Read Ignaciano Mateo 28 Bible Online

Mateo 28 - Ignaciano bible

Mateo 28

¹Te apanapa sache te tijarara'ichichapa eta lumínkukene'i, tiyanapa esu María Magdalena, sukachane'i esu apana María, náima'apanayare'i eta ekari.

²Tíja'uchawapa tiyayakare'i eta apake'e. Taicha eta máukupaisira'i ema ángele te anuma, tási'a makachakayapa eta ekari, makaerajikapa eta mari taji'aini'i eta máekari. Taka'e, máeja'amekapa eta.

³Tétavikawa'i eta majaraiwa'i ema ángele, eta mamuiri'a, tétavikawa'i eta tajapuwa'i.

⁴Eta náimaira'i ena suntaruana, tiyayakareanapa eta napisira'i, tiáne'ini tépenarakana.

⁵Ema ángele máichawakapa ena esenana: — Wa'i ekupikanu. Nuti nécha'i eta etánusirapa'i ema Jesús, ema makaetatakenéni'i.

⁶Májinaipa'i ani, téchepukaipa'i te máekari, échawaichu'i eta makayemakeneana'i. Yare, íma'a eta juka mávineni'i.

⁷Eyana púitinaichu, tási'a emétakawaka ena máimitureana: ‘Eta máechepusiraipa'i te máekari, tási'a tiyanayare te Galilea, ánaki makuchapia'eyare ema.’ Eta tímitekanu'i nuti numetapana'eyare'i.

⁸Ena esenana najúnijikapa eta máekari, tiyananapa tijunapanapaipa'i eta namétasirayare'i ena máimitureana. Tipikana'i, tási'asera takachanepa'i eta náurisamurewapa'i.

⁹Eta najunapirapa'i, tíja'uchawapa tímerekawa ema Jesús eta naye'e. Máechejikawakapa. Témeña'awanapa ena eta maye'e. Tépuyukanapa natsiukapewachapa,

¹⁰ema máichawakapa: — Wa'i ekupikanu. Eyana emétapanawaka ena apamuriana echamuriana nímitureana'i. Eyanayare emutu te Galilea. Ánaki nukuchapia'eyare

¹¹Eta najunapirapa'i ena esenana, ena suntaruana tijanearekanaini'i tiyananapa esenana, nametapanawakayare'i ena tuparairukana tamutu eta náima'akeneana'i.

¹²Taka'e, tikurujikakanapa namutu ena akenukara'ana, nawaraira'i téchejirikawana napanerechayare eta náicharakawayare'i. Jé'esare, nawachachawakapa eta kamurikene plata ena suntaruana,

¹³Tási'a, náimitukawakapa, ánipa náicha: — Te natiari'inapuka nayasereka'e, eka'eyare, tiyanana'i ena máimitureana ema Jesús te yátimu'u; námechapana'i eta máke'e. Tikamapurawana'i eta vímasira'i víti.

¹⁴Émaipa ema akenuka te máechapuka, víma'ainepa víti. Vitanukayare eta viwayuarasirayare, apaesa takuija eviurewaina eti.

¹⁵Taka'e, ena suntaruana najakapapa eta plata nawacha'i, tiyananapa náechejisi'apa'i eta naimitukasiwa'i. Puíticha, ena israelítana, tanasirichu'i taka'e'i eta nametarapi, te natiari'i ena tiyaserekana.

¹⁶Ene taska'e'i eta nayanira'i ena úncekeneana maimitureana taye'e eta Galilea te mari taicha taka'e'i eta mametarapi'i ema Jesús.

¹⁷Taka'e, te naíma'apa ema Jesús, tépuyumuri'anapa namutu natsiukapa. Natiari'isera ena wicha'a nasuapapajika'ini.

¹⁸Ema Jesús témeña'awapa naye'e ena, tási'a máichawakapa: — Ema Viya tijarakanu'i eta tuparairukanuya'i taye'e eta anuma, tási'a étapa eta apake'e.

¹⁹Eyanayare puiti, epaikayare tamutu eta awasareana. Tási'a ímitukayare ena achaneana, nuchaneranaina ena apanaware, íkachasikawakaya te máijare ema Tata, ema Machicha, tási'a émapa ema Machanewa Viya,

²⁰tási'a ímitukayarewa eta nasuapiraina, tamutu eta nímiturapiana'i eta eye'e, nuti nukune'eyare tamutu sacheana, tási'a te'epa eta taichekuinepa eta apake'e.