Read Ignaciano Mateo 8 Bible Online

Mateo 8 - Ignaciano bible

Mateo 8

¹Te tiúkupaikapa ema Jesús taye'e eta anuke'ekene mari, kamuriana'i ena achaneana té'ikanapa'i.

²Taka'e, maka'epaipa ema émana achane karachame, témeña'awapa maye'e ema Jesús. Tépuyukapa te mamira'u, tási'a, máichapa: — Tata, nukasiñawa'i eta piye'e, pikanarakanupaini eta nujuma'i.

³Ema Jesús maemamakapa te mawa'u, tási'a majikapapa: — Nuwara'a nukanarakavi. ¡Puiti tajinapa pichirawaima'i! Énewaneine'i témitiaka'i eta majumaini'i caracha.

⁴Tási'a, ema Jesús máichapa: — Pima'a wa'i pikumetajirika piyanayaresera pímerekawa maye'e ema tiyujarakara'i, pikamawa'uyarepa'i eta pi'asulupayachiraya taicha eta makanarasiravi'i taicha eta juka eta mawanairipi'i ema Moisés.

⁵Te tisiapayarepa ema Jesús te Cafarnaúm, ema nakapitara ena suntaruana romanuana, mapauchapa ema Jesús.

⁶Máichapa: — Tata, ema nukajurure tikajuma'i te nupena, murakaki'a, tási'a tétavikawa'i eta takatiwa masama.

⁷Ema Jesús, májikapapa: — Nuyanayare nukanarakapana.

⁸Ema nakapitara majikapapa: — Tata Nukaiyakene, nuti wa'i nakaemuñawa eta pisiapa'ini te nupena; németeaka tarataichu pikawanairipi eta pikanarasiraya ema nukajurure.

⁹Taicha nuti nusuapa'i te tiwanekanuana. Nútipa nusuapakare'iware naye'e ena nusuntarurana'i. Te nuwanekawaka, té'eware níchu'awakapuka, tisuapanuana'i. Te nuwanekapuka ema nuwaneru, enurujipa tisuapanuwane.

¹⁰Ema Jesús maramine'i eta juka masamakene'i, máichawakapa ena té'ikanapa'i: — Nutupiruwa numetaka'e, nájina émanaina israelita mákuti'ini ema maka achane apawasana eta makasiñairanu'i.

¹¹Tasi'a maichawakapa, narajapainapa ena kamurikeneana achaneana tiási'anayare te tayere'ikeneana awasareana te juka apake'e. Tisiapanayare te mawasa ema Viya Akénuka te anuma, nakachanewakaya eta nanisirayare ema Abraham, ema Isaac, émapa ema Jacob.

¹²Ena tisiapanayare'ini te mawasa ema Viya Akénuka te anuma, nakijikawakainapa te aneka ánaki te tamapikuiya'i. Taka'e jarapainapa eta naiyairayare naeñamirawayare, taicha eta naikuñayare.

¹³Taka'e ema Jesús máichapa ema kapita: — Piyana pichawa te pipena, táitauchawa eta pisuapiranu'i. Taka'e énewanepa ema mamusura tíja'uchawapa tinaraka'i.

¹⁴Ema Jesús tiyanawarepa te mapena ema Pedro, machimapaine'i esu máimase ema Pedro, tiveka'i te suachawara'i, tikajuma'i eta muraka fiebre.

¹⁵Ema Jesús makaratawauchapa eta suwa'u esu, tási'a enewanepa táetaviaka'i eta fiebre, tási'a esu techepukapa, tepanawapa suéchapajirikapa.

¹⁶Te timapikukupa'ipa títekaparakanapa kamuriana ena achaneana máwa'aruana'i ema éreana; eta'echu'i maechejika'i ema Jesús, makuchuchujikawakapa ena éreanana. Éneichuwa makanarakawakapa namutu ena nakajumakeneana'i.

