Read Ignaciano Mateo 13 Bible Online

Mateo 13 - Ignaciano bible

Mateo 13

¹Jena sache'i, tiyanapa ema Jesús makaiju'e te tachausi eta kákiure, tási'a téjakapa.

²Kamurianapa'iware ena achaneana títekapauchana'i ema Jesús, ema tiáwaku'apa taye'e eta pakure, taka'e ema téjekapa, ena achaneana nanasipa te tachausi eta te tiájipa'i.

³Taka'e máechejisi'apa, eta máimikutichakeneana'i eta máimitusirawaka'i. Taka'e máichawakapa: “Matiari'i'i ema achane, tiyanapa téwapana'i te máesane.

⁴Eta mapaisirapa'i témirikapa eta táki te achene. Tási'a eta nanukuirapa'i ena achaneana, nákatayayajikapa eta táki táemiriru'i te achene. Tási'a te táima'apa eta káyureana, tanikapa.

⁵Tási'a, eta apamuri témirikapa te wá'ichu tamitutu'ini eta máteji, taicha máripa'i'i eta apake'e. Tímarukawanepaneni táicha,

⁶té'esera te tíjurepa eta sache, takapajikapa, taicha wá'ichu táuparewaka'ini.

⁷Tási'a eta apamuri témirikapa te tatarakukuji eta itapekiji, tiúrina'ineni eta táimarusira'i, étasera eta itapejiana takachurikapa eta tajurusira'i, táepakuchapa eta sukurekana.

⁸Étasera eta apamuri témirikapa te tiúrina máteji, tási'a tiúrinapana'i eta tajurusira'i. Eta étajawa takaye'e'i cienki eta táki, eta apana takaye'e sesentaki, eta apanaware takaye'eware treintaki.

⁹Nákani tikakiñana'i nasamararaka.”

¹⁰Taka'e, ena máimitureana témeña'awanapa maye'e ema Jesús, nayaserekapa tája'apuka takayema'i eta máimikutichakene'i maye'e ema téwakara'i.

¹¹Ema Jesús májikapawakapa: “Émasera ema Viya timimaticha'e eti, eta juka maeñaure'i te mawasa ema Viya akenuka te anuma, énasera ena apamuriana achaneana wa'i maitametakawakaima'i.

¹²Taicha ema tikaima'akene najanechinaya eta apana maima'akeneya kamuripanainapa makaye'e, émasera mákani tájina maima'akenena naverejinaya tamutu eta maima'akeneanaini tayanapanepuka ánimurichichaichu.

¹³Eta taka'e'i eta nímitusirawaka'i, nímikutiarachinawaka'i táicha ena naimararaka wá'isera náima'a, nasama'ineni wá'isera nakukaikutiara wá'iware napanerecha.

¹⁴Puiti ena nani achaneana nakuti ena achaneana akane, wa'i nasuapa'ini ema profeta Isaías: ‘Tayanapane esama, wá'isera ekaikutiaraima'i, Tayanapane ímararaka, wá'isera íma'aima'i.

¹⁵Taicha eta napanereruana ena achaneana, tétavikawa'i eta tamurakawa wa'i ewara'a esama, tási'a epiyakawa'iware púchuki'e, eta emawaraira'i ima'a, emawaraira'i ekaikutiara'ini, éñauchawa'ini nuye'e, apaesa wa'i ekukaikutiara, eta nuye'e, apaesa nuti waipa nukanaraka'ema'i.’

¹⁶“Étisera eti nímitureana, tétavikawa'i eta iúrikakarewa'i, taicha esuapa'i eta juka íma'akeneana'i étapa eta esamakeneana'i.

¹⁷Akane ichapemuriana ena achaneana tiúriana, énapa ena profetana, tétavikawa'i eta nawaraira'i tímatinuana, náima'aware eta juka níchakeneana'i íma'akeneana'i, nawara'awarepa nasama eta nímituresira'i, wáipasera naituruka'ini nakapayaka'ini.

¹⁸“Esamanuicha'a eta juka takayemakene'i eta nímikutiarachakene'i maye'e ema téwakara'i:

¹⁹Narari'i ena tisamanaipa'inéni eta maímiturapiana'i ema Viya, émasera ema wínaraji wa'i máisapa'ini tánasi'ini te nasamureana eta echéjirirukawa, ena nakuti'i eta ewaraki takaewakene'i te máteji murakapa'ikene te achene.

²⁰Natiari'iware ena apamuriana achaneana, nakuti'i eta ewaraki takaewakene'i te máteji máripa'i, te nasamararaka eta echéjirirukawa, natupiruwane'i nasuapa,

²¹wá'isera nárata'a'ini yátupina'íni, wa'i nakuti'íni eta ewaraki tiúpare, ánipichu eta náe'isira'i, wá'iware túmesamureanaina'ini eta nakatichaira ena achaneana.

