Read Ignaciano Mateo 23 Bible Online

Mateo 23 - Ignaciano bible

Mateo 23

¹Taka'e, ema Jesús máichawakapa ena achaneana, enapa ena máimitureana:

²“Ena escriwánuana énapa ena fariséuana tímijachawana katupara'ana eta navepaisirayare'i eta mawanairipiana ema Moisés.

³Taka'e, esuapayare ena, ítauchayare eta nawanairipiana. Wá'isera ekue'ika eta naye'erepiana taicha ena apápipijichucha eta naimiturapiana.

⁴Tipamika'eana ítaucha eta kamurikeneana naye'erepiana, nájinapa tirata'aima'i títaucha, apanasika ena nawamira'u'i naitaucha, wa'iware nakaemuñawa'ini náesirujika.

⁵Tímijachawana'i tamutu naitaucha, nawaraira'i tikunachakareana naye'e ena achaneana. Nanaka'i te nana'uana eta Ajureka navejure'i eta te Takapika'ukene Ajureka. Takutikene eta nakamuiri'aira tísapepeakawana'i pínkanillana'i.

⁶Ewara'a'i ekaejakawayare'i te táurinakene téjasi'akareana, te peti naúrujisirarewana ena juriyuana. Étaipa te nanisirana, ekaejakawaware te távi'ana'i eta tiúrinisipanana tinikakareana,

⁷tási'a nawara'aware tikapika'uanayare'i eta náechejisiraya ena achaneana te calle, tási'a nawara'aware naichayare'i maestro.

⁸“Émanaichu'i ema yátupikene'i eye'e Maestro. Taicha ena apamuriana timikutijirikawa'ini eparapejirikaka'ini.

⁹Tási'a wá'iware ekuka'e Tata Nukaiyakene, nákani achaneana te juka apake'e, taicha marari'i ema yátupikene'i Ekaiyakene'i, ema tiávi'a'i te anuma.

¹⁰Wá'iware tísapakarema'i eta náimijarecha'e maestro, taicha ema Cristo makarichu'i yátupikene'i Maestro'i.

¹¹Nuwara'asera ítatijirikakayare. Nákani títatira'iana'i, ena tikunachakareanayare eta eye'e.

¹²Éneichuware nákani, timijachawana'i kapika'upana naye'e ena apamuriana, énayare apake'ereruanayare. Nákanisera kajapanurawana'i, énaya kanukechawanaya.

¹³“¡Páure'esami eti, escriwánuana, tási'a énapa ena fariséuona apimira'e'i!, eti érataka'i eta tapaja te anuma mawasa akenuka ema Viya, apaesa wa'i nakusiapa'ini ena apamuriana. Étina'ipukaini ítujikawa'ini esiapa'ini, wa'iware isapa'ini nasiapa'ini nákani tiwara'ana'i tichana.

¹⁴“¡Páure'esami eti, escriwánuana tási'a énapa ena fariséuana apimirana!, takutikene naverejikaware eta napenana ena tépenaimana. Tási'a tiúpiemanawa eta nayujarasira. Énasera tiápajukawanaya eta nakaikuñairaya.

¹⁵“¡Páure'esami eti, escriwánuana tási'a énapa ena fariséuona, apimirana!, murakayare eta íkuñayare. Eti, tétavikawa'i eta éñamawaira'i, eta íturuka ena té'ikana eta ímiturapiana, tasapi'a'i ímitukawaka'i eta nakuti'eraya eta ewínarajiwa'i. Tiápajukawa'i eta namauriwa'i ícha. Eta taka'e, ekachanewakayare ena te yuku te infierno.

¹⁶Páure'esami eti. Ichape eta íkuñayare, taicha eta ímiakipaisirawaka'i ena ekutikeneana púchukiana. Éjekapawa'i eta juka ímiturapi'i. Ímituka eta tájina'i taviuchaima'i nákani najuracha'i eta templo. Étasera te najuracha taye'e eta uru eta tiávi'a'i te templo, tikaviurewanainapa.

¹⁷¡Tétavikawa'i eta emaecharairewa eti púchukiana! ¿Taja'apuka tipikauchakarepana'i taye'e eta uru, étapuka eta templo?, echaichu'i eta tipikauchakrepana'i eta templo.

¹⁸Éneichuwa eka'e'i eti: ‘Te náichapuka nákani eta promesa, najurachapuka eta náijuchiraya eta sárareana, tájinaware tikaviuréma'i. Té'esera najuracha'i eta nanakiruwa'i te táina'u eta náijuchirare'i, étasera tikaviurewanainapa.’

¹⁹¡Púchukiana! Eta náijuchirare'i eta sárareana, étara tipikauchakarepana'i taye'e eta enakiruwana'i. Eta tímipikaucha'i eta enakiruwana'i.

