Read Ignaciano Marcos 1 Bible Online

Marcos 1 - Ignaciano bible

Marcos 1

¹Ani taka'e'i eta taepanirawa eta máechejiriruwa, ema Jesucristo, machicha ema Viya, te títekapaucha'avipa te vitaraku mamétasira'avi'i eta táurinakene'i máechejiriruwana ema Viya.

²Tikaju'i te libro, majucha'i ema profeta Isaías: “Nuwanekayare ema tikametarairuyare, apaesa matserereka eta achene.

³Matiari'i ema émana, tipiaraka te mawapa'ikene wama'i: ‘Etserereaka eta mache'u ema Viya, petupinacha eta achene.’ ”

⁴Ani taka'e'i eta timerekawapa ema Juan Tikachasirikara'i, ánaki te mawapa'i wama'i, maka'epa, itsiwacha eta epanereruana, éñauchawa maye'e ema Viya, taurikapa ekaikachasi, apaesa maka'epa eta epekaturana.

⁵Namutu ena tikawasana'i te tinapaika te Judea étapa te awasare Jerusalén. Tiuchukanapa'i eta nawaraira'i nasamararaka. Timetaurekawanaware eta napekaturana, tási'a ema Juan máikachasikawakapaipa te kajakure Jordán.

⁶Eta mamuiri'a ema Juan itsameruka'i tajiya'a eta camello, eta máitiju'e, wákapi jayumepi; eta maniriji eta tsakara, tási'a eta máitivera'i eta mápama.

⁷Maka'e'i eta makametarairuira'i: “Marajapainapa ema tíkachasika'eyare, ema tiápajupanawa'i nuye'e nuti. Wáipaine'i nákutinasima'i ema. Wáipaine'iware nákaemuñawaima'i nuvejuchupewacha eta maeparupewa.

⁸Nuti níkachasika'e'i te une, ema tíkachasika'eyare maye'e ema Machanewa Viya.”

⁹Te jena sácheana'i ema Jesús tiuchukapa te Nazaret tinapaika'i te Galilea, tási'a ema Juan máikachasikapa te kajakure Jordán.

¹⁰Te tamutupa eta makaikachasira'i ema Jesús, tiúkupaikapa te une, tási'a, tíja'uchawapa téjiaka eta