Read Ignaciano Mateo 15 Bible Online

Mateo 15 - Ignaciano bible

Mateo 15

¹Nakachakayapa ena apamuriana fariséuana énapa ena escriwánuana, tiási'ana'i te Jerusalén, tási'a nayaserekapa:

²— ¿Taja'a takayema ena pímitureana wa'i nae'ika'ini eta viye'erepiana nanakipairu'i ena viáchukanaveanaini? ¿Wa'i nakasipawa'u'ini eta nanisirayare?

³Ema Jesús mayaserekawakapa: — ¿Tája'a takayema, eti eneichuware wa'i ítaucha'ini eta mawanairipiana'i ema Viya? Tasapi'apa epikaucha'i eta eye'erepiana.

⁴Ema Viya ani maka'e'i: ‘Pipikauchaya pémunakayarewa ema piya ésupa esu pena’, tási'a ‘Ema achane maejeucha esu maena emapuka ema maiya tépenayare.’

⁵Étisera eka'e'i, mákani achane tiuri'i maicha ema maiya, esupuka esu maena: ‘Wa'i nituikawaima'i nímikatakavi, taicha tamutu eta nukaye'ekeneni'i níjarakaipa ema Viya’,

⁶tási'a namutu nákani tika'eana'i eta juka, waipa kapamikasima'i maimikataka ema maiya, esupuka maena. Taicha eti ekaepa'aipa eta maechejiriruwa ema Viya taichavene eta itauchiraya eta eye'erepiana.

⁷¡Apimirana! Tatupiruwa'i eta máechejiriruwa'i ema profeta Isaías te techejisia'epa eti, te maka'epa:

⁸‘Eta juka awasare, tétserajikanuana'i te najakachuchasera, wá'isera taetupikawa'ini eta nasamureana, tiyere'inuanaichucha nuye'e.

⁹Tamapurujipa eta éñeuchirawana'i nuye'e, eta naimiturapiana nawanairipianachucha ena achaneana.’

¹⁰Tási'a, ema Jesús maichu'awakapa ena achaneana maka'epa: — Esamanu, apaesa ákaikutiara:

¹¹Eta vinikakene tisiapa'i te vijaka, waipaine'i tajararekaima'i mákani achane. Eta tijararekaya makaini achane eta tiasi'a te vijaka pipanereruana viwínarajiwana.

¹²Taka'e, ena máimitureana témeña'awanapa maye'e ema Jesús, tási'a nayaserekapa: — Ena fariséuana wa'i naurika'ini eta pikayemakene'i.

¹³Émasera májikapapa: — Jákani sukurekana, wa'i masukurena ema Tata nukaiyakene te anuma, tikavepurikasiyare.

¹⁴Ésamirikawaka, kuti'i ena apinana púchukiana tichurukakanapa'i, tiákipaikawanayare'i te jákani pusu, táicha wa'i náima'aimani eta nayani'ayare'i.

¹⁵Taka'e ema Pedro máichapa ema Jesús: — Pátupiruwa pimetaka'avi eta pikayemakene'i.

¹⁶Ema Jesús májikapapa: — ¿Éneichuware eti mapanererure'e'i?

¹⁷¿Wá'ipuka ákaikutiara'ini eta juka, tamutu eta tasiapakeneana'i te vijaka, eta vinikasareana'i, tatupiru'i te viami, tási'a te tiúchukapa, tatupirupa te irimeji?

¹⁸Étasera jákani táuchure'i te vijaka tási'akene'i te ama'e te visamure. Eta tamauriwa'i eta náechejisirana ena achaneana, étara timaeperajikawaka'i.

¹⁹Taicha eta táiñema'ikeneana panérerukana, tási'akeneana'i te ama'e eta nasamureana ena achaneana. Mákani achane mapanerecha'i makaesenara esu apana esena apayena. Nákaniware, tipanerechana'i eta tikaparekana, tiámerekana, tiwayuarekana, técheji'iana.

²⁰Eta jukana, étara tamaeperajika'i ema achane. Étasera eta jákani nanikakeneana, tayanapane wa'i náicha eta naye'erepiana eta nasipawauchirawa, wa'i tamaeperajika.

²¹Ema Jesús tiyanapa ánaki te tinapaika te Tiro te'épa Sidón.

