Read Ignaciano Mateo 26 Bible Online

Mateo 26 - Ignaciano bible

Mateo 26

¹Te títapirikapa eta juka máimiturapiana'i ema Jesús, máichawakapa ena máimitureana:

²— Échaichu'i eti, eta apinaine sache eta piesta tikaijare Pascua, tási'a, ema Machicha ema Ajaira, nakaratakainapa naémetatakainapa te crusu.

³Te jena sacheana'i, tiurujikawanapa ena tachutiri'ana naye'e ena tiyujarakara'iana, énapa ena viyakara'ana naye'e ena juriyuana, te maye'e palacio ema Caifás, ema nákenumuri ena tiyujarakara'iana.

⁴Taka'e, náechejisi'aipa eta nakaratasirayare'i ema Jesús. Nawara'a'i nawayuakayare'i eta nakaratasira, tási'a étapa eta nakapasirayare'i.

⁵Enasera naka'e'i: — Wicha'a vikukarataka ema achichu eta juka piéstairaya, machu tája'apuka náicharaka'avi ena achaneana.

⁶Ema Jesús mavine'i te Betania, te mapena ema tikaijare Simón, ema karachacha'aini'i,

⁷suka'epaipa'i esu esena suámapa'i eta perfume te butella'ichicha, tikaijare nardo, táetaviucha'i eta tasiwachawa'i. Ema Jesús mavine'i te mesa, esu supauchapa ema Jesús. Suépusasikapa eta táijiyeamakene perfume te máchuti.

⁸Ena máimitureana, eta náimaira'i tépanawanapa tisemana'i, naka'epa: — ¿Tája'a takayema suémepurureka eta juka?

⁹Taurika'i vijarareka'ini eta juka perfume táijiyeamakene'i. Vive'a'ini eta kamurikene plata; vímikatasi'a'ini ena páureana.

¹⁰Ema Jesús masamapa, tási'a maichawakapa: — ¿Taja'a takayema ekaeka'i eti esu suka? Tétavikawa'i eta táuriwa eta suíchiranu'i.

¹¹Ena páureana, tamutuchucha sacheana eta ekachanerawakayare ena ímikataka te jákani ekaima'akenerana, nútisera wa'i nánasikenema'i eta eye'e.

¹²Eta suichakene'i esu suka esena, suépusa'asiranu'i eta perfume, sukainapuka'i esu eta suíjiyechira'i eta náke'e taye'eyare'i eta nukaekarasirayare.

¹³Nutupiruwa numetaka'e, nákani tikametarairuanayare eta tiurinakene echéjirirukawa, náechejisi'ayare eta juka suíchakene'i esu suka esena, témechanayare tamutu awasareana te juka apake'e.

¹⁴Émaichu'i ema nachamuri'i ena dósekeneana'i máimitureana ema Jesús, ema naimijarechakene'i Iscariote, tiyanapa maima'apanawaka'i ena tachutiri'ana naye'e ena tiyujarakara'iana.

¹⁵Tási'a máichawakapa: — ¿Áyanayarepuka ewachachanuyare eta nímechira'eyare ema Jesús? Ena náijarakapa eta treintape eta reale eta plata.

¹⁶Tási'a ema Júlasi, matanukapa eta maichararakayare'i eta máijararesirayare'i ema Jesús.

¹⁷Títekapapa eta sache táepanirawa'i eta tapiestara, eta nanisiraya eta pan maye'ere lewadura, ena máimitureana nakachakayapa ema Jesús, tási'a nayaserekapa: — ¿Távi'apuka piwara'a'i vétupirisi'ayare eta vinisirayare eta uvesachicha te Pascua?

¹⁸Ema májikapawakapa: — Eyana te awasare, te mapena ema nímatikasare, tási'a íchayare: ‘Ema Maestro maka'e'i: Eta nuye'e ura tiáne'ipa, tási'a nítekayare te pipena eta nunisi'ayare te Pascua, nukachaneyare ena nímitureana.’

¹⁹Ena máimitureana, étapaichu'i náicha'i eta mawanairipiana'i ema Jesús, náetupirikapa eta naniruyare taye'e eta Pascua.

²⁰Te yátipa, matiari'ipa'i ema Jesús te mesa, makachanewakapa'i ena dósekeneana máimitureana,

²¹tási'a eta nanisirawakaipa'i máichawakapa: — Nutupiruwa numetaka'e, marari'i ani te etaraku ema tíjararekanuyare.

