Read Ignaciano Mateo 22 Bible Online

Mateo 22 - Ignaciano bible

Mateo 22

¹Ema Jesús tepanawawarepa maechejikawaka'i ena eta máimikutichirawaka'i. Máichawakapa:

²“Ema Viakenu, makuti'i mákani rey te máimiparapechapa ema machicha, máichayare'i eta ichape piesta. Ene taka'e'i eta mawasa akenuka te anuma ema Viya.

³Mawanekapa ena mawanarana náichu'apanawaka ena machimaranaya, wá'isera náwara'a'ini nayana'ini ena.

⁴Tási'a, ema rey máewatakaware ena apamuriana mawanarana. Ánipa máichawaka: ‘Eyanaware étipawa ímitatajirikawaka ena níchu'akeneana'i, náitekawanepa. Nukaparekaipa'i eta waka nenirijiyare'i nésinaruana'i, tiúripa tamutu eta juka tinikakare. Énanecha nukuchapa'i náitekawanepa.’

⁵Énasera ena machimaranaya'i wa'i nasuapa'ini. Ema émana tiyanapa te máesane, ema apana máima'apanapa eta maye'e tienda,

⁶tási'a ena apamuriana nakaratakapa ena mawanarana ema rey tási'a, náe'awakapa, nakapakawakapa.

⁷Taka'e, te máechapa ema rey, tisemapa. Mawanekapa ena masuntaruana nakapapanawaka ena tikapa'iana'i, náijuchaware tamutu eta nawasaini.

⁸Tási'a, máichawakawarepa ena apamuriana makajurureana: ‘Tiúripa tamutu eta juka tinikakareana, wáipasera nuwara'a náiteka ena náinapureana'i nuchimaranayare'ini.

⁹Eyana te tamutu calleana, íchu'awakayare namutu nákani ekainunakeneanayare, enaina naiteka te nupiestaraya.’

¹⁰Taka'e, ena makajurureana tiyananapa, náche'upanewakapa, nakurujikawakapa namutu nákani nakainunakeneanapa'i, nákani achaneana tiúriana énapa ena maurira'ana. Kamuriana'i, tínikanaine'i eta te távi'ayare'i eta piesta.

¹¹“Taka'e, ema rey tisiapapa, máima'ayare'i ena machimarana'i. Máima'apa ema émana achane ema matiari'ikene'i wa'i manaka'ini eta namuiri'asa te tikaichu'asiana.

¹²Taka'e, máichapa: ‘Nairiare, ¿tája'a picharakawa eta pisiapira'i wa'i pikamuiri'a'ini eta tiurina muriare?’ Émasera ema achane wa'i majikapa'ini.

¹³Taka'e, ema rey mawanekawakapa ena mawanarana: ‘Eve'a ema maka, ítijiwaucha, ítiapechaware. Íyaraku'apana te timapiku taye'e eta máiyauchiawayare makapitikia'echiawayare.’

¹⁴Numetaka'e puiti kamuriana'i ena níchu'akeneanapaipa'i. Ánimurianaichusera ena kaneregiana, títaura'ianayare.”

¹⁵Taka'e, eta nasamira'i ena fariséuana, tisemanaine'i. Tiyananapa tikurujikakanapa, nawara'aipa náemejekapawachayare'i apaesa étaina'ipukaini taviucha'ini ema Jesús.

¹⁶Taka'e, nawanekapa ena pulítikuana'i, énapa ena machamuriana'i ema Aluresi. Te náitekapauchapa, ánipa naka'e: — Tata maestro, vímati'i eta tatupiruwaira'i eta pímiturapiana'i, tási'a piti pimitukawaka'i eta táurinakene achene tikaiju'e me Viya. Wa'i pipikakarakawa'ini eta péchejisi'aira'i eta náichawakenewa'i nákani achaneana, wa'iware pesacha'ini pisama'ini eta nakayemakeneana.

¹⁷Viwara'a'i viyaserekaviyare eta pipanereru'i: ¿Táurika'ipuka viwachacha eta viyase'ana maye'e ema akenuka emperador romano, wa'ipuka?

¹⁸Ema Jesús máimatiakawakapa eta tamauriwapa'i eta napanereruana, máichawakapa: — Apimirana, ¿tája'a takayema ewara'a ímiakipaikanu?

¹⁹Níma'aseji, iáminanu étapena eta reale eta ewachachirare eta eyase'ana. Naepanapa eta etape reales,

²⁰tási'a ema Jesús mayaserekawakapa: — ¿Nája'a tikaijare eta juka? ¿Nája'aware tikawasima'i eta juka mirare eta te juka reale?

²¹Najikapapa: — Maye'e ema akenuka emperador. Taka'e ema Jesús máichawakapa: — Puiti táurika'i íjaraka ema emperador eta maye'eichu'i ema emperarador, tási'a íjarakaware ema Viya, eta maye'eichu'iware ema Viya.