¹⁷Eta juka títauchawapa eta máechejisi'akene'i ema víyara'aini profeta Isaías, te maka'epa: “Ema mámapa eta vipekaturana étapa eta vijumana.”

¹⁸Ema Jesús, te tima'awapa eta nachayasira'i ena kamurikeneana achaneana, mawanekawapa ena te'ikanapa'i eta nakanueka'ini te apachara eta kákiure.

¹⁹Taka'e, témeña'awapa ema émana escriwáno, tási'a máichapa: — Maestro, nuwara'a né'ikavi te jákani piwara'akeneyare piámanu.

²⁰Ema Jesús, majikapawarepa: — Eta chuye tikapenajuereka, eta káyureana éneichuwa tikamakajiana, émasera ema Machicha ema Ajaira tájina maviya'ini manarasi'a'ini.

²¹Ema émana máimiture majikapawarepa: — Tata, nuyaseakavi písapanu'ini nuyana'ini nékarapana ema tikachichanu.

²²Ema Jesús majikapapa: — Pé'ikanu, tási'a pésamirika náekarakakaicha'a ena máecharaireana.

²³Ema Jesús, tiáwaku'apa te pakure, énapa ena máimitureana.

²⁴Te tupierekanapa, tachimarakapa eta muraka tékatikawa, tépakukapa ichape eta kákiure, tiane'ipa tepacharakawana eta napakure. Emasera ema Jesús tave'apa eta echapu timakapa.

²⁵Taka'e, ena máimitureana tipiararekanapa eta napisira'i, nakajamikapa ema naichapa: — ¡Tata maestro, pikatiucha'avi! ¡Vérikainapa!

²⁶Ema majikapawakapa: — ¿Tája'a takayema eta episira? ¡Wa'i ákasiñawapa'ini eta nutiari'irapa'i eta eye'e! Eta juka maka'era'i, téchepukapa mawanekapa taemajakawa eta tékatikawa étapa eta kákiure, enewanepa tésamiriekawapa eta táepakusira'i, tájinapa táichirawaina'ini.

²⁷Ena náramine'i, taka'e yaserejirikakanapa: — ¿Tasi'a naja'apuka ema maka, taicha tasuapa'i tamutu eta tékatikawa étapa eta táepakusira'i eta kákiure?

²⁸Te títekapapa ema Jesús te apachara eta kákiure te apake'e Gadara, tiúchujikanapa te ekari ena apinana ajairana, máwa'aruana'i ema éreanana. Tétavikawa'i eta náiñe'iwaka'i nájina napatsikawa'ini naetavika'ini tejena achene,

²⁹tási'a tipiararekanapa: — ¡Wa'i pikuimisiapawa eta viye'e, piti Machichavi'i ema Viya! ¿Pitekapa ani piwara'apa pikuñaka'aviyare? Viti wícha'a viwara'a vikaikuña.

³⁰Ánaki te nachakaya, tatiari'iwaka'i eta kamurikeneana kúchiana tini'ikana'i

³¹tási'a ena éreanana nayaseakapa ema Jesús: — Te piákijika'aviyapuka, písapa'avisera visiapa'akawaka eta jena kúchiana.

³²Ema Jesús máichawakapa: — Eyana. Ena éreanana tiúchukanapa naye'e ena achaneana, tási'a nasiapa'akawakapa eta kúchiana. Tási'a énewanepa tiáramemuri'anapa eta kúchiana. Tijunaparakanapa, te kákiure étapa taéririjisinewaka'i.

³³Ena tijaneakanaini'i eta kúchiana tiuchukanapa tijunanapa. Tasi'a yananapa te awasare, timetajirikanapaipa eta naichararakawa'i, étapa eta nanarasira'i ena náwa'aruanaini ena éreanana.

³⁴Taka'e, tiyananapa ena achaneana te mávi'a'i ema Jesús, te náima'apa ema nayaseakapa wa'i makuitekapa'ini te náwasana, machawa'ini te másine'i.