²⁰Nákani tijurachana'i taye'e eta náijuchirare'i, wa'i tákarichu'ini napikauchayare eta, napikauchayare'iwa tamutu eta námawa'uana tiávi'ana'i te náijuchirare'i,

²¹takutikene nákani tijurachana'i taye'e eta templo, wa'i tákarichu'ini náicha'ini eta juramento taye'e eta templo, najuracha'iware maye'e ema Viya tiávi'a'i taye'e.

²²Énaipa ena tijurachana'i eta anuma, najuracha'iware maye'e ema Viya, taicha eta anuma eta'i eta máwasa, étaipa eta máejasi'a'i ema.

²³“¡Páure'esami eti, escriwánuana, tási'a énapa ena fariséuana, apimira'e'i!, eta epamisirawa'i ítaucha eta wanairipi me Viya, eta diésmuri taye'e eta sukurekana, tási'a enakikapa eta kapika'upana'i titukakareana wanairipiana. Étasera tinunayare'i ítaucha tamutu eta wanairipiana.

²⁴¡Eti puchúkiana, tajina ítukakenena, tasapi'a ítaucha'i eta taka'ekeneana'i, enákikapa eta takapika'ukene'i!

²⁵“¡Páure'esami eti, escriwánuana, tási'a énapa ena fariséuana apimira'e'i!, eti esipasikaichucha te aneka eta wasu, étapa eta platu, tichipeku'isera te taju'e, ene eka'e'i eti, eta esamureana, tétavikawa'i eta tachipejiwawaka'i taicha eta ekaetemaraiwana étapa eta íjarasirawa'i icha tamutu eta ejamuraraiwana.

²⁶¡Fariséuana puchuki'ewaka: tatiwa esipajuechayare eta wasu, tási'a pachinasarenapa te aneka!

²⁷“¡Páure'esami eti escriwánuana, tási'a étipa fariséuana, apimira'e'i!, eti ekuti'i eta naekari. Tiúrina'i te táina'u, té'esera te ama'e távi'a'i eta máeperajikeneana.

²⁸Ene eka'e'i eti: Tikutima'ine'i iúri'i te namira'u ena achaneana. Étasera te esamureana táurujisiawa'i eta ewínarajiwana, takutikene eta apimiraira'e'i.

²⁹“¡Páure'esami eti escriwánuana, tási'a étipa fariséuana, apimira'e'i!, eti epiyakana eta náekariana ena profetanaini, tási'a puiti ewara'a'i, eye'e'eaka'i eta náekariana ena matapirawakeneana'i,

³⁰tási'a, ániware eka'e: ‘Te vitiari'inaipa'ini viti, akane te tikaparekanapa ena viáchukanaveanaini, wa'i vikuimikasiapawa'ini eta naepenira'i ena profetanaini.’

³¹Étijiwapa ímereuchawa'i, eta étira'i namairiekeneana'i ena tikapakana'i ena profetanaini.

³²¡Ítauchapa, epiyaka eta nanakure'i ena iáchukanaveanaini!

³³“¡Eti ejaneana eta kichare! Tétavikawa'i eta ewínarajiwa'i ¡Wá'ikene tikaitika'éma'i eta íkuñaya te taijurekene yuku!

³⁴Eta taka'e nuti nuwanekayare ena profetana, titupaijiakawana, tási'a maestro-keneanaya. Énasera nakapakayarepa'i, émetatakayare te crusu. Tási'a, ena apamuriana éstakawakainapa te peti náurujisirarewa ena juriyuana. Tási'a napanajirikawakainapa te awasareana.

³⁵Taka'e étinapa tamuriakayare eta naviurewana'i namutu ena tikapakana'i ena matapirawareana'i, ema Abel, émapa ema Zacarías, machichaini'i ema Berequías, ema nakaparu'i te tamira'u eta mapena ema Viya.

³⁶Nutupiruwa numetaka'e, étinapa tamuriakayare tamutu eta ekuñarakiyare, eye'e eti achaneana etiari'ikeneana'i puiti.

³⁷“¡Jerusalén, Jerusalén, eti ekapakawaka'i ena profetana, tási'a eyukasikawaka'i te márija'iana ena maewataruana ema Viya, tiamana eta techakare! ¡Ichapemuri'ineni eta níchuira'e'i eti, iúrujiakanu'ini, tákuti'ini eta warayu te takurujimuri'a eta tachichanaveana te tapawase. Wá'isera áwara'a'ini!

³⁸Puiti imararaka eti eta epenana tamutuinapa tikakipaikasiyare.

³⁹Numetaka'ewane puiti waipa iápechawaima'i íma'anu, tiámainukawainapa te áka'epa: ‘¡Ichape eta vikunachiravi'i píti wanairukakenévi'i maye'e ema Tata Viakenu!’ ”