Read Ignaciano Mateo 19 Bible Online

Mateo 19 - Ignaciano bible

Mateo 19

¹Te tamutupa eta juka máimiturapiana'i ema Jesús, tiúchukapa te Galilea, tiyanapa te tinapaika te Judea. Eta Jordán tinapaika'i te táuchusine eta sache.

²Kamuriana ena achaneana te'ikana'i, ánaki makanarakapaipa ena nakajumakeneana'i.

³Natiari'isera ena fariséuana, napauchapa ema Jesús, tási'a natanuka'i eta tiviuchayare'i ema, nayaserekapa: — ¿Táurikapuka máinajika ema achane esu mayena taicha jákani tájiparakana?

⁴Ema Jesús májikapawakapa: — ¿Wa'i échejiku'a'i eti eta Takapika'ukene Ajureka, te táepaninewapa, ema Viya, te maepiyakapa, ‘ema achane esupa esu esena’?

⁵Tási'a maka'epa: ‘Eta taka'e mákani achane majunijikainapa ema maiya, esupuka esu maena, eta nave'akakaira'i, tímikutijirikawaipa étanaine'i eta náke'eana.’

⁶Eta taka'e, ema achane wa'i taurika'ini eta mainajika'ini esu mayena, taicha emakene'i ema Viya tímive'a'i.

⁷Ena nayaserekapa: — ¿Tája'asika takayema'i eta mawanairipi'i ema Moisés, tikaepiyare'i eta Ajureka suye'e esu esena, eta máinajisirayare'i?

⁸Ema Jesús máichawakapa: — Ema Moisés máisapa'i tínajikakana táichavene'i eta táetaviuchira'i eta emurakasamurewa eti, te taepaninewapa wá'isera taka'e'ini.

⁹Nuti numetaka'e, te máinajikapuka esu mayena mákani achane, tási'a, te tiapechawapa arayena mave'apa esu apana esena, tímikutijirikawaipa'i makaesenararaika'ini.

¹⁰Ena máimitureana naichawarepa: — Te éne'ipuka taka'e'i eta juka, eta vivira viti ajairana esu esena, tiúripanaichu'ipuka wa'i vikaparapekakaima'i suye'e esu esena.

¹¹Ema Jesús máichawarepa: — Wa'i námutu nárata'a naímatiekene'aima'i eta juka, narari'iyasera tinerejikawanayare'i náimatiekene'ayare, nakarichuya nákani maijararuanaya ema Viya.

¹²Narari'i ena ajairana wa'i natanukaima'i esu esena nayenaina'i, taicha eta náke'e wa'i táichu'a'ini esu esena. Narari'iware ena tikaveku'iana'i, navetijipa ena waipa náesenikaima'i esu esena. Narari'iware ena apamuriana tinerejikawana'i wa'i natanuka'ini esu nayenaina'ini, nawaraira'i takuija jákani ta'apapika'ini eta nakaemataneasiraya ema Viya.

¹³Taka'e, námawakapaipa'i ena amuyana eta maye'e ema Jesús. Nawara'a'i máemama'akawakayare'i ena, énasera ena máimitureana tepanawanapa nakájacha'i ena tiámanapa'i ena amuyana.

¹⁴Taka'e ema Jesús maka'epa: — Ésamirikachucha ena amuyana, náitekaicha'a eta nuye'e. Taicha eta mawasa ema Viya akenuka te anuma, naye'eyare'i ena nani nakutiana'i ena.

¹⁵Tási'a, máemamasikawakapa ena amuyana, mayaseuchawakapa. Te tamutupa, tiyanawarepa te apana awasare.

¹⁶Ema amaperu mapauchapa ema Jesús, tási'a mayaserekapa: — Tata Maestro, ¿tasája'apukaini nícha'ini eta taurikene, apaesa máichekuarakirena'ini eta nítaresira?

¹⁷Ema Jesús majikapapa: — ¿Tája'a takayema píyaserekanu eta tiuri? Eta tiuri etanaichu. Te'eserapuka te piwara'a pisiapa te apana vitaresira, pisuapayare eta wanairipiana.

¹⁸— ¿Taja'asika? — Mayaserekawarepa ema amaperu. Tási'a ema Jesús máichapa: — ‘Wa'i pikukapareka, wá'iware pikaesenaraima'i esu esena apayena, wa'i pikuamereka, nakuija pepiyáekeneruina,

¹⁹pipikauchayarewa ena tikachichaviana. Pémunakayarewa ema piparaepiya, tákuti eta pémunasirawa'i píti.

²⁰Tamutuipa'i eta juka nítaucha'i — maka'epa ema amaperu — ¿Tája'aserapuka eta jákani néjekeruicha'a'i?

²¹Ema Jesús májikapapa: — Te piwara'apuka pítaucha tamutu, piyana, píjararekaya tamutu eta píma'akeneana, tási'a píjarakawakapa ena páureana. Jé'eware eta pijakapayare eta píma'akeneyare te anuma. Tási'a pitekapa pé'ikanu.

²²Te masamapa ema amaperu eta juka, tiyanapa katisamurewaine'i, taicha ema mawayucha'i eta marrikuwa'i.

²³Ema Jesús máichawakapa ena máimitureana: — Nutupiruwa numetaka'e, máituji'i eta masiapiraina'ini ema riku, eta te mawasa ema Viya akenuka te anuma.

²⁴Napecha'eware numetaka'e, maejerarepana eta tasiapira eta vipera camello taye'e eta ánikuchicha tapaja, eta masiapiraina'ni ema achane riku taye'e eta mawasa ema Viya akenuka te anuma.

²⁵Eta nasamira'i ena maimitureana, náramine'i ichape, tási'a naka'epa: — ¿Tási'a nája'apapuka títujikawanayare tiuchuku'ana?

²⁶Ema Jesús maímararakawakapa, tási'a majikapapa: — Nájina émanaina achane émajiwaima'ini tikuchuku'awa, émasera ema Viya, makarichu marata'a tikuchuku'a'avi.

²⁷Ema Pedro máichawarepa: — Vítisera, vinakika'i tamutu eta vikaye'ekeneanaini, viwaraira'i vé'ikavi. ¿Tája'asika eta víjachapayare?

²⁸Ema Jesús majikapawakapa: — Nutupiruwa numetaka'e járajapayare eta sachewayare, takaitsiwairayare tamutu. Te maejakapa ema Machicha ema Ajaira te maejasi'ayare te tajara'ikene majarapi. Taka'e eti e'ikanuana'i éjakainapa taye'e eta dósekene Majarapi, éjakainapa taye'e eta ekatupara'airaya, étinapa ewanerekaya naye'e ena dósemurikeneana israelítana.

²⁹Namutu nákani nakikana'i eta napenana, najunijika'iware ena tikachichana, ena naparapenaveana, ena nayenana, ena nachichanaveana, étapa eta naye'eana apake'e táichavene'i eta nuye'e, ena najachapayare eta taitsiwayare. Tási'a te táitekapapa te apana víitaresira tavetijinapa, máichekuarakirenapa.

³⁰Tási'asera mavera'e eti etiari'ikeneana'i puiti. Te jena sácheyare, ichapepanainapa eta ekapika'uiraya. Ena puiti tikapika'uana'i, te táitauchawapa te jena sácheyare, énapawainapa tékene'anayare.