Read Ignaciano Mateo 14 Bible Online

Mateo 14 - Ignaciano bible

Mateo 14

¹Etaichu'i jena sacheana'i ema Aluresi, ema'i akenuka'i taye'e eta Galilea, masamairikapa eta náechejisi'a'i ema Jesús,

²tási'a maichapa, ena máewanachana: “Émara ema Juan Tikachasirikara'i, tichawa'i téchepuka te máekari, táitusiawa máituruka'i makuchuka eta tiáramikareana.”

³Taicha ema Aluresi mave'a'i esu Herodías, esu mayena'i ema maparape Filipo, taka'e étapa temerataka'i ema Juan.

⁴Taicha ema Juan maichapa ema Aluresi: “Wa'i tiuri eta pichakene'i pive'a'i esu pichinena, mayena'i ema piparape.”

⁵Taka'e ema Aluresi, mawara'a'i makapaka ema Juan, tipika'isera ema nasema'ini ena achaneana, taicha ema Juan, tétavikawa'i eta nasuapira'i, náimati'i ema eta émaira'i profeta.

⁶Tási'asera, títekapapa eta sache máijaremu'u ema Herodes, sutiari'i'i esu amaperu, suchicha esu Herodías. Tiúchukapa tírimaika te mamira'u ema Herodes, énapa ena machimarana'i, ema Herodes máurikaine'i ichape

⁷taka'e, ema majuracha eta maijarasiraya jákani suyasearuyare'i.

⁸Tási'a, esu amaperu suyaserekapa esu suena tája'a'ipuka eta suyasearuyare'i. Esu suena suímitukapa: Piyaseakayare ani píchaya: — Píjarakanu eta ñichuti eñi Juan te kuruja.

⁹Taka'e, eta masamira'i eta juka suyasearu'i, ema rey Herodes ichapeine'i eta mapanerechira'i, tájinapasera máicharakawa'ini, taicha máechejiriruwaipa'i majurachaipa'i te namira'u ena machimarana'i eta máijarasirayare eta suyasearuyare'i esu.

¹⁰Taka'e, makawanairipipa nayuchatipikenu'apana ema Juan te makaerataiya'i;

¹¹taka'e, námapaipa te kuruja eta machutini, náijarakapa esu amaperu, tási'a esu sujakapapa, suíjarakapa esu suena.

¹²Títekapanapa ena máimitureana'i ema Juan, nave'apa eta máke'eni, náekarapanapa. Tási'a, tiyananapa nametapana'i ema Jesús.

¹³Te masamairikapa ema Jesús eta techakareana'i, tiawaku'apa te pakure makarichu'i tiyanapa terajikawa'i. Énasera ena achaneana náechapa eta mayanira'i, tiyananapa tipaikana'i nakapayapana.

¹⁴Te tiúkupaikapa ema Jesús te pakure, máima'apa ena kamurikeneana achaneana; majapanuwakaine'i eta máimairawaka'i ena, makanarakawakapa ena nakajumakeneana'i námakeneanapa'i.

¹⁵Taka'e te yatiyarepa, nakachakayapa ena máimitureana tási'a náichapa: — Pimetakawaka ena achaneana, kápere'ipa, tiyere'iwaka'i eta pétiana. Táurikapa piwanekawaka ena nayanapa, nawachareka eta nanika, taicha ani tájina naviyawaima'i eta nanika.

¹⁶Ema Jesús májikapawakapa: — Wa'i takamesa viwanekawaka nayana, íjaraka étina eta nanika.

¹⁷Ena nájikapapa: — Wa'i tarataima'i, sinkuine eta juka pan, tási'a apikipa eta jima.

¹⁸Ema Jesús máichawakapa: — Iáminanu ani.

¹⁹Taka'e, makawanairipipa náeja'a'apaika ena achaneana te muíjipa'i. Mave'apa eta sinkukene pan étapa eta apiki jima, máesenikapa te anuma, ma'asulupayachapa ema Viya, mayuvetukawakapa eta pan, tási'a, máijarakapa ena máimitureana, tási'a ena naijarakawakapa ena achaneana.

²⁰Taka'e, námutupa, tisatu'eanapa eta nanisira'i, tási'a, tikaemachawanaicha'aware dóse'ikene saye ichape'iana eta tainikacha eta náemacharajiana'i.

²¹Ena tinikana'i, sinku milkeneana'i ena ajairana, eta náichapemuriwa'i, wa'ineni náimitupacha'ini ena esenana énapa ena amaperuana.

²²Te tamutupa, enewanepa mawaneka'i ema Jesús tiáwaku'ana eta te pakure ena máimitureana, tínapukanayare'i tiánuekana te apachara eta kákiure émasera manasiyarecha'a'i kametawanumayarecha'a'i naye'e ena achaneana.

²³Te tamutupa eta makametawaira'i ema Jesús naye'e ena achaneana, tiyanapa tiápana'i taye'e eta mari. Tiyujarakayare'i taye'e. Étapa tavine'i eta yati, manasipa makarichu'i taye'e.

²⁴Taka'e, te túpierekanapa eta napakure, tachimarakapa eta muraka tékatikawa, nákapaki'apa'i. Taka'e eta taepaku tae'acheyechapa'i eta napakure.

²⁵Te tijararamapepa, naíma'apa ema Jesús mapaikanauchapa'i eta une.

²⁶Eta naímaira'i ena máimitureana, tiaramekanaine'i tipiararemuri'anapa naka'epa: — ¡Kunare eta juka!

²⁷Émasera ema Jesús maéchejikapa: — ¡Wa'i ekupika! ¡Nútichucha: Étumechawa!

²⁸Tási'a, ema Pedro majikapapa: — Te yátupipuka pítikene'i, piti Tata, piwanekanu núti apanaware nupaikanaucha eta une, nuwara'a nuyana nupauchavi te piavi'a'i.

²⁹— Yare — majikapapa ema Jesús. Enewanepa tiúkupaika te pakure ema Pedro. Tiyanapa mapaikanauchapa eta une, makapayakapa te mavi'a'i ema Jesús.

³⁰Étasera eta máramesira'i taicha eta muraka tékatikawa, timutsera'awapaipa térikapaipa. Tási'a, tipiararekapa: — ¡Tata, nérikainapa!

³¹Énewanepasera makaratawauchapa ema Jesús eta makuchukuirayare'i. Tási'a, máichapa: — ¡Taja'a takayema ánipichu eta pikasiñawaira me Viya! ¿Taja'a takayema memaituka'i?

³²Te tiáwaku'anapa ena apinana te pakureju'e, enewanepa temajakawa eta tékatikawa.

³³Taka'e, namutu ena tiavi'ana'i te pakureju'e, tépuyumuri'anapa te mamira'u ema Jesús natsiukapa, naka'ewarepa: — ¡Jé'eware piti Tata, Machichakenévi'i ema Viya!

³⁴Taka'e, te apanapa sache, tiápechawanawarepa tiánuekana eta kákiure, títekapapa te awasare tikaijare Genesaret.

³⁵Taka'e, ena achaneana náimatiwanepa eta émaira'i ema Jesús. Timetajirikakanapa náechapa namutu ena achaneana tikawasana'i te awasareana. Tiyananapa maye'e ema Jesús, námawakapaipa'i namutu ena nakajumakeneana,

³⁶nayaseakawarepa ema eta máisapiraina'ini náemamajiaka eta tacheyarapi eta mamuiri'a, taka'e, nákani témamajiakanapa'i, enewanepaipa tinarakanapa'i.