Read Ignaciano Mateo 9 Bible Online

Mateo 9 - Ignaciano bible

Mateo 9

¹Taka'e, ema Jesús tichawapa tiáwaku'awarepa te pakure tianuekapa te apachara eta kákiure. Tichawapa te máwasa'i Cafarnaúm.

²Títekapanawarepa ena apamuriana, námapa'i te áchuji ema achane muraka'a. Te máima'apa ema Jesús eta nakasiñawaira'i me Viya, máechejikapa ema makajumakene: — Pétumechawa, nuchicha, eta pipekaturana'i nukaepa'ainavipa.

³Enananajiwaka ena escriwánuana naimijacha'i: “Eta maichakene'i ema maka, mayunaka'i maye'e ema Viya.”

⁴Émasera ema Jesús máimarakawaka'i eta napanereruana'i ena, ema mayaserekawakapa: — ¿Tája'a takayema eti, tiñema'ipa eta epanereruana'i?

⁵Emétakanu, taja'apuka maejerarepana eta nukayemaina: ‘Nukaepa'apa eta pipekaturana’, naka'epuka: ‘Péchepuka, tási'a pipaikapa’

⁶Tiuri puiti nímereuchawainapa, ema Machicha ema Ajaira, eta marata'aira'i makaepa'a eta pekatuana te juka apake'e. Taka'e máichapa ema murakaki'a: — Péchepuka, pive'a eta pímakaraji, tási'a piyanapa te pipena.

⁷Ema murakaki'aini'i, téchepukapa, tiyanapa te mapena.

⁸Te naima'apa eta juka, ena achaneana tipikanapa. Tasi'a tétavikawaine'i eta nakunachira'i ema Viya, taicha eta máitupaijiasirawa'i eta máijarasira'i ena achaneana.

⁹Ema Jesús tiyanawarepa te mavine'i, taka'e maima'aine'i ema achane tikaijare Mateo téjaka'i eta te makatupara'aiya'i eta nawachachirare eta nayase'ana taye'eyare'i eta Roma. — Ema Jesús maichapa: — Yare pé'ikanu. Taka'e ema Mateo techepukapa enewanepa, máe'ika ema Jesús.

¹⁰Taka'e ema Jesús tinika'i te mapena ema Leví, énapa ena máimitureana. Ánaki natiari'iware ena machamuriana ema Mateo, enapa ena kamurikeneana achaneana tisipekaturana, tinikana'iware te mesa mavi'a'i ema Jesús.

¹¹Te naima'apa eta juka ena fariséuana, nayaserekapa ena maimitureana: — ¿Tája'a takayema ema eye'e maestro makachanewaka'i eta manisira'i naye'e ena tive'ara'iana eta viyase'ana énapa ena tisipekaturana'i?

¹²Te masamapa ema Jesús eta náechejiriruwana'i, máichawakapa: — Ena tikajumana'i nakámunu'i ema mériku, énasera ena majumara'ana wa'i nákamunuima'i ema mériku

¹³Eyana ekarawa'u eta juka taecheiriruwa: ‘Nuti, wa'i étaina tímitekanu nutanupanawakayare nákani matapirawareana'i, eta tímitekanu'i.’ Nutanupanawakayare ena tisipekaturanapana'i apaesa, náeñauchawapa me Viya.

¹⁴Ena máimitureana ema Juan Tikachasirikara'i, napauchapa ema Jesús, tási'a nayaserekapa: — Viti, tási'a énapa ena náimitureana ena fariséuana vikaijimana'i muraka, ¿tája'a takayema wa'i nakaijima'ini ena pimitureana?

¹⁵Ema Jesús majikapawakapa: — ¿Nímikutichina'e puiti, wa'i táurikaima'i naijima'ini nákani tikaichu'akasiana'i tinikanaya naye'e ena araimana, tiúrisamureanayare'i taicha matiari'i'i ema arayena? Járajapainapa eta sácheyare, tikaverejikasianaya, taicha ema arayena námainapa tapaenumawainapa tijimanainapa.

¹⁶“Najina tepakaka'areka taye'e eta arameru amáratataji, taicha eta ichasime muriare atataji takachuriakayare'i tetsayuka taye'e eta arameru. Taka'e eta taetsayu ichapepanainapa.

¹⁷Wa'iware taurika'ini vinaka eta aramaruama vino te ichasi'i yupi, taicha eta vino tisisiekaya tiñe'i takuta'ika eta yupi. Eta taka'e tiuripana vikawakuru'i tamutu arairu. Je'esare taurikapa eta tasisiesiraya.”

