Read Ignaciano Mateo 18 Bible Online

Mateo 18 - Ignaciano bible

Mateo 18

¹Te jena sachekenene'i ena máimitureana, napauchapa ema Jesús, tási'a nayaserekapa: — ¿Nája'apuka ema tikapika'upanaya te mawasa ema Viya akenuka te anuma?

²Ema Jesús máichu'apa ema émana amaperuchicha, makatupi'apa te namira'u

³tási'a máichapa: — Nutupiruwa numetaka'e, étisera te wa'ikenena ekuinajika eta tamáurikeneana wáipaine'i esiapaima'i te mawasa ema Viya akenuka te anuma, takamunu'i ákuti ena amuyana eta epanereru.

⁴Nákani nawara'a'i tikapika'upananayare te mawasa ema Viya Akénuka te anuma, takamunu nákuti ema maka amaperuchicha mánsuanayare, wa'i máitukaima'i tiákapauchawa.

⁵Tási'a Nákani tijakapa'i ema amaperu te níjare, nuti'i tijakapanuana'i, taicha mákani tijakapanu'i nuti.

⁶“Takutikene mákani tímiakipaikaya te pekatu ema émana amaperu. Tiuripana'ipukaini vitinuka'ini taye'e eta mari, vechipaikapaini taye'e eta ichapeama une.

⁷¡Yátupi wa'i téjiakawaima'i eta tímiakipaikaya ena achaneana taye'e eta pekatu! ¡Ichapepanayasera eta náikuñayare nákani achaneana tikatapirawana'i eta náimiakipaisira'i ena achaneana taye'e eta pekatu!

⁸“Eta taka'e, eta piwa'u, étapuka eta piwape, te tiviuchavi'i eta piakipaisirawa'i te pekatu, piyuchatika piákijikaya tiyere'i eta piye'e, tiuripana masari'ena eta esiapira te anuma, taicha te esiapa íama eta apinakene iwape, eta apina ewa'u, etasarenapa timikuñaka'eya taye'e eta yuku taijurekene infierno.

⁹Te tiviuchavi'ipuka eta piúki'a te pekatu, piveku'aukichawa piákijika tiyere'i, tiúrisarepa eta pisiapira te apana vítaresira, wá'isera takuimikuñakavi eta apina piuki'ana te yuku taye'e eta infierno.

¹⁰“Wa'i ekuepuru ena amaperuana. Numetaka'ewane: Narari'i ena ángeleana tijaneakawaka'i, ena tikapika'uana'i te mamira'u ema Viya.

¹¹Taicha nuti Machichanu'i ema Ajaira, eta tímitekanu'i nukuchuku'ayare nákani náemitiaru'i.

¹²“¿Taja'apuka ekayema? Te mákani achane, te kaye'e'ipuka eta cien uvesana, te témitiakapuka eta étana, eta máeñamirawa'i, manakikayare'i eta apamuriana noventa y nueve te majanearesi'a'i, eta mayanirayare'i matanupana eta taemitiaru'i.

¹³Te máichimawapa, tichawapa, tiurisamurepanapa eta maichimavira'i eta étana uvesa, taye'e eta tanasikeneana'i tamaemitiaruana'i noventa y nueve uvesana.

¹⁴Ene maka'e ema Tata Ekaiyakene eti, ema tiávi'a'i te anuma, wa'i máwara'a'ini náemitiaka'ini ena nani amaperuana.

¹⁵“Te tatiari'ipuka eta máejekapirawa'i ema piparape eta piye'e, tituparakavi pechejirikayare ema. Tási'a, piputsiakayare eta pechejirisirayare, pimetasiraya eta máejekapirawa'i. Te masuapavi ema piparape, pepachinachaipa eta mapanereru.

¹⁶Té'esera wa'i makusuapavi, pitanukayare apinanaina ena piye'eanayare testigo apaesa tasuapakarepa eta pechejirisirayare.

¹⁷Te wa'ikenena makusuapavi, pimetakapa namutu ena pichamuriana'i pikatupi'apa te namira'u. Té'esera te wá'ikenechapuka makusuapa'e, tímatikareinapa ema eta mamasuapajiraiwa'i me Viya. Waipa ekuimisiapawa maye'e, taicha eta mamasuapajiraiwa'i.