²²Tási'a esu esena cananea, eta suchusira'i te jena awasare supiarakapaipa eta supauchira'i: — ¡Tata, piti ñichicha eñi David, pájapanunu! ¡Esu nuchicha ñáwa'aka'i eñi éreana, tétavikawa'i eta sukatajiwaira'i!

²³Ema Jesús wa'i majikapa'ini. Taka'e, napauchapa ena máimitureana, tási'a náichapa: — Tata, péwataka suyana esu suna esena, tipiararekapa'i te vékene.

²⁴Ema Jesús máichapa: — Ema Tata tiwanekanu'i nakarichu néchapajirikayare ena israelítana, ena nakuti'i eta uvesana mákenureana.

²⁵Ésusera esu esena, tiyanapa suépuyumiraichapa te mamira'u ema, suíchapa: — ¡Tata, pímikatakanu!

²⁶Ema Jesús májikapapa: — Wa'i táurika'ini everejika'ini eta naniru ena echichanaveana, eta íjarasiraina'ini tanika eta tamukuana.

²⁷Esu suíchapa: — Éne'ineni taka'e'i Tata, apanasika eta tamukuana tinikana'i te tapeku eta mesa, eta maniriemacha ema takenu.

²⁸Taka'e ema Jesús máichapa: — ¡Esena, tétavikawa eta taichapewa eta pikasiñawaira'i eta nuye'e! Puiti títauchawayare eta piyaseserepi'i. Jé'esare enewanepa tinaraka'i esu amaperu.

²⁹Taka'e ema Jesús tiuchukapa tiyanawarepa. Titekapapa te tachausi eta Kákiure te Galilea, tiapanapa te anuke'epa'i maripa'i ánaki tejakapa ema.

³⁰Taka'e, naka'epaipaware ena kamurikeneana achaneana te mavi'a'i ema, námakenepanepa'i ena nakajumakeneana, ena masariana, énapa ena púchukiana, énapa ena úpana, énapa ena túpupaikeana.

³¹Namutu ena nani nakajumakeneana makanarakawakapaipa'i ema. Ichapeine'i eta náramira'i ena achaneana eta náechejisiraipa ena úpana, énapa ena túpupaikeana tinarakanapaipa, tiúripaipa eta napaisira ena masariana, tímairikanapaipa ena púchukiana. Eta náurisamurewa'i, nakunachapaipa najírauchaipa'i ema Viya, naye'e ena Israelitana.

³²Ema Jesús máichu'awakapa ena máimitureana, tási'a máichawakapa: — Nujapanuwaka ena nani achaneana, taicha mapanapa sache eta naka'e'i ani nuye'e, tási'a tájinaware naviya'ini eta nanika. Wa'i nawara'a néwatakawaka, machu naviraji te achene, taicha eta náekuawana.

³³Ena máimitureana náichawakapa: — ¿Távi'apukaini vítusiawa'ini eta tinikakare eta te juka? Kamuriana ena achaneana eta te juka tájina vítusiawaima'i eta tinikakareana.

³⁴Ema Jesús mayaserekawakapa: — ¿Áyanacha'a eta pan eta iámakeneanapa'i eti? — Siéteine eta pan, ánimurichicha'iware eta jíma — najikapapa ena.

³⁵Taka'e makawanairipipa eta náeja'apaimuri'a'ini namutu te apake'e,

³⁶mave'apa eta siétekene pan, étapa eta jímana. Ma'asulupayachapa ema Viya. Mayuvetukapa, maíjarakapa ena máimitureana, tási'a ena naijarakawakapaipa ena achaneana.

³⁷Namutupa tinikana'i, tisatu'eanapa, tási'a nainikachaicha'awa eta siete'i eta sáyeana eta náemacharajiana.

³⁸Eta nasimutuwa'i ena achaneana, cuatro mil keneana'i ena ajairana. Natiari'i'iware ena esenana énapa ena amaperuana, énasera wa'i naímitupacha'ini.

³⁹Te tamutupa eta juka, mawanekawakapa ema Jesús ena achaneana nayanapa nachawa te napenana, tási'a ema tiáwaku'apa te pakure, tiyanapa makaiju'epa eta te awasare Magadán.