Read Ignaciano Mateo 21 Bible Online

Mateo 21 - Ignaciano bible

Mateo 21

¹Te títekapanayarepa te Jerusalén, tétawajikapa taye'e eta Betfagé te tachakaya eta masi'i Ulivukiji, ema Jesús mawanekawakapa ena apinana máimitureana,

²máichawakapa: — Eyanayare te jena awasarechicha. Ánaki íma'ayare eta esena burriku tikaiti'a'i, étapa eta tachicha. Evejapuakayare, tási'a iáminanuyare.

³Te natiari'inapuka náicha'e, emetakayare ema Tata makamunuya. Wa'i táyerema'i vímichawawaneyare.

⁴Eta juka títauchawapa eta májuchakene'i ema mákani víyara'aini profeta:

⁵“Emétakawaka ena achaneana tikawasana'i te jena awasare Jerusalén: ‘Apaesa natsekawa eta najakapirayare ema naye'eyare Rey. Tétavikawa'i eta mamansuwapa'i, tikaperayare eta burru, tachicha eta burra.’ ”

⁶Ena máimitureana tiyananapa náitaucha'i eta nawana'i'i maye'e ema Jesús.

⁷Námapa eta burriku, tási'a étapa eta tachicha, nanákamaekechapa eta náepaku'ana, tási'a tikaperapa ema Jesús.

⁸Kamuriana'i ena achaneana. Ena náepakapaikapaipa'i eta naepaku'ana te achene, tási'a ena apamuriana nave'apa'i eta tapakaji eta káchipaka.

⁹Tási'a ena tínapumirauchanapa'i, énapa ena tékene'anapa'i tipiararekanapaipa'i: — ¡Pikatiucha'avi! ¡Pájapanu'avi! ¡Asulupaya eta pítekapira'i te maijare ema Tata! ¡Asulupaya eta pítesira wanáirukakenevi'i me Viakenu tiasi'a te anuma!

¹⁰Tiúchuchujikanapa ena achaneana te Jerusalén. Ichape eta náramira'i ema Jesús eta máitekapira'i, tiyaserejirikakanapaipa: — ¿Nája'a ema maka achane?

¹¹Tási'a ena achaneana najikapapa: — Émara ema profeta Jesús, tikawasa te Nazaret te Galilea.

¹²Taka'e ema Jesús tisiapapa te mapena ema Viya, máima'aine'i ena achaneana tíjararekana'i eta sárareana, káyureana. Natiari'iware ena títsiriperekara'iana eta naplataneana. Tási'a, makuchuchujikapa namutu. Máeke'epuichinawakapaipa eta namesarana étapa eta nasiyana,

¹³tási'a máichawakapa: — Taka'e'i eta táechejiriruwa'i eta Takapika'ukene Ajureka: ‘Eta nupena takarichu táikuchi'i eta nayujarasirareya ena achaneana.’ Étisera eti tiámera'iana, ekasiapawapa eta te juka, emaeperajikapa eta takapika'uira'i.

¹⁴Eta mávi'aira'i te templo ema Jesús, napauchapa ena púchukiana énapa ena masariana tási'a, ema makanarakawakapaipa'i.

¹⁵Taka'e, ena amaperuana tipiararekana'i eta nakunachira'i ema, ánipa naka'e: “¡Pítikene'i yátupikenevi'i Cristo manerejiruvi'i ema Viya!”, énasera ena tuparairukana énapa ena escriwánuana waipa náurika'ini eta náimaira'i tamutu eta juka, tisemanapa

¹⁶Tási'a, náichapa ema Jesús: — ¿Pisama ena nani amaperuana tipiararerekana? Ema Jesús majikapawakapa: — Eta nusamararaka'ipa'i. Tási'asera ¿eti wá'ipuka échejiku'a eta Takapika'ukene Ajureka, eta táechejisi'aira'i eta juka najirasa'i ena nani amaperuana? Ani taka'e'i: ‘Eta najirasa ena amuyana, ena tiajikanacha'a, ena taepaniawa'i eta pijira'u.’

