Read Ignaciano Mateo 3 Bible Online

Mateo 3 - Ignaciano bible

Mateo 3

¹Taka'e, timerekawapa ema Juan Tikachasirikara'i, ánaki te mawapa'i wama'i te Judea.

²Ánipa maka'e “¡Ítsiwacha eta epanereruana, éñauchawa maye'e ema Viya, taicha tiane'ipa eta mawasa ema Viya akenukaya te anuma!”

³Ema Juan, ema'i ema maechejisi'akene'i ema Viya, maichakene'i ema profeta Isaías: “Matiari'i ema émana tipiaraka te mawapa'ikene wama'i: ‘Etserereaka eta mache'u ema Viya, petupinacha eta achene.’ ”

⁴Eta mamuiri'a ema Juan itsameruka'i eta tajiya'a eta camello, eta máitiju'e, wákapi jayumepi; eta manikasareana'i eta tsakara, tási'a eta máitivera'i eta mápama

⁵Ena achaneana tikawasana'i te Jerusalén, ena tikawasana'i te tinapaika te Judea, énapa ena tikawasana'i te tachakayara'ana eta Jordán. Tiuchukanapa'i eta nawaraira'i nasamararaka.

⁶Timetaurekawanaware eta napeketurana, tási'a ema Juan máikachasikawakapaipa te kajakure Jordán.

⁷Taka'e te maima'apa ema Juan ena fariséuana énapa ena saduceoana. Nayanaucha'i, nawaraira'i tikaikachasiana, máichawakapa: “¡Tachichanaveana eta kichare! ¿Nája'a ticha'e'i eta iúchuku'airaya taye'e eta maikuñaraki ema Viya?

⁸Yátupina tátupiruwa eta epanereruana, ímerekawa eta é'isira ema Viya,

⁹wá'iware ekukajamurawa áka'e'i: ‘Viti mamariékene Abraham’, ema Viya, tájina máemaitukaima'i te mawara'apuka, máepiyaka achaneanaina eta juka mari, mawarairaina'i enaina mámariekeneanaina ema Abraham.

¹⁰Eta yawati tsekawaipa'i, tímikutijirikawaipa te máechukayarepa ema achane eta yukuki má'irekere te tapare. Tási'a, máijuchainapa tamutu te yuku.

¹¹Yátupi nuti, níkachasika'e'i te une, apaesa éñauchawa maye'e ema Viya, marajapainapasera ema tíkachasika'eyare, ema Machanewa Viya. Ema tiápajupanawa'i nuye'e nuti, wáipaine'i nákutinasima'i eta máitupaijiasirawa'i. Wáipaine'iware nákaemuñawaima'i nuvejuchupewacha eta maeparupewa.

¹²Márajapainapa tinerejirikainapa nákani yátupikeneana'i té'ikanayare. Takutinapa mákani achane tiákatayajirika'i eta ma'arusura máunakainapa eta taki. Tási'a mákijikapa eta tapirakiji, máijuchainapa te yuku máitawakakayare'i eta tamuruira.”

¹³Ema Jesús másinepa'i te Galilea, makaiju'eyare'i te kajakure Jordán, te mávi'a'i ema Juan, apaesa ema máikachasikapa.

¹⁴Émasera ema Juan, wa'i máwara'a'ini máikachasika'ini, ánipa maka'e: — Tata Jesús, nútira táurika'i nútiwaina píkachasikanu, ¿nusapi'apa núti pikaiju'enu'i eta níkachasikaviya?

¹⁵Émasera ema Jesús majikapapa: — Tájinachucha táichawa, tikamunukare'i nítauchayare eta mawara'akene'i ema Nukaiyakene Tata Viya. Tási'a, ema Juan tísapawapa.

¹⁶Te titawapa eta makaikachasira'i ema Jesús, tiúkupaikapa te une, tási'a, tíja'uchawapa téjiaka eta anuma, máima'apa ema Machanewa Viya tiúkupaikapaipa'i, mawasima'ipaipa eta paluma, tavenesikapa ema Jesús.

¹⁷Taka'e, nasamapa eta ma'u ema Viya tási'akene'i te anuma. Ani maka'e'i: “Pítira nuchicha némunarukene, núrisamurecha piye'e.”