Read Ignaciano Mateo 6 Bible Online

Mateo 6 - Ignaciano bible

Mateo 6

¹“Échapawayare eta ekajirayare ena páureana, wa'i ekunakikawa te namira'u ena achaneana, te ewara'apuka náimararaka'e eta ekajira'i eta nakamunukene, ewaraira'i tikunacha'eanayare. Émasera ema Tata wa'i tikunacha'ema'i, waipaine'i tijaraka'ema'i eta ikuchi'i.

²“Eta taka'e, te íjarakayarepuka nákani tikamunuwana'i, wa'i ekumetajirika, wa'i ekukuti ena apimirana timetajirikanapa te petiana naúrujisirarewa ena juriyuana, té'epa te anekapa'iana, apaesa tauri eta naechejisira ena achaneana eta eye'e. Nútisera numetaka'e, ena nani tika'eana'i, najachapainapa eta naikuchi'i.

³Te píjarakayarepuka mákani tikamunuwa'i, wa'i pikumetajirika, wá'iware pikumetaka mákani pémunakasare,

⁴Piñájichayare eta píjarasirayare. Tási'a ema Tata máimararaka'i tamutu jákani piñájiruana'i, ema tíjarakavinapa eta píkuchi'i te juka apake'e.

⁵“Te eyujaraka eti, wa'i ekukuti ena apimirana, tiyujarakana te peti naúrujisirarewa ena juriyuana, té'epuka te anekapa'iana, titupi'ana'i ena eta nayujarasira, nawaraira'i náimararakayare'i ena achaneana. Nútisera numetaka'e, ena nani tika'eana'i, najachapainapa eta naikuchi'i.

⁶Étisera te eyujaraka esiapayare te eye'e pusentu, ératakayare eta epajakura, eta eyujarasira maye'e ema Tata Vikaiyakene, ema tímararaka'e'i masamayare'i eta eñajichirawa'i eta eyujarasira, ema tijaraka'eyare eta ikuchi'i.

⁷“Takutikene, wá'iware ekuapepirika eta eyujarasira, taicha tajinapa tákayema, wa'i ekukuti ena máimatira'ana'i ema Viya, tiupiemanapa eta nayujarasira'i, náimijachaipa tisamakarepanana'i me Viya.

⁸Wa'i ekukuti ena, taicha ema Tata Vikaiyakene, máimatipa'i eta jákani ewara'akene'i eyaseaka, te wicha'a'i eyaseaka'i.

⁹Eti, ani taka'eyare eta eyujarasirayare: ‘Tata Vikaiyakene piti piavi'a'i te anuma, vipikaucha'i eta pijare.

¹⁰Piteka pakarichu viye'evina rey. Námutu nasuapavi ena tiavi'ana te juka apake'e, tákuti eta nasuapiravi ena tiavi'ana te anuma.

¹¹Píjaraka'avi eta vinikakene vikamunukene puiti jena sache.

¹²Pájapanu'avi eta viviurewana piye'e, takuti eta vijapanuirawaka'i viti ena tiviucha'avina'i.

¹³Wa'i pikuisapa'avi vicha eta tamaurikeneana pikatiucha'avi maye'e ema wínaraji.’

¹⁴“Taicha te eti, emetavika eta naviurewana'i ena apamuriana, éneichuwa temetavika'eya eta eviurewana ema Tata vikaiyakene tiavi'a'i te anuma,

¹⁵té'esera te wa'i ekuemetavika eta naviurewana'i eye'e, ema Tata vikaiyakene wá'iware maemetavikaima'i ema eta éjekapirawana'i eti.

¹⁶“Te íjima'i eti, wa'i ekajapanuramiraima'i te namira'u ena achaneana, wa'i ekukuti ena apimirana, ena tímikaecherachawana'i eta naijimaira'i. Nuti numetaka'e, tájinachucha nakunachakarewaima'i me Viya. Ema wa'i maijarakaima'i eta naikuchi'i.

¹⁷Piti, te pijima'ipuka, pikatatasiyare, pikasipaukiware,

¹⁸apaesa nakuija nakuimatiakavi ena achaneana eta pijimaira'i. Makarichu ema Tata vikaiyakene maecha eta pichira'i eta juka, ema tijarakaviya eta pikuchi'i.

