Read Ignaciano Mateo 24 Bible Online

Mateo 24 - Ignaciano bible

Mateo 24

¹Taka'e ema Jesús tiúchukapa te mapena ema Viya, tiyanayarepaini napauchapa ena máimitureana, tepanawanapa narami, naímecha'i eta táurinakeneana, eta mapena ema Viya.

²Ema Jesús máichawakapa: — ¿Íma'a'i eti tamutu eta jukana? Nutupiruwa numetaka'e, wa'i tanasima'i eta íma'akene'i puiti, tikakipaikasiyare tamutu eta juka.

³Tási'a tiyananapa te simena tikaijare Ulivukiji. Ema Jesús téjakapa, tási'a nakachakayapa ena maimitureana nayaserekapa mákarichu: — Viwara'a pimetaka'avi, tájamu'upuka eta náimiakipaisirayare eta mapena ema Viya. ¿Jarari'iyarepuka eta ekutiarareyare te táne'ipa eta táitauchirawayare eta apana péchejisi'akeneana'i?

⁴Ema Jesús majikapapa: — Ekuneuchawa, apaesa nakuija nakuwayuaka'e.

⁵Taicha nárajapayare ena tépiyakawanayarepa'i tímiwasichawana nuye'e. Naka'enapa: ‘Nútipa ema Cristo’, nasapi'a nawayuakayare ena kamuriana achaneana.

⁶Te échapa eti eta techakareyare táe'akakairayare eta ichapekeneana awasareana. Tikanarajirikakanaya eta awasareana, tikauyayakarenapa guierraina eye'e eti. Wá'isera ekuarameka eta esamairisiraya, eta ekutiarareanayare wícha'asera étaima'i eta táichekuiraina.

⁷Taicha eta awasareana te'ajirikakawakainapa etajikaka; éneichuware tatiari'iyarewa eta ichape eku'amu'uya te awasareana. Éneichuwa tiyamuripaikaya eta apake'e.

⁸Tamutu eta juka tapaenumawa táepanirawayare eta nátajiwanayare ena achaneana.

⁹“Taka'e, tikarataka'eanainapa eti, tipanajika'eanainapa, tási'a tikapaka'eanainapa, tási'a namutuya ena achaneana tikatianaka'eanayare táichavene'i eta é'isiranu'i.

¹⁰Narari'iya ena tínajikawanayare eta náe'isiranu'i. Tási'a, tikatianaka'eanainapa eti yátupikene eta é'isiranuya.

¹¹Natiari'inawarepa nákani tépiyakawanayare profetana, tási'a kamurianayare ena achaneana nawayuaruanayare.

¹²Jarari'iyare eta tamaurikeneana, ena achaneana waipa tipikauchakakanaima'i.

¹³Énasera mákani tikamichaya te táitawapa tamutu, tiuchuku'ayare.

¹⁴Tási'a eta juka tiúrina techakare, tikámetakasiyare tamutu awasareana, apaesa naimati namutu ena tiavi'ana'i te apake'e, te taekenepa eta juka titekapainapa eta taitaviraya eta apake'e.

¹⁵“Ema profeta Daniel majucha'i eta taichararakawayare'i eta sacheana táiñe'ikeneyare. Te íma'apa eti ema achane wínarajikene taye'e eta takapika'ukene eta santukene'i, — ena techejiku'ana eta juka nákaikutiara, —

¹⁶tási'a nákani tachimararuyare te Judea, najuna te simena,

¹⁷mákani tiávi'a'i te maye'e canchón te mapena, waipa makuchawaikene'awa maepana eta mayereruwana maeñamakeneana.

¹⁸Tási'a mákani tachimararuyare te wáma'i, waipa makuchawaikeke'awa maepana eta mamuiri'a.

¹⁹¡Páureanasami nákani esenana tachimararuanayare, nákani tikajariana'ipuka, nákani esenana tikachichana'i eta amuya tiájikacha'a!

²⁰Eyaseaka eti ema Viya takuija táichejika'e, wá'iware takuchimaraka'e eta tíkasaremu'u, te'epa sawarumu'u eta ejunairayare,

²¹taicha tétavikawayare eta nakatajiwairayare. Tájina tákutima'i eta táiñe'iwayare eta nakatajiwairayare, te táepanirawa'i eta náitaresira'i ena achaneana te juka apake'e. Te táekenenapa eta tíñe'iyare, tájinainapa tákutima'i.

²²Tási'a ema Viya te wa'i makukaechepaikawane eta ekuñaraki, nakuija nakuitareka'ini, námutu'ini tepenarakana, eta sera, eta maemunasira'avi'i ema, makaechepaikawane'i eta tiñe'ikare, taicha viti manerejiruana'i.

²³“Eta taka'e, natiari'inapa ena tiwayuara'iana tépiyakawanayare ema Cristo, tímiwasichawanainapa: ‘Íma'a makaipa ema Cristo’, ‘Íma'a titekapaipa.’ Wá'isera ekusuapa.

²⁴Taicha titekapanaya ena tímikutichawanayare profetana, tási'a tímikutichawanayarewa ema Cristo. Naichaya eta ichapeana tiáramikareana, tási'a étapa eta ekutiarareanayare. Kamurianayaré ena nawayuaruanayare, enaipa ena manerejiruana'i ema Viya, nawayuakayarewa.

²⁵Nutisera. Numetaka'ewane eti apaesa échaipa.

²⁶Te náicha'epuka: ‘Íma'a máena'i ema Cristo ánaki te máwapa'i apake'e’, wa'i ekuyana, étaipa te náicha'epuka: ‘Íma'a, ani mayumurusiawa'i’, wá'iwasera ekusuapawaka.

