana? Nímikuticha ena amaperuana tiyanana tiutseruana te plaza, piararerekana'i, apápipijichucha eta nakayemakeneanapa'i te nakachanewaka ena nachamaperuwana:

¹⁷‘Vikasivivi'i, vepiyaka'i eta piesta, étisera wa'i irimaika'ini, vijirapika'i eta katisamurekarewa, wá'iware iya'a'ini eti.’

¹⁸Taicha te tímerekawapa ema Juan, wa'i tákuti'ini eta nanikasareana ena achaneana. Náimijacha'i máwa'aru'i ema éreana.

¹⁹Taka'e titeka'i ema manerejiru'i ema Viya, kánisiukitataji, terara'i makachanewaka'i ena achaneana tisipekaturara'iana, enapa ena tive'ara'iana eta viyase'ana taye'eyare'i eta awasare Roma. Etasera eta maitukakene ema Viya timereuchawa'i eta maitauchira'i.”

²⁰Taka'e ema Jesús tépanawapa máechejisi'a eta awasareana máichinewaka'i eta tiáramikareana, taicha wa'i nae'ika'ini ema Viya. Maka'eipa ema Jesús:

²¹“¡Je'eyapukaini, Corazín! ¡Je'eyapukaini, Betsaida! Taicha te népiyaka'ini eta tiaramikare te Tiro etapa te Sidón, ena naitsiwachaipaini eta naitaresira me Viya, nakamuiri'aipaini eta tisesu amáratataji, naepurasikawaipa'ini eta tsimapa te nachuti enewanena'ini náimerekawa'ini yátupi eta náeñauchirawa'i.

²²Tasi'asera numetaka'ewane te jena sácheyare titekapaya eta ekuñaraki, murakapanayare ejachapa eta íkuñayare eti, takachurikayare eta nakaikuñairaya ena achaneana tikawasana'i te jena Tiro etapa Sidón.

²³Tási'a piti pikawasa'i te Cafarnaúm, ¿pimijachaipapuka pisiapayare te anuma? ¡Tiakijikavianayare te taupenakene pusu! Taicha te Sodoma naimereka'ini eta tiaramikareana eta naichakeneana'i ánaki eye'e eti, nemeteaka eta awasare tatiari'inaichu'ini puiti juka sacheana.

²⁴Tasi'asera numetaka'ewane, ichape eta íkuñayare te táitekapapa eta ekuñarakiyare, takachurikayare eta nákaikuñaira'i ena tikawasanaini te awasareni Sodomaini.”

²⁵Te akaneni taepaninewaini, ema Jesús ánipa maka'e: “Tata Nukaiyakene, tétavikawa eta nukunachiravi, jé'eware píti tákenuvi'i eta anuma étapa te juka apake'e. Títauchawaipa eta pipanereru'i, wa'i písapa'ini náituka'ini eta júkana ena achaneana tímijachawana'i téchemara'iana.

²⁶Eta Tata Nukaiyakene taicha eta tapiwara'akene'i.”

²⁷“Ema Tata Nukaiyakene, ema tíjarakanu'i eta nútiraya néchaya tamutu. Nájina timatina ema machicha emachucha ema Vikaiyakene, nájinawa timatina ema Vikaiyakene emachucha ema machicha manerejiru.

²⁸Yare, ekasiñanu emutu eti evitajiruana'i taicha eta émataneana tási'a etipa éyarekara'iana eta iámakeneana, núti nukanaraka'eyare.

²⁹Ísapawa nunakasika'e eta nuye'e yubu, tási'a ekarawa'u nuye'e, taicha núti mánsunu, tétavikawa eta núriwa eta nusamure. Eta taka'e ejachapayare eta enarasirayare.

³⁰Taicha eta nuye'e yubu nijararu'e eta iámakene, wa'i tákajera'in'i, tipevejiyare esama.”