Read Ignaciano Mateo 5 Bible Online

Mateo 5 - Ignaciano bible

Mateo 5

¹Eta máimairawaka'i ema Jesús ena kamurikeneana achaneana, tiápanapa taye'e eta anuke'epa'i apake'e, tási'a téja'apaikapa. Ena máimitureana napauchapa,

²tási'a ema tepanawapa timitureka, máichawakapa:

³“Tétavikawa eta náurikakarewaya ena tijapanuwana eta náchanewa, taicha ena naye'e'i eta Mawasa Akenuka te anuma.

⁴“Tétavikawa eta náurikakarewaya ena tikatajiwana'i, taicha ema Viya makurisamurechawakayare.

⁵“Tétavikawa eta náurikakarewaya ena mánsuana'i, taicha máijarakayare eta arairu apake'e náikuchi'i.

⁶“Tétavikawa eta náurikakarewaya ena tikaimairuwana'i eta naichira eta taurikeneana, taicha máijarakayare eta nawara'akene'i,

⁷“Tétavikawa eta náurikakarewaya, ena tijapanura'iana'i, taicha ema Viya, majapanuwakayare ena.

⁸“Tétavikawa eta náurikakarewaya ena tiuripanereruana, taicha naima'ayare ema Viya.

⁹“Tétavikawa eta náurikakarewaya, ena tikaepa'ana eta semanereana, taicha ema Viya machichayare.

¹⁰“Tétavikawa eta náurikakarewaya, ena tikatajiwana'i taichavene eta naichira eta taurikeneana, taicha ena tisiapanayare te Mawasa anuma.

¹¹“Tétavikawa eta náurikakarewaya ena, te naichanaka'e, nápanararacha'e ena achaneana taichavene eta e'isiranu'i, étapa eta naepiyaikene'a'erana.

¹²Ewapinawachucha íurisamurechucha, taicha ejechapaya eta ichapekene íjarakasiya tiasi'a te anuma. Ene naka'e'i eta nakatajiwaira'i ena nainapureanaini'i profetanaini, eye'e eti.

¹³“Eti ekuti'i eta icheve tétavikawa'i eta takamunukarewa'i tejuka apake'e. Te'esera te tepa'apapa, ¿wa'ipapuka takuicheve'i? Tási'a, nájinainapa tikamunuima'i, taicha náepuruinapa namutu.

¹⁴“Eti ekuti'i eta vimika'u, émikauchayare'i tamutu eta apake'e. Ekutiyare eta awasare tiávi'a'i te taina'u eta anuke'ekene mariripa'i wa'i tayumurukawa'ini.

¹⁵Waipaine'i nayustakaima'i eta yukupi, tási'a nanakapapukaini te taju'e eta chapamaju'e, étasera nanakayare'i te anuke'e, apaesa tamikauchasarepa namutu ena tiávi'ana'i te peti.

¹⁶Ene eka'eyare eti, ímerekayare eta ejaraiwayare naye'e ena achaneana, apaesa eta náimairaina'i eta táurikeneana íchakeneanayare, ena apanaware nakunachayarepa ema Tata tiávi'a'i te anuma.

¹⁷“Wa'i étaina tímitekanu'i nuti nukaepa'apana eta nawanairipiana ena profetanaini, wa'iware étaina taimitekanu'ini nukaichepaika'ini, eta tímitekanu'i nuti, níminekapaekene'a'eyare eta takayemakeneana.

¹⁸Nutupiruwa numetaka'e, te wicha'a takuitawa eta anuma, etapa eta apake'e, wicha'a nukaichepaikaima'i eta wanairipiana, tatiwayare titauchawaya tamutu eta taechejiriruwana'i.

¹⁹Eta taka'e, nákani tépuruanayare eta wanairipiana, tayanapane ánichichakene'i, eneichuware maka'eyare te mawasa akenuka ema Viya te anuma ánichichayarewa. Émasera ema tisuapa'i, tímitureka'i naye'e ena apamuriana, ena ichapeyare eta nakunachakarewayare te mawasa akenuka ema Viya te anuma.

²⁰“Táicha te wa'i ekuetumechawa eti, eta esuapajiraiwaina, ekutiyare ena escriwánuana, tási'a énapa ena fariséuana, wa'i itujikawaima'i esiapa te mawasa akenuka ema Viya te anuma.

²¹“Eti échaichu'i, ena viáchukanaveanaini eta nakametakasira'i: ‘Wa'i ekukapaka mákani piparaepiya, taicha mákani tikapareka'i, tikaikuñayare'i.’

²²Nútisera numetaka'e, mákani tisema'i maye'e ema maparape, éneichuware tikaikuñayare. Mákani tiúme'a'i ema maparape, tikayasere'iyare te namira'u nákani tuparairukana'i, takutikene mákani tikaeka'i'i ema maparape, máwaku'aipa'i eta ekuñaraki taye'e eta yuku.

²³“Eta taka'e, te piámapa'i eta piámawa'u te mamira'u me Viya, tási'a, péchapanapa eta pitapirawa'i maye'e ema piparape,

²⁴wícha'a pikuiyaraku'a eta piámawa'u, tatiwanumayare piyaseapanaya eta piuriwaina me piparape. Pétupirikanumayare tatiwa eta píchawakenewa'i maye'e, taka'e táurikasarepa pichawa píyaraku'apana eta piámawa'u.

²⁵“Te matiari'ipuka mákani achane metauchavi'i te namira'u ena tuparairukana, wa'i pikuchapaima'i mametauchavi, tatiwayare pétupirika eta píchawakenewa'i maye'e, mapurare wicha'a namavi'ini me juez. Taicha ema juez mawanekainapa ema pulicia teratakavi te nakaeratairare.