²²Natiari'iware ena apamuriana nakuti eta ewaraki takaewakene'i te tatarakukuji eta itapekiji, te nasamararaka eta echéjirirukawa, natupiruwane'i nasuapa, étasera eta tawayuakawaka'i eta tájiparakana, étapa eta nawaraira'i tirrikuchawana. Tamutu eta juka táemetavika'i eta nawaraira'i té'ikanuana.

²³Natiari'isera ena apamuriana achaneana nakuti'i eta taúrinakene ewaraki, takaewakene'i te máteji tiúrina. Náunaka'i yátupi eta nímiturapiana, chapejawa'i taijaraka'i eta taki. Taijaraka'i cien, sesenta, treintaki eta taki.”

²⁴Ema Jesús máimikutichinaware eta apana: “Te mawasa akenuka te anuma ema Viya tatiari'iyare eta sácheyare eta nakayesere'iraya ena achaneana, takuti'i eta máichawakenewa mákani achane téwakara'i eta tiúrina ewáraki taye'e eta tiúrina máteji,

²⁵Étasera te tímakanapa namutu ena, maka'epaipa ema makatianaru, masukuchapa te tataraku ta apana sukureka, máimisiriki'apa eta táiñema'ikeneana ejare, tási'a tiyanapa.

²⁶Te tímarukapa eta ewaraki, tiúchukawarepa eta ejare, takachanepaipa eta ewaraki.

²⁷Taka'e ena machanerana ema achane tiyananapa nametapana ema náeja'aru'i: “Tata, eta jena péwaraki'i, tájina takasiriki'ini eta táiñema'ikeneana ejare, puítisera tiúchukapa takachanepaipa'i eta péwaraki'i’

²⁸Ema náeja'aru'i máichawakapa: ‘Matiari'i mákani tikatianakanu'i, ema tícha'i eta juka.’ Ena machanerana náichapa: ‘¿Piwara'apuka, viyana viti vivepuri'a eta jena ejareana?’

²⁹Émasera májikapawakapa: ‘Wa'i, taka'echucha, taicha machu táimivepurika eta néwaraki trigo.

³⁰Tákutikakaicha'a eta tajurusirayare. Tiámainukawa te takaechatijipa, nuwaneka'énapa eti tatiwayare evepurika eta ejarejiana, ítijikainapa eta takaijuirayare. Tási'a, eve'ainasarepa eta trigo, tikaunainapa te takaunairare.’ ”

³¹Ema Jesús máimikutiarachaware eta máimituresira'i: “Te mawasa ema Viya Akénuka te anuma, takuti'i eta taki eta mostaza, takaewakene te maesane ema achane.

³²Ímatichu'i eti eta taki eta mostaza, eta ánichichapana'i taye'e eta apamuriana ewarakiana, tási'asera te tímarukapa, tiúnayare'i eta táenaki, takutiyare'i eta apamuriana yukukiana eta táichapewa, takachurikayare'i eta apamuriana ewarakiana, járajapainapa eta káyureana, táepiyakainapa eta tamakajiana te tatawawajiana.”

³³Éneichuware máimikutiaracha'i eta máimituresira'i: “Eta mawasa ema Viya Akénuka te anuma, tímikutijirikawa'i eta levadura, esu súkani esena tiúri'i eta tasisijisira eta suépiyaru'i masa, tayanapane apinapukaini arruwa eta suye'e jarina, tasi'ajika'isera, jé'esare tiápukayare'i taicha.”

³⁴Ema Jesús tamutu máimikutiaracha'i eta máimituresira'i ena achaneana. Tájina éta'ena te tímitureka, wa'i makunaka'ini eta máimikutichira.

³⁵Eta juka titauchasawarepa eta máechejiriruwana'i ema profeta: “Nímikutichinayarepa'i, eta nechejisirayare, nímikaecherachainapa eta táeñaurewakene'i te tépanawainapa eta máepiyasira'i ema Viya eta apake'e.”

³⁶Taka'e ema Jesús mawanekawakapa ena achaneana nayanapa te napenana. Ema tisiapapa te peti, tási'a ena máimitureana nakachakayapa, tási'a nayaserekapa eta máimikaecheracha'ini eta máimiturapi'i, eta máimikutichakene'i eta ejare te apake'e.

³⁷Ema Jesús majikapawakapa: “Ema téwaka'i eta tiúrina ewaraki, éma'i ema Machicha ema Ajaira,

³⁸eta apake'e takaewaiya'i eta trigo, éna'i ena achaneana te juka apake'e. Eta tiúrina ewaraki, eti'i nuchanerana'i, tási'a eta ejare éna'i ena machanerana'i ema wínaraji,

³⁹taicha ema tikatianakanu'i, manaka'i eta ejare, mawaraira'i máepakucha eta néwaru'i, eta takaechatijirapa eta trigo, eta'i eta táitavirayare eta apake'e, nárajapayarepa ena ángeleana, tikurujika'eanaya.