²²Te nasamapa eta majikapirawaka'i, náramipa, tási'a tiyananapa tichawana'i.

²³Étaichu te jena sache, naka'epaipa'i ena saduceoana, ena, apana'iware eta náimiturapiana'i. Wa'i nasuapa eta náechepusirayare eta nachanewa ena náepenakeneana, tiyananapa náima'apana'i ema Jesús. Natanuka'i eta táetseraruwayare'i náicha. Ánipa naka'e:

²⁴— Tata maestro, ema Moisés, maka'e'i te natiari'ipuka nákani, te máepenaekene'a'ipuka ema achane esu mayena, tási'a nájinaicha'apuka manakiekeneruwaina'ini machichaina'ini; te matiari'i'ipuka mákani maparape'i, mave'ayare esu machinenaekeneni, apaesa émainapuka makachicha eta suye'e, máitsiwaina'ini ema maparapeni.

²⁵Taka'e natiari'i ena siétekeneana tikaparapejirikakana. Te títauchawapa ema náechavimuri, máepenaekene'apasera esu mayena, nájina'i machichaina'ini, mave'apa ema mae'iruichu maparape.

²⁶Éneichuwaresera máepenaekene'aware ema mae'iruichu, nájinaware mákachicha'ini, tási'a ema namapananekene maparape, namutupa ena sietekeneana tikaparapejirikakana.

²⁷Te táekenepa, tépenapa esu esenaini.

²⁸Taka'e puiti, te apánapapuka náitaresirayare ena nani, ¿nája'apuka ena siétekeneana kaparapekakana, ema yátupikene'i ema suímakene'i esu esena, taicha ena siétekeneana namutu'i suímawaka'i esu?

²⁹Ema Jesús majikapawakapa: — ¡Tetavikawa eta éjekapirawa'i eti wa'i ímati'ini eta táimiturapi eta Ajureka, eta tamutuira'iware marata'a ema Viya!

³⁰Te apana náitaresiraya, waipa nákamunuima'i esu esena. Énaipa ena esenana wáipaware nákamunuima'i ema ajaira. Nakutinapa ena ángeleana tiávi'ana'i te anuma.

³¹Tayanapane naechepuka ena naepenakeneana'i, ¿wá'ipuka échejiku'a'ini eti, eta émaichu'i maka'e'i ema Viya:

³²‘Nútira maye'e Viya ema Abraham, ema Isaac émapa ema Jacobo’? ¡Ema Viya, ema técha'i eta náitaresirana ena té'ikana'i, tayanapane eta naépena'ini!

³³Eta nasamira'i ena achaneana eta maimiturapiana ema Jesús, ichapeine'i eta náramira'i.

³⁴Ena fariséuana tikurujikakanapa eta náimaira'i makamatinasirawaka'i ema Jesús ena saduceoana,

³⁵tási'a ema émana escriwáno, tiyanapa maemejekapawachayare'i eta maimiakipaisirayare'i, mayaserekapa:

³⁶— Tata maestro, ¿tája'apuka eta wanairipi tisuapakarepana'i, taye'e eta mawanairipiana?

³⁷Ema Jesús máichapa: — ‘Pémunaka ema Viya, pijaraka tamutu eta pisamure eta piachanewa, étapa eta pipanereruana.’

³⁸Eta juka tinapuka'i eta wanairipi, ichapepana tikapika'upana'i.

³⁹Jarari'iware eta táe'iru'i eta juka apana wanairipi, taka'e'i: ‘Pémunaka ema piparaepiya, tákuti eta pémunasirawa'i piti.’

⁴⁰Eta juka apinakene wanairipi, eta náe'ikakene'i eta náimiturapiana'i ena profetanaini.

⁴¹Tiurujikawanaicha'a ena fariséuana te machakaya ema Jesús,

⁴²Ema Jesús mayaserekawakapa: — ¿Tajapuka takayema eta epanereruana eti maye'e ema Cristo? ¿Naja'apuka tíkachicha, távi'apuka másine? Ena najikapapa: — Mámariekene ema rey David.

⁴³Taka'e maichawakapa ema Jesús: — ¿Taja'apuka takayema ema David, ema Machanewa Viya eta émaira'i tíjaraka'i eta maitukakene, émasera maicha'iware Tata nákenu? Taicha maka'e'i ema David:

⁴⁴‘Ema Tata Viákenu máichapa ema Tata Nákenu: Yare péjaka te nuwaure, eta pikuchapi'ayare, eta nukaepuyusiraya te pimira'u ena tikatianakaviana'i nunakayare te tapeku te piwape.’

⁴⁵Ema David, eta máimijarechira'i ema Cristo Tata Nákenu, ¿tája'apuka takayema eta machichaira'i?

⁴⁶Nájinapa náijarakawa'ini najikapa'ini. Eta taka'e, wáipasera napatsikawa'ini nápecha'ini nayasereka'ini.