¹⁸Taka'e ema Jesús téchejirikawaicha'a'i, titekapapa ema nakenumuri ena juriyuana, maepuyumirauchapa te mamira'u ema Jesús. Ánipa maka'e: — Su nuchicha puíti'icha'a suepenirawa'i, té'esera te piyana pinaka eta piwa'u, chawaya títareka.

¹⁹Ema Jesús techepukapa, tási'a tiyanapa máe'ika'i ema achane, náe'ikawarepa ena máimitureana.

²⁰Taka'e esu esena, doce añuipa'i eta sukajumaira'i táichira'i eta suítine, supauchapa te makeku ema Jesús, suémamakapa eta tacheyarapi eta mamuiri'a.

²¹Taicha nupanereru'i: “Taratachuchaini némamajiaka'ini eta ñimuiri'a, apaesa nunaraka'ini.”

²²Émasera ema Jesús masamaichucha eta suémamajiasira'i, makaikutiara'i eta makanararesira'i, tékerukawapa, máima'apa eta supisira'i esu esena, tási'a, máichapa: — Nuchicha pinarakapa puiti táichavene'i eta pikasiñawaira'i me Viya. Wa'i pikueñamawa, waipa tichawaima'i eta pijumaini'i.

²³Te títekapapa ema Jesús, te mapena ema tachutiri'a naye'e ena juriyuana, máima'aine'i ena kachujara'iana, tiúrianaipa'i eta námirayare'i eta naekarayarepa esu suépenakene. Tási'a ena achaneana, waipa náitukakara'a'ini, tijajamuri'anapa eta náiyaira'i,

²⁴máichawakapa: — Iúchuka eta te juka, esu suka amaperu wa'i suépena'ini tímakaichucha. Ena achaneana nakaeka'ichucha ema Jesús,

²⁵émasera makuchukawakapa tisiapapa tási'a makaratawauchapa esu amaperu, tási'a esu téchepukapa.

²⁶Te nasamairirikapa ena tikawasana'i taye'e, náramine'i namutu, nakatsatsaikapa timetajirikanapa.

²⁷Te tiuchukapa ema Jesús eta ánaki, náe'ikapaipa ena apinana púchukiana, tipiarakanapaipa'i te máekene: — ¡Pikatajika'avipaini pájapanu'avi piti'ipa yátupikenevi'i Cristo!

²⁸Te tisiapapa ema Jesús te mapena, ena púchukiana, témeña'awanapa eta maye'e. Tási'a ema mayaserekawakapa: — ¿Yátupipuka ekasiñanu'i eta nukanarasira'eyare? — Ena najikapapa, yátupi Tata.

²⁹Taka'e ema Jesús, máemama'aukichawakapa, tási'a máichawakapa: — Táichavene'i eti, eta ekasiñawaira'i me Viya.

³⁰Jé'esare, enewanepa tinarakana'i, tímairirikanapa tási'a, murakapa eta matuparasira'i: — Wa'i ekumetajirika eta nukanarasira'ewaka'i.

³¹Wá'isera náka'e'ini ena, étaichu'i te tiúchukanapa, timetajirikanapa eta makanarasirawaka'i ema Jesús, tási'a, náechapa namutu eta juka máichakene'i.

³²Eta nauchusirapaipa'i ena púchukiana, naka'epaipaware ena achaneana, námapa'i maye'e ema Jesús ema úpa, máwa'aru'i ema éreana.

³³Taka'e ema Jesús te mákijikapa ema éreana, ema úpapaini'i, tepanawapa techejirikawa'i. Náramine'i ena achaneana naka'epa: — ¡Tájina vimatiya'ini víma'a'ini tákuti'ini eta juka te Israel!

³⁴Énasera ena fariséuana naka'epa: — Émakene'i ema nákenumuri'i ena éreanana ema maka, ema tijaraka'i eta máitupajijiasirawa'i, eta makuchusirawaka'i.

³⁵Ema Jesús tamutu'i mapaika eta awasareana, étaipa eta awasarechichana, tímiturekapa'i taye'e te jákani peti náurujisirarewa ena juriyuana, tikametarairupa'i eta taurinakene máechejiriruwa ema Viya, tási'a makanarakawakapa'i ena nakajumakeneana tikakatiruanapa'i.

³⁶Te maima'awakapa ena achaneana, tínanajirikawana'i. Tétavikawaine'i eta majapanuirawaka'i, taicha nakuti'i eta uvesana nájina tijaneakaina.

³⁷Taka'e máichapa ena máimitureana: — Tétavikawapa eta vikamunuirawa ena tímikataka'avianaya taye'e eta juka vématanerepi'i.

³⁸Eta taka'e, eyaseakayare ema Tikaye'e eta juka emátaneka máwaneka ena náimikataka'avi.