²⁷Taicha takutiyare eta térameka, eta maítesirayare ema Machicha ema Ajaira.

²⁸Te, jákani taurujisiawa'i eta sipukiana, eta tavi'a'i eta taniru taepenakene.

²⁹“Te táitawapa eta juka sacheana, eta vikatajiwairaya, téma'ainapa eta sache, eta kaje waipa timikaucha'avima'i eta tajaraiwa, eta jarairikiana témirikanainawarepa. Étaipa eta tiávi'ana'i te anuma vima'akeneana'i, éneichuware tiyamurikanainapa, tiyejejekawanainapa.

³⁰Taka'e, tikaecherainapa te anuma eta ekutiarareya, maye'e ema Machicha ema Ajaira, tási'a tíya'anainapa eta napisira namutu ena achaneana táwakuana'i eta awasareana te apake'e, tási'a, naíma'ainapa ema Machicha ema ajaira, támainapaipa eta úkajiana taye'e eta anuma, tétavikawayare eta majaraiwayarepa'i.

³¹Tási'a ema, mawanekainapa ena maye'eana ángeleana, murakayare eta nakachujairayarepa'i, apaesa nakurujika ena manerejiruana'i, tiási'anayare te apachakaya te jákani návi'a'i te anuma.

³²“Ákarawa'u eta nímiturapiana, nímikutichina'e eta yukukiana: Táitsiwachirawa'i eta tapakajiana, te íma'apa eta tapakajianaya arairu, tímatikare'i tiáne'ipa eta únemu'uirayare.

³³Ene taka'eya, te íma'apa eta juka, échainapa ema Machicha ema Ajaira, táne'irainapa eta machavirayare.

³⁴Numetaka'ewane, tamutu eta jukana téchakareana'i, naima'ayarecha'a ena achaneana naitareruana'i puiti juka sacheana.

³⁵Títawayare eta anuma étapa eta apake'e, étasera eta nechejiriruwa titauchawayare, wa'i tianuku'aima'i.

³⁶“Eta juka tiáramikareyarechucha, nájina téchaima'i tájamu'uyarepuka eta táitauchirawayare, énaipa ena ángeleana wa'i náecha'ini, nútiwanereka'ipukaini nécha'ini. Makarichu ema Tata, ema técha'i.

³⁷“Takutiyare eta akane eta náija'uchirawa'i tépenana ena achaneana machamurianaini ema Noé, enetaka'eyare eta machavirayare ema machicha ema achane.

³⁸Jena sacheana'i, tamira'upaicha'a eta taerisirayare'i eta apake'e, ena achaneana, tinikanainecha, téranainecha, náematane, tási'a tímarerekanaware ena nachichanaveana, wa'i naeñamawa'ini eta náimaira'i ema Noé eta masiapira'i taye'e eta ichapekene pakure.

³⁹Tájina wa'i natsekawa'ini eta táitekapauchirayare'i eta ichape une. Taka'e, eta táemirisirapa eta ichapekene tikiwa, teririjikanapa namutu ena, ene taka'eyare eta machavirayare ema machicha ema achane.

⁴⁰Te jena sacheanayare, natiari'iyare ena apinana ajairana tikaemataneana'i te isaniti, ema émana tiáramikareyare tiára. Ema apana manasinapa.

⁴¹Te apinana'ipuka ena esenana tiyuwarekana'ipuka. Éneichuware esu esuna tiáramikareya tiára, esu apana sunasinapa.

⁴²“Eta taka'e, etsekawa'i ekuneuchawa eti, taicha wa'i echa taja'apuka sachewayare titekapayare ema Tata Viakenu.

⁴³Taka'e échayare, mákaini achane tikapena eta peti, maecha'ini, taja'apuka urayare eta yati máitekapirayare ema tiamera'i, tikuneuchawaipa'ini ema, wáipasare nakuameyecha'ini.

⁴⁴Eta taka'e, eti ekuneuchawayare, taicha wa'i écha'ini tájamu'uyarepuka eta machavirayare ema machicha ema achane.

⁴⁵“¿Makañári'ipuka ema makajurure máetaviucha'i eta mauriwa, tisuapajira'iware, ema makenu matuparaka'i ena tiavi'ana'i te mapena eta máijarasiraya eta nanikakene tamutu sacheana?

⁴⁶Tétavikawa eta máurikakarewaya ema maka tikatupara'a'i, te tamutu'i máitaucha'i jákani machimapirana ema mákenu.

⁴⁷Nutupiruwa numetaka'e, eta tamutuira'i tiuri eta machimapira'i, matuparakainapa ema téchayare'i tamutu eta máima'akeneana.

⁴⁸Té'esera wá'ipuka tiuri eta mapanereru ema mákani makajurure, máimijachaichucha tiyereyare'i eta máitekapirayare'i ema mákenu

⁴⁹taka'e, tepanawapapuka mae'awaka ena apamuriana makajurureana, tási'a makachanemuripa ena nakawa'akeneana terara'iana, tási'a, ténirikapa

⁵⁰jena sache waipa manekapauchawa'ini te títekapapa ema mákenu. Machimarakapa ema maeja'aru eta mamapachichijisira'i eta máima'akeneana

⁵¹Eta taka'e, ema mákenu makawanairipinapa náestakayare muraka nakutiyare ena apimirana eta nakatajiwaira, nájina nájapanuima'i, tayanapane máiya'ainepuka, eta maeñamirawayare.