¹⁸“Nutupiruwa numetaka'e eti: Eta itiaruyare te juka apake'e kaiti'ayarewa ánaki te anuma, eta evejapureya te juka apake'e tejapukayarewa ánaki te anuma.

¹⁹“Éneichuware, te etiari'ipuka eti te juka apake'e apina'e'i, ekurujikaka'i te níjare, nutiari'iyare'i núti. Tási'a te étanaichu'i eta epanereru'i, tikutikaka'i eta eyaseserepi te maye'e ema Tata, ema tíjaraka'eyare.

²⁰Taicha nákani te tikurujikakana, apinana, mapananapuka te níjare, nuti nutiari'iya te nataraku ena.”

²¹Taka'e ema Pedro mayaserekapa, ema Jesús: — Tata, ¿áya'epuka tatuparaka nujapanuyare ema nuparape, te máejekapawa eta nuye'e? ¿Táurikapuka siéte'eyare?

²²Ema Jesús májikapapa: — Wa'i tákarichuima'i siéte'einaichuyare eta pijapanuirayare. Tímiyanawayarechucha eta pijapanuirayare. Wa'i pitupachaima'i.

²³“Eta juka, jarari'i taichawa te anuma mawasa akenuka ema Viya, makuti'i mákani rey kamuri'i eta maima'akene te mawara'a'i máechayare eta nanteveana ena mamusurana.

²⁴Te tepanawapa mavejuekene'apa ena tikanteveana'i maye'e, námapaipa'i ema tétavikawa'i eta manteve. Sesenta millone'i eta reale.

²⁵Tási'a, ema achane musu, tájina maviya'ini mawachachi'a'ini ema mákenu'i. Taka'e, ema rey makawanairipipa makaijararekasi, namutu esu mayena énapa ena machichanaveana, étapa eta makaye'ekeneanaini te mapena, apaesa mawachacha'ini apaesachichaina'ini eta manteve'i.

²⁶Tási'a, ema achane musu tépuyukapa te mamira'u ema mákenu, tási'a máichapa: ‘Pikatajikanu'ini, pikuchapanu'ini. Te nítukawapaini, nuwachachapa tamutu.’

²⁷Jé'esare, ema mákenu majapanupa, makamitiekene'a tamutu eta manteveni'i makaitikapa.

²⁸“Wícha'asera táyere'ini eta máuchusira'i, mákapajikapa ema apana achane tikanteve'i eta maye'e. Machamusuwa, wá'ineni kamurina'ini eta manteve'i, makaratakapa, macobrachapa. Masemarakapa makapitinukapa máichapa: ‘¡Piwachachanu puíti'ichu!’

²⁹Ema achane tikanteve'i tépuyukapa te mamira'u. Mayaseakapa: ‘Pikatajikanu, pikuchapanucha'a te nítukawapa, nuwachachavipa tamutu.’

³⁰Wá'ikenesera makamitiekene'a'ini eta manteve. Máimikasiapapa te nakaeratairare, mawaraira'i mawachachawaneyare'i eta manteve'i.

³¹Te náima'apa ena, tikati'ine'i te nasamure eta náimaira'i ema nachamuri. Tiyananapa nametaka'i ema rey tamutu eta máichawakenewa'i.

³²Taka'e ema rey máimichu'apa, tási'a maichapa: ‘¡Máecharairetataji! Wáipaine'i péchawa'ini eta nukamitiekene'aira'i eta pinteve. Taicha eta piti piyaseasiranu'i, eta nujapanuvi'ini.

³³Piúri'aine'i pájapanu'ini píti apanaware ema pichamusuwa'i, tákuti'ini eta nujapanuiravi'i núti.’

³⁴Tási'a ichapeine'i eta masemanewa'i ema rey, taka'e makawanairipipa náikuñaka, apaesa enewanena mawachacha tamutu eta manteve'i.”

³⁵Ema Jesús maka'epa: — Ene máicha'eyare ema Tata Nukaiyakene eti apanaware, te wa'i ekuituka ajapanu nákani eparapenaveana.