²²Ena ichapeine'i eta nakatisamurewaira'i, tási'a tepanawanapa tiyaserejirijikakanapa: — Tata, ¿nútichupuka jákani?

²³Ema Jesús majikapawakapa: — Mákani tétamuka'i eta pan te juka nukuruja, émara ema tíjararekanuyare.

²⁴Ema Machicha ema Ajaira, títauchawayare'i maye'e eta táechejiriruwa'i eta Ajureka, ¡páuresamisera ema tíjararekanuyare! Tiúripanaichu'ini wa'i makuchuka'ini te suju'e esu máena.

²⁵Taka'e ema Júlasi, ema tíjararekayare'i mayaserekapa: — Tata Maestro, ¿nútichupuka jákani? — Petupika'i eta pika'era'i — májikapapa ema Jesús.

²⁶Taka'e eta nanisira'i, ema Jesús mave'apa te mawa'uana eta pan, tási'a ma'asulupayachapa ema Viya, mayuvetukapa, maíjarakawakapa ena máimitureana, máichawakapa: — Éraya, tási'a enikaya, eta juka eta náke'e.

²⁷Taka'e, mave'awarepa eta wasu náerirare, ma'asulupayachawarepa ema Viya. Tási'a, máijarakawarepa ena, maka'epa: — Eraya emutu eti, eta juka wasu,

²⁸taicha eta juka eta nítine, eta máitauchiraya eta vitratune, eta juka nítine taepusairuwa'i naye'e ena nasimutuwana, eta makatiuchiraya eta napekaturana.

²⁹Numetaka'e: Waipa nápechawaima'i néra'iwareni eta juka, tachi eta uwa, tiámainukawa te táitauchawapa eta nusiapiraya, te mawasa ema Viya akenuka te anuma, níjaraka'eya vérainapa eta aramaruama.

³⁰Te taekenepa, eta najiraira'i eta jirasare, tiyananapa te simena eta tikaijare Ulivukiji.

³¹Tási'a ema Jesús máichawakapa: — Emutu eti ejunijikanuyare puiti yati. Taicha taka'e'i eta taechejiriruwa eta Ajureka: ‘Nísapayare nakarataka ema Pastor eta nakapasirayare, tási'a téjanerepaikainapa eta uvesana.’

³²Té'esera te néchepukapa te nékari, napechawainapa nukurujika'e te Galilea.

³³Ema Pedro májikapapa: — Tayanapane najunijikavi ena apamuriana, nútisera wa'i nujunijikavima'i.

³⁴Ema Jesús máichapa: — Nutupiruwa numetakavi: Puiti juka yati, te tamira'upaicha'a eta táechejisirayare eta warayu, mapa'eyare eta péñauchirawayare.

³⁵Ema Pedro maká'ekenecha: — Tayanapane pímikapakanu, wá'ikenesera néñauchavima'i. Tási'a namutupa ena máimitureana étaichuware naka'e'i eta naéchejiriruwa'i.

³⁶Taka'e tíyanapa ema Jesús, mamamuri'apa ena máimitureana te tikaijare Getsemaní, tási'a máichawakapa: — Éjakaicha'a eta ani te juka, nuti nuyanayare ánakipa nuyujarakayare.

³⁷Tási'a mámapa ema Pedro, énapa ena apinana machichanaveana ema Zebedeo, tási'a tépanawapa eta máeñamirawa'i, tikatisamurewapa.

³⁸Máichawakapa: — Tétavikawa eta táeñamirawa muraka eta nusamure. Tawara'a tikapakanu. Áka'echa'a ani te juka, wá'isera ekuimaka, ekuneuchanu'i.

³⁹Tipaipanapa ánakipanachicha'i. Máetipaisinapa eta mamira te apake'e eta mayujarasira'i, ánipa maka'e: “Tata Nukaiyakene, tájina takuemaituka, pikatajikanusera pikatiuchanu eta juka nichararakawaya, wá'isera takuitauchawa eta nuwara'akene nuti, étasera eta piwara'akene piti, eta taitauchawa.”

⁴⁰Tási'a, tichawapa eta te návi'a'i ena máimitureana. Máima'aine'i ena, tímakanaichucha. Máichapa ema Pedro: — ¿Wáipaine'i pímikatakanu'ini pijaneakanu'ini étanaina'ipukaini ura páka'e'ini?