¹⁷Taka'e majunijimuri'awakapa, tiyanapa te awasarechicha Betania, étapa máimasine'i.

¹⁸Te yátikara'ichicha, tiyanawarepa ema Jesús taye'e eta awasare. Eta mapaisirapa'i, téku'apa ema.

¹⁹Máima'apa eta yukuki tikaijare higo te achenechakaya, tási'a tiyanapa mapaucha'i, tájina'isera tá'ina'ini, takarichu'i eta tapakajiana. Tási'a, máichapa ema Jesús eta higo: — ¡Pépiyainapa píti eta má'irikireviyare! Eta maka'era'i, énewanepa tiájiki'i.

²⁰Eta náimaira'i ena máimitureana, náramine'i, tási'a náyaserekapa ema Jesús: — ¿Tája'a táichararakawa'i eta higo, taija'úchirawa'i tiájiki'i?

²¹Ema Jesús majikapawakapa: — Nutupiruwa numetaka'e eti, te yátupina eta ekasiñawaira'i me Viya, tási'a wa'iware émaitukaima'i, wa'i takarichuima'i erata'ayare ícha, ekutinuya eta níchakene'i, erata'ayarewa ekayejeka eta mari te ichapeama une.

²²Tási'a tamutu jákani eyaseserepiyare eti, eta eyujarasirana, ekaijarakasiyare te yátupina eta ekasiñawaira'i me Viya.

²³Te taekenepa eta juka, ema Jesús tisiapapa eta te mapena ema Viya. Taka'e tímiturekawarepa ánaki, tási'a napauchapa ena tachutiri'ana ena tuparairukana, ena escriwánuana, énapa ena viyakara'ana naye'e ena juriyuana, tási'a nayaserekapa: — ¿Nája'asika tiwanekavi'i picha eta juka? ¿Nája'a tituparakavi'i picha eta juka píchakeneana'i?

²⁴Ema Jesús majikapawakapa: — Nuti apanaware nuyasereka'eyare: Apaesa numetaka'e eta nukatupara'aira'i eta níchira'i eta júkana.

²⁵¿Nája'apuka tiwaneka'i ema Juan, eta máikachasirisira'i, ema Viya, énapuka ena achaneana?

²⁶Taicha, wa'i taurika'ini vémuna'akawa'ini vicha: Émajiwaichucha eta máitesira'i, taicha vipika'i ena achaneana nasema, taicha namutu'i nasuapa'i ema Juan, eta émaira'i profeta.”

²⁷Tási'a, najikapapa ema Jesús: — Wa'i vecha. Taka'e, ema Jesús majikapawakapa: — Nuti apanaware, wá'iware numetaka'ema'i nája'apuka ema tijarakanu'i eta juka nutupara'a'i.

²⁸Ema Jesús mayaserekawakapa: — ¿Taja'a ekayema eti, eta jukana? Emana achane, narari'í ena apinana ena machichanaveana, taka'e maichapa ema émana: ‘Nuchicha, piyana puíti'ichu pikaematane Pírerekaya eta uwa.’

²⁹Ema machicha majikapapa: ‘¡Wa'i nuwara'a nuyana!’ Te tiyerepa, titsiwachapa eta mapanereru, tiyanapa.

³⁰Tási'a, ema naiya matupiruwarepa me apana machicha, maichawarepa mayana'ini ema apanaware. Ema majikapapa: ‘Tiuri, Tata, nuyanayare.’ Wá'isera mayana'ini.

³¹¿Nája'a ena apinakeneana, nasuapa'i ema naiya eta mawara'akene'i? — Ema mainapure — najikapapa ena. — Ema Jesús maichawakapa: — Nutupiruwa numetaka'e puiti. Nasapi'ayare tinapuikanaya tisiapana te mawasa ema Viya akenuka te anuma, ena tú'usiana énapa ena tive'ara'iana eta viyase'ana taye'e eta Roma.

