Read Ignaciano Mateo 16 Bible Online

Mateo 16 - Ignaciano bible

Mateo 16

¹Ena fariséuana, tási'a énapa ena saduceoana napauchapa ema Jesús, tási'a nawara'apa naimiakipaikaya'i, nayaseakapa máimereka'ni eta tiáramikareana, te yátupi'ipuka wanairuka'i ema Viya.

²Émasera ema Jesús májikapapa: “Te kápere'ichicha eti eka'e'i: ‘Puiti tímiyanawayare tiúriyare eta sácheana, taicha eta anuma títsime'i’,

³te yátikara'i eka'e'i: ‘Puiti tikiwayare, taicha eta anuma titsirime'i, tási'a timapikurumewa.’ Taicha eti imatiekene'a'i eta taichararakawa'i eta anuma. Ímijachawa'i wa'i ituka'ini ímatiekene'a'ini eta taikutiara eta jukana sacheana.

⁴Ena naka achaneana wínarajikeneana masuapajiraira'ana, tiyaseakanuana'i nicha eta tiáramikareana, wáipasera nijarakaima'i eta tiáramikareana, takarine'i eta máichawakenewa'i ema profetaini Jonás.” Tási'a majunijikawakapa, tiyanapa.

⁵Te tiánuekanapa ena máimitureana te apachara eta kákiure, naémitisikapa tiamana eta pan.

⁶Taka'e ema Jesús máichawakapa: — Íma'a, échapawa eta naye'e lewadura ena fariséuna, enapa ena saduceona.

⁷Ena máimitureana jajairikakanapa énajikakanapa: — ¡Wa'i viámapa'ini eta viniriji pan!

⁸Ema Jesús máimatiakawakapa, tási'a, máichawakapa: — ¿Tája'a takayema'i eta émitisisira'i eta pan? ¡Ánipichu eta ekasiñawaira'i eta nuye'e!

⁹¿Wícha'akaru ákaikutiara'ini, wá'isera échaini eta nukaejapasira'i eta sínkukene pan nanikakene'i ena sinku mílkeneana achaneana, étapa eta náemacharajiana'i?

¹⁰¿Wá'iwarepuka echa eta siétekene pan naniru'i ena cuatro mil keneana achaneana étapa eta náemacharajiana'i?

¹¹Nímijachapa ekaikutiarayare'i eta níchira'e'i eta échapirawaina'ini eta naye'e lewadura ena fariséuana, énapa ena saduceoana. Wá'ira étaina'ini néchejisi'a'ini eta lewadura taye'e eta pan.

¹²Taka'e tapaenumawapa nakaikutiara'i ema Jesús eta máichira'i, wa'inenipuka etaina'i eta levadura, taye'e eta pan, etachuchanenipuka máicha'i eta naechapirawaya eta naimiturapiana taiñema'ikeneana naye'e ena fariséuana énapa ena saduceoana.

¹³Te titekapapa ema Jesús te tinapaika eta te Cesarea te Filipo, mayaserekawakapa ena máimitureana: — ¿Tája'a nakayema ena achaneana eta maye'e ema Machicha ema Ajaira?

¹⁴Ena najikapapa: — Ena apamuriana náimijachavi'i ema Juan Tíkachasirikara'i. Ena apamuriana tímijachaviana'i ema profeta Elías, tási'a ena apamuriana naka'e'i, ema profetaini Jeremías, émapuka ema apana profetaini antivuini, téchepuka'i.

¹⁵— Tasi'a eti, ¿nája'a ímijachanu'i nuti? — Mayaserekawakapa.

¹⁶Ema Simón Pedro majikapapa: — Pítira ema Cristo, Machichakenevi'i ema Viya, ema tijaraka'avi eta vitaresira.

¹⁷Taka'e ema Jesús máichapa: — Piti Simón machicha ema Jonás, tétavikawa'i eta pétupisirawa'i, taicha manakasamureruvi'i ema Tata Nukaiyakene tiávi'a'i te anuma. Wa'i etaina'ini eta náimiturapiana naye'e nákani achaneana.

¹⁸Tási'a nuti apanaware nutupiruwa numetakavi, píti pikaijare'i Pedro, tási'a nukaechepukayare taye'e eta juka mari, eta nuye'e iglesia, tási'a etaipa eta tatumewa eta naepenira, wa'i tarata'aima'i takaepa'a.

¹⁹Piti pikatupara'ayare eta llave taye'e eta anuma te mawasa akenuka, apaesa nasiapa nákani pijakapakeneanayare, píti tamutu jákani pitiaruya tejuka apake'e kaiti'ayarewa te anuma, eta pivejapureya te juka apake'e, eneichuware tejapukaya te anuma.

²⁰Taka'e ema Jesús, matuparakawapa muraka ena máimitureana nakuija nakumetaka eta émaira'i ema Cristo.

²¹Tepanawapa, ema Jesús, máimitukawaka'i ena máimitureana, eta mayanirayarre'i te Jerusalén, eta makatajiwairayare, náepuruyar'i ena viyakarana, énapa ena tachutiri'ana naye'e ena tiyujarakara'iana, énapa escriwánuana. Mametakapa eta náimikapakayare'i, mapanayaichu'isera sache eta maka'eyare'i eta maepenirayare'i, tási'a tichawayarepa téchepuka.

²²Taka'e ema Pedro máiputsikapa, mámapa makarichu'i, tási'a tépanawapa makajacha'i, máichapa: — ¡Ema Viya wa'i makuisapavi, Tata! ¡Eta juka wa'i takuitauchawa!

²³Émasera ema Jesús tichawapa, tási'a máichapa ema Pedro: — ¡Péwisi'atataji te nuye'e piti Wínaraji, puiti piyaseakanu'i eta numasuapajiraiwayare! Piti wa'i pikaikutiara eta mapanereru ema Viya, etachucha pimararaka eta naicharakawa ena achaneana.

²⁴Taka'e ema Jesús máichawakapa ena máimitureana: — Nákani nawara'a náe'ikanu, takamunu náinajikawa tamutu eta ti'apapirikawaka'i, náijarakawa eta táimikapasiraina eta náe'isiranu'i.

²⁵Taicha mákani téñama'i eta máitaresira, émajiwayare tikamitiekene'awaya. Émasera mákani tíjarakawa'i té'ikanu, tayanapane táimikapaka eta máe'isiranuyare, ema tiúchuku'ayare.

²⁶Tájina taiturena mákani achane takaeñamararu eta maima'akeneana te juka apake'e. Taicha wa'i márata'aima'i mákani achane mawachacha eta maítaresira.

²⁷Taicha ema Machicha ema Ajaira, tichawayare'i, mámainapaipa eta majaraiwa ema Tata, makachanéwakayare ena ángeleana. Te jena sácheyare, tíjarakawakainapa eta náikuchiana'i ena machanerana, jákani náemataneanapachu'i.

²⁸Nutupiruwa numetaka'e, eti etiari'ikeneana'i puiti, enerejikawayare, wa'i épenawanema'i, íma'anumaya eta makatupara'airayare ema Machicha ema Ajaira.