⁴¹Éjamiuchawa, eyujarauchawa apaesa eyaseaka ema Viya eta etumewaina wa'i makuituruka'e ema Wínaraji. Yátupi'ineni eta iáchanewana tarata'a'i tikaratakawa, étasera eta eche, wa'i tarata'aima'i tikaratakawa.

⁴²Tási'a, tiápechawawarepa tiyanawarepa ema Jesús api'epa eta mayujarasira'i ánipa maka'e: “Tátachicha Nukaiyakene, te wá'ikenenaicha takuetavikawa eta juka níchawakenewayare. Tási'asera, níjarakawa núti eta nítauchiraya eta piwara'akene'i.”

⁴³Tási'a, tichawawanepa te návi'a'i ena máimitureana. Máima'awarepa tímakanaipaware, taicha muraka'i eta náechapune.

⁴⁴Taka'e, mapa'ekenepa tichawa'i tiyujarapana. Étaichu'i eta máechejiriruwana'i.

⁴⁵Taka'e te tichawapa, te návi'a'i ena maimitureana, tási'a maéchejikawakapa: — ¿Iápechawaipawa ímaka wícha'apuka enara'akakenéna'ini? Taratapa Jé'esare, puiti títekapapa eta nutupara'a'i nakaratasiranuya ena tikatianakanuana'i ena tikapekaturara'iana.

⁴⁶Échepuka, viyanapa, marajapa ema tíjararekanuyare.

⁴⁷Téchejirikawaicha'a ema Jesús, maka'epainecha ema Júlasi, nachamuri ena ducekeneana maimitureana, mámamuri'apaipa ena kamurikeneana suntaruana, tikaepuchirikianapa'i, étapa eta naye'eana espada. Ena, wanairukana'i naye'e ena akenukara'ana'i enapa ena escriwánuana tachutiri'ana naye'e ena naiyakarana.

⁴⁸Ema Júlasi, tatiari'i'i eta máikutiarayare'i eta náimatirayare'i ena suntaruana ema Jesús. Ani maka'e'i eta máechejiriruwa'i ema Júlasi: “Ekunenuyare, ema nétserareruyare, ema ekaratakaya.”

⁴⁹Taka'e, ema Júlasi makachakayapa ema Jesús, máichapa: — ¡Tata Maestro! Tási'a maetserarekapa.

⁵⁰Ema Jesús majikapapa: — Najiriare, pichawanepa eta pipanereru'i. Tási'a, ena suntaruana enewanepa nakarataka'i, naératakapa.

⁵¹Taka'e ema émana nachamuri, eta máimaira nakaratasira'i ema Jesús, mave'apa eta maye'e espada makijikapa eta machaka ema makajurure ema nákenumuri ena tiyujarakara'iana.

⁵²Tási'asera ema Jesús makatiuchaichucha, ánipa maicha: — Piunaka te tatumaramu'i eta piye'e espada. Taicha namutu nákani tikaparekana'i taye'e eta espada, énerichuware naka'eyare, espada eta tikapakayare.

⁵³¿Wá'ipuka pecha, te náwara'a'ini nuti nuyaseaka'ini ema Tata, puítinaichu'ini makukupaika'ini ena dósekeneana ejército ena ángeleana?

⁵⁴Wá'isera nuwara'a nuyaseaka, tatuparaka'i títauchawayare'i eta táechejiriruwana'i eta Takapika'ukene Ajureka, eta níchawakenewayare'i.

⁵⁵Te jena ura'i ema Jesús máichawakapa ena achaneana: — ¿Tája'a takayema ekasiña eta espada, ekaepuchirikiwaka, eta ekaratasiranu, tímikutijirikawapa námera'i'ini? Étayapasika kape juka tamutu sácheana nukachane'e'i nímituka'e'i te mapena ema Viya, wá'iware epatsikawa'ini ekaratakanu'ini.

⁵⁶Tamutu eta juka títauchawayare'i, taicha taka'e'i eta náechejiriruwa'i ena profetanaini, taye'e eta Takapika'ukene Ajureka táechejisi'airanu'i. Taka'e, ena máimitureana namutu tijunarakanapa, nanakikapa ema Jesús.

⁵⁷Ena tikaratakana'i ema Jesús námapa te mapena ema Caifás, ema nákenumuri ena tiyujarakara'iana énapa ena escriwánuana énapa ena náiyakarana tiurujikawana'i.

⁵⁸Ema Pedro, máe'iekene'apa'i ena, mayere'ipa'isera. Te tisiapapa, tisiapawarepa ema te taju'e eta canchón te mapena ema tachutiri'a tiyujarakara'i, tási'a téjakaipa'i makachanewakaipa'i ena suntaruana taye'e eta templo, mawaraira'i máima'ayare'i tája'apuka eta náicharakayare'i.