³²Taicha ema Juan tikachasirikara'i titeka'i, timecha'eyare'i eta achene eyani'ayare'i, eti wa'isera esuapa'ini; ena-sera ena tive'ara'iana eta viyase'ana, enapa ena tú'usiana nasapi'a'i nasuapa'i.

³³“Esamanu eta juka nímikutichina'eyare: Matiari'i ema achane tikaye'e'i eta estancia, tikaewaru'i kamuri eta uwa te máesane, tási'a manaruaka'iware eta masukure. Máepiyakawarepa eta nakatikaresi'ayare eta tachi eta uwa, máepiyakaware eta torre, nápani'ayare eta najaneasirayare eta máewaru. Tási'a, máijarakapa ena achaneana, pártirariuanayare'i. Taicha tiyanayare'i ema achane te apana awasare.

³⁴Te títekapapa eta kaje taya'aira'i eta uwa, máimiwanerekapa ena mamusurana nayaseapanawakayare'i ena pátirarioana'i eta maye'eyare'i ema tikaye'e.

³⁵Énasera ena pátirarioana'i tisemauchawanaichucha: nakaratakapa, náe'apa ena nakajurureana, nakapakapa ema émana, ema apana natupisikawakapa te márija'iana.

³⁶Ema tikaye'e máimiwanerekawarepa ena apamuriana makajurureana, énasera ena pártirarioana'i, éneichu'iware takuti'i naichawaka'i ena nainapureanaini wanairukanaini.

³⁷“Taka'e, émajakaruwapa máewataka'i ema machicha, máimijachaine'i: ‘Émaina'ipukaini napikaucha'ini ema machicha.’

³⁸Te'esera te náima'apa ema machicha ema tikaye'e eta úwakiji, naka'emuripa: ‘Émainapapuka tikaye'eyare ema maka eta maima'akeneana ema maiya, yare vikapaka apaesa tánasipa viye'ena eta maye'eya'ini.’

³⁹Taka'e nakaratakapa, nakuchukapa taye'e eta úwakiji, tási'a nakapakapa.

⁴⁰“Tási'a puiti te maitekapapa ema tikaye'e eta úwakiji, ¿tája'apuka máicharakawakayare ena pártirarioana'i?”

⁴¹Ena najikapapa: — Waipa májapanuwakaima'i, makapakawakaya ena pártirarioana'i, máijarakainapa ena apamuriana pártirarioanayarewa, nákani tipikaura'iana'i eta maye'e.

⁴²Taka'e, ema Jesús máichawakapa: — ¿Tájina ímaiya'ini échejiku'a'ini eta takayemakene'i eta Takapika'ukene Ajureka? Ani naka'e'i: ‘Ena tépiyarekara'iana eta peti, tasapi'apa náepuru'i eta mari táikuchi'i tatumearayare eta taicha wa'i náimati'ini. Émasera ema Tata tepiyaka'i, ichape eta taramikarewa'i.’

⁴³Táichavene'i eta emasuapajiraiwa'i, eta mawanairipi ema Viya, ena tisuapajira'iana'i, ena tikawakureanayare te jena sácheyare. Énainapa téchanayare eta wanairipiana.

⁴⁴Ena nákani, testapaikawana te taina'u eta mari tevetutujikanayare, te etainapuka temirika eta mari te ina'u emajupaya.

⁴⁵Étasera eta nasamira'i ena tuparairukana énapa ena fariséuana, tisemanaine'i taicha tímatiakawanapa eta énaira'i tayunakawaka eta máimikutichirawaka'i ema Jesús.

⁴⁶Nawara'ainipa nakaratakayare'íni. Tási'a tipikakarakawana'isera, taicha ena achaneana nasuapa'i ema Jesús eta émaira'i profeta.