²⁶Numetakaviwane, wa'i piuchukawanema'i ánaki, tiamainukawa te pitawachachapa tamutu eta pinteve'i.

²⁷“Eti esamaichu'i eta takámetakasiwa'i: ‘Wa'i ekaesenaraima'i.’

²⁸Étasera nuti numetaka'e, mákani majamuracha'i esu apana esena eta maimaira'i, tikapekaturaipa'i te masamure.

²⁹“Eta taka'e, te tiviuchavi'ipuka eta piúki'a wáure, tímiakipaikavi te pekatu, tiúripana'i piveku'aukichawa piákijikaya tiyere'i, taicha tiúripana táejiakawa ánichichaina te piáke'e, wá'isera takuimikuñakavi tamutu eta piáke'e, te ekuñaraki taijurekene yuku.

³⁰Te tiviuchavi'ipuka eta piwa'u waure, tímiakipaikavi te pekatu piyuchatikawane, tiuripana pisiapa te anuma chutuwa'uvina, taicha te wa'i picha, timikuñakaviyare te taijurekene ekuñaraki yuku maitawakakainapa eta tamuruira.

³¹“Éneichuware tikamekatakasi'iware: ‘Mákani tínajika'i esu mayena, máijarakayare'i eta ajumeruka táechejisi'ayare'i eta máinajisiraya esu mayena.’

³²Nútisera numetaka'e, mákani achane te máinajikapuka esu mayena, eta taka'ekenechucha eta naitaresira'i, te mainajika'i esu mayena taichavene'i eta sukayepeira'i ema apana achane, te tiápechawapa tikaima tamuriakainapa esu, tási'a mákani apanaware achane makaesenara'ipuka esu apana esena máinajiru'i ema suima, éneichuware tikapekaturaipa'iware.

³³“Éneichuware eti écha'i, eta nakametakasira'i ena viáchukanaveanaini: ‘Wa'i ekunaka eta échejiriruwa jákani emaitaureyare, yátupinasera eta ítauchiraina tamutu eta íjarasirawa'i me Viya.’

³⁴Nútisera numetaka'e: wa'i ekunaka eta échejiriruwa jákani emaitaureyare, taye'e jákani ewara'akene'i icha. Wa'iware ekunaka eta échejiriruwa jákani emaitaureyare te échejisi'a eta anuma, taicha eta máwasa'i ema Viya,

³⁵wá'iware échejisi'aima'i eta apake'e, taicha eta makaemataneya'i ema Viya. Wá'iware échejisi'aima'i eta Jerusalén taicha eta máwasa'i ema ichapekene Rey.

³⁶Wá'iware ekunaka eta échejiriruwa jákani emaitaureyare taye'e eta itaresira, taicha wa'i étina echa eta itaresira.

³⁷Tikamunukare átupiruwa áka'e: ‘Tiuri’ te wá'ipuka ewara'a'i, átupiruwa áka'e ‘wa'i.’ Te émuna'akawapuka enaka eta échejiriruwa jákani emaitaureyare, étapa tiasi'a maye'e ema Wínaraji.

³⁸“Esamaichu'i eti eta takayemakene'i: Mákani achane, mapuchukicha'i eta mae'aira'i, ema apana achane, titsikawayarewa napuchukichayarewa ema apana te'a'i. Te makavetukia'pecha'ipuka, éneichuware nakavetukia'pechayarewa ema apana.”

³⁹Nutisera numetaka'e: Wa'i ekujikapa te masema mákani achane wínaraji, tiuripana, te náe'a'epuka te emira te waure, íjarakachucha éneichuware eta apachakaya eta emira.

⁴⁰Te natiari'ipuka nákani timetaucha'eana, tási'a nawara'a tiverejika'eana eta pikámisa, pisapaine mamaine eneichuware eta pepaku'a.

⁴¹Te tikamesa'eanapuka iámina eta namakene, eta étanaina kilómetro, eti iáminayare apina kilometro.

⁴²Mákanipa tája'apuka tiyaseakavi, píjarakaya, tási'a wa'i ekueñamina, mákani tiyaseakavi eta pikapusiraina.

⁴³“Éneichuware écha'i, eta ekametakasira'i: ‘Pémunakayare mákani piparaepiya, tási'a ekatichayare nákani tikatianaka'eana'i.’

⁴⁴Nútisera numetaka'e: Émunakayare nákani tikatianaka'eana'i, eyujarauchayare nákani tipanajirika'eana'i.

⁴⁵Taka'e eti tímereucha'eyare eta machicha'era'i ema Tata Vikaiyakene tiavi'a'i te anuma, taicha ema namutu máemunakawaka'i, ena achaneana wínarajiana énapa ena tiúriana, tási'a ema tíjaraka'avi'iware eta sache, étapa eta tikiwa, naye'e ena natupiruwana, énapa ena maetupikushiana.

⁴⁶Taicha te eti émunakawaka nákarichu ena témunaka'eana'i, ¿ejachapayapuka eta ikuchi'i? Apanasika ena tive'ara'iana eta tawacha eta apake'e taye'e eta Roma, náicha'ini eta juka.

⁴⁷Takutikene, te nakárichu échejika'i ena eparapeana, ¿tája'apuka nakunachakarewaya? Apanasika ena máimatira'ana ema Viya náicha'i eta juka.

⁴⁸Ímereka eta iúriwa naye'e namutu, ekutiyare ema Tata Vikaiyakene te anuma eta máuriwa'i.