⁵⁹Ena tachutiri'ana tiyujarakara'iana, énapa ena Akenukara'ana, natanukaipa'i eta maviureyare'i eta matapirawayare'i ema Jesús,

⁶⁰wá'isera náichimawa'ini, kamuriana'ineni ena tépiyaekene'ana'i. Tisiapananechasera ena apinana tépiyaekene'anayare'i,

⁶¹ánipa naka'e: — Ema maka achane maka'e'i: ‘Nuti nurata'a nákipaika eta templo maye'e ema Viya. Tási'a, nimichawayare'i nukaechepuka te mapanakenenapa sache.’

⁶²Taka'e, ema tachutiri'a tiyujarakara'i téchepukapa tási'a mayaserekapa ema Jesús: — ¿Tája'a takayema wa'i pijikapawaka? ¿Yátupipuka eta nakayemakene'i?

⁶³Émasera ema Jesús timatinaichucha. Ema tachutiri'a ema tiyujarakara'i máichapa: — Pátupiruwa pimetaka'avi te yátupi'ipuka pítikene'i ema Cristo, Machichakenevi'i ema Viya.

⁶⁴Ema Jesús majikapapa: — Petupika'i eta píchira'i, tási'a nuti eneichuware, numetaka'eyare eti, eta íma'ayare ema Machicha ema Ajaira eta maéjasirayare te mawaure ema Máitupajijiaruwakene'i, tási'a eta maúkupaisirayare mási'ayare te anuma, támirayarepa'i eta úkajiana.

⁶⁵Taka'e, ema tachutiri'a tiyujarakara'i eta masamairisira'i, ichapeine'i eta masemira'i, tivetsayujiakawapa eta mamuiri'a eta masemanewa'i, tási'a maka'epa: — ¡Tétavikawaipa eta maviurewa'i ema maka achane, taicha makaeka'i'i ema Viya! ¡Puiti émakenepa visama'i ema eta tépiyakawa'i Machicha ema Viya! ¿Wáipa tákamesa vitanuka'ini apana naimereucha'ini? Puiti esamaipa eti eta juka makayemakene'i,

⁶⁶¿tája'a ekayema? Ena najikapapa: — Tikaviurewa'i, tási'a étainapa táimikapaka.

⁶⁷Taka'e ena nátutukichapa te mamira, tási'a naepuchirikawarepa. Ena apamuriana náe'amira'apa te mamira,

⁶⁸tási'a naichapa: — Víma'ayare, te yátupi'ipuka píti'i Cristo, ¡te pijarauki'ipuka pímatiyare nája'a'ipuka ema té'avi'i!

⁶⁹Ema Pedro, matiari'icha'a'i eta te canchón, téjaka'i. Taka'e, suka'epaipa'i esu nawanara temeña'awapa tási'a suíchapa: — Németeaka píti'ichu ñímiture eñi Jesús, eñi tikawasa'i te Galilea.

⁷⁰Émasera ema Pedro teñauchawapa te namira'u ena natiari'ikeneana'i, maka'epa: — Wa'i necha eta péchejisi'akene'i.

⁷¹Tási'a, tiúchukayarepa'i, suíma'aware esu apana wanaraka, suíchawakapa ena natiari'ikeneana'i: — Eñi ñika achane éñi'ichu nachamuri eñi Jesús Nazareno.

⁷²Tiápechawawarepa ema Pedro téñauchawa, ánipa maka'e: — ¡Nujuracha te emira'u. Wá'ikene nímati ema achane píchakene'i!

⁷³Te tiyerere'achichapa, ena natiari'ikeneana'i taye'e napauchapa ema Pedro tási'a náichawarepa: — Píti'ichu machamurivi ema Jesús, eta péchejisira, tímatikare'i.

⁷⁴Taka'e ema tépanawapa majuracha'i, tási'a tiapechawawa majuracha'i, maka'epa: — ¡Wá'ikenesera nímati ema achane! Tási'a, énewanepa téchejika'i eta warayu,

⁷⁵tási'a ema Pedro máechapa eta máichira'i ema Jesús: “Te tamira'uinapaicha'a eta táechejisirayare eta warayu, píti mapa'eyare eta péñauchiranuya.” Taka'e tiuchukapa ema Pedro tíya'apa eta makatisamurewa'i.