¹⁹“Wa'i takuawasamurereka'e eta íma'akeneana te juka apake'e. Eta juka tikamitiekene'akareana, taicha eta kachusiri tajarareka, tási'a natiari'iware ena tiámera'iana tisiapana.

²⁰Epanerecha eta ekaima'akenéraya ánaki te anuma, ánaki tájina kachusirina, nájinaware ena tiámera'ina taye'e, tájinaware témitiakaima'i.

²¹Te tavi'a'i eta íma'akeneana, éneichuware ánaki tavi'ayarewa eta pisamure.

²²“Eta iuki'ana takuti'i eta vimika'u, tamikaucha'i eta viake'e, taka'e te tiurinawaka'i eta iuki'ana, tiurinaware tamikauchiyare,

²³té'eserapuka eta piuki'a wa'i tiuri, tamutu eta piake'e timapiku'ayare eta emáuriwa'i. Tási'a eta tijara'i eye'e eti tamapikuipa, ¡tiwayuchawainapa eta tamapikuirayare eta itaresira!

²⁴“Najina emanaina táurika'ini apinanaina'ini ena viákenuana, taicha vémunakapanayare'i ema émana, tási'a ema apana apaesaineya eta vémunasiraya, wáipainapa tisuapakarema'i ema émana. Ene taka'e'i eta juka víma'akeneana, wa'i vikuisapa ta'apasamurecha'avi eta platakare, machu ta'apapika eta vémunasira'i ema Viya.

²⁵“Étasera nuwara'a numetaka'e: Wa'i ekukaeñamarakawa eta enikakenerepi, étapa eta emuiri'arapi puiti juka sacheana. ¿Wa'i étaina eta vitaresira tiuripana taye'e eta viniripi, étapa eta viake'e tiuripana taye'e eta vimuiri'arapi?

²⁶Ímararaka eta káyureana tiararaikana te anuke'e: wa'i táewaka'ini, táechatijirika'ipukaini, táunaka'ipukaini eta tanikakeneyare, émasera ema Tata Vikaiyakene máechapajirika'i, máijarasira'i tamutu eta tanikakenerepiana. ¡Evetijipa eti, iápajupanawa'i eta éñamakarewa'i taye'e eta káyureana!

²⁷Tayanapanepuka ekaeñamarakawa'ini, nájina narata'aima'i nakarataka eta naitaresira etanaina'ipukaini ura.

²⁸“¿Tasi'a tája'a takayema ti'apasamurereka'e'i eti eta emuiri'arapi? Ímararakaichu'i eta tajurusira'i eta flúreana te wama'i, wa'i takaeñamarakawa'ini takaematane'ini, táijurureka'ipukaini eta tamuiri'ana.

²⁹Nájina nákuti'ini eta takamuiri'aira eta táurinawa, émaipa ema Salomón tamutu eta makaye'ekeneana, wá'isera márata'a'ini makutinasi'ini eta taurinawa eta.

³⁰Apanasika ema Viya máijaraka'i eta táurinawa'i eta flúreana, ánipichu'ineni eta táitaresira'i, ¡evetijipa eti eta máechapajirisira'e'i, máijarasira'eyare'i eta emuiri'arapi eti achaneana, wa'ineni ákasiñawa'ini!

³¹Eta taka'e, wa'i ekupanererereka eta enikakenerepiana, étaipa te échuriakapuka eta une érayare, ¿taja'apuka vikamuiri'ayare?

³²Tamutu eta júkana taiparakana, nakamunukeneana taimipanerereka ena achaneana máimatira'ana ema Viya, étisera échaipa'i, imatipa'i eta matiari'ira'i ema Ekaiyakene te anuma, máimati'i ema tamutu eta ekamunukeneana'i.

³³Eta taka'e tatiwayare esenikayare ema Viya, taicha akenuka'i ema te anuma, ítauchayare tamutu eta mawara'akeneana'i, ema tíjaraka'eyare tamutu eta juka ekamunukeneana.

³⁴Eta taka'e, wa'i takuimipanererecha'e eta íchararakawayare achichu, taicha achichu jarari'iyaicha'a eta eñamirawayare. Puiti ekuchapaipa eta máimikatasira'eyare, ímiyanawa eta ekuchapirayare eta máimikatasira'eya, taicha tamutu sacheana titekapa eta tamaurikeneana.