⁴⁰Takutiyare eta ejare te tikakurujikasipa kaijukasinapa te yuku, taka'eyare te maitekapa ema Viya vikayesesere'inapa eta vichakeneana'i tamurikeneana te achane'avicha'a.

⁴¹Nuti manerejirunu ema Viya nuwanekaya ena nuye'eana ángeleana, nave'aya namutu eta namaeperajikeneana, tichana'i eta tamaurikeneana. Ena naemejekapawaraka ena apamuriana achaneana.

⁴²Ena ángeleana nakijikawakainapa ena achaneana te taijurekene yuku, ánaki tipikanainapa, tiya'anayarewa eta takatiwayare nasama.

⁴³Tási'a, nákani títauchana'i eta mawanairipiana'i ema Viya, tétavikawayare eta najaraiwayare ánaki te mawasa ema Tata, takutiyare eta sache eta najaraiwa. Nakaini tikakiñana'i, nasama.

⁴⁴“Eta mawasa ema Viya, takuti eta tayumururewakene entierro. Te máichimawa'i mákani achane eta entierro, tiúrisamureyare'i, tási'a máimichawayare'i mayumuruka taye'e eta apake'e távi'a'i. Mawacharekayarepa eta apake'e, mawarairayare'i eta entierro.

⁴⁵“Eta mawasa ema Viya, takuti'i mákani comerciante matanukapa'i mawachareka eta tasiwachakene perla;

⁴⁶te máichimawapa eta perla matanurepa'i, tétavikawa'i eta tasiwachawa'i, mawara'a'isera mawachareka eta, tayanapane táimijararekayare'i tamutu eta makaye'ekeneana'i.

⁴⁷“Eta mawasa ema Viya nímikuticha eta yuta'e, te viakijieka te kákiure tave'awaka apanapanenéji eta jímana.

⁴⁸Te náima'apa tínika eta nayuta'e, nave'ayarepa nachurupaikapa te tachausi, nanerejikayarepa eta jímana tiurinana, nanakaku'ayarepa te ma'a. Tási'a nákijikayarepa eta apamuri máurira'ana'i.

⁴⁹Ene taka'eyare eta táitavirayare eta apake'e: Nárajapayare ena ángeleana, nanerejikainapa ena achaneana ena tíchana'i eta tiuri, enapa ena tíchana'i eta tamaurikeneana'i. Nakaerajikawakainapa,

⁵⁰tási'a náijuchainapa te yuku ena tíchana'i eta tamaurikeneana, tikapitikia'echawanainapa eta takatiwayare nasama. Tíya'anainapa.”

⁵¹Ema Jesús mayaserekapa: — ¿Ekaikutiara'i eti tamutu eta juka? — Vikaikutiara, tata.

⁵²Taka'e, ema Jesús máichapa: — Ena escriwánu te naimatiekene'apa eta takayemakene'i eta mawasa ema Viya Akénuka te anuma, makuti'i mákani achane tikaye'e jakani peti, maveku'apana eta makaye'ekeneana, arairu etapa eta ichasi.

⁵³Te titapirikapa ema Jesús eta máimikutiarachakeneana'i eta juka máimiturapiana, tiyanapa taye'e

⁵⁴tási'a tichawapa te máwasa apake'e, taka'e tepanawapa timitureka'i te peti náurujisirarewa ena juriyuana. Naramine'i ena achaneana ánipa naka'e'i: — ¿Tavi'apuka makarawa'uine ema maka tamutu eta juka máitupajijiasirawapa'i? ¿Marata'a'iware makuchuka eta tiaramikareana?

⁵⁵¿Wa'i émaina ema maka machicha ema José, ema carpintero, vímatiware esu maena María? ¿Wa'i émaina ema maparape ema Santiago, ema José, ema Simón, émapa ema Judas,

⁵⁶vímatiware ena esenana maparapenaveana, tikawasana'i eta ani viye'e? ¿Tavi'asika máitusiawa'i tamutu eta juka?

⁵⁷Tási'a nájina emanaina te juka nasuapaima'i ema. Émasera ema Jesús maichawakapa: — Nájina tijakapaina ema profeta máuchure'i te mawasaichu, te'esera te apanana awasare najachapayare'i.

⁵⁸Tási'a ánaki wa'ichu maicha'ini eta tiáramikareana, táicha ena achaneana wa'i nasuapa'ini, wá'iware nakasiñawa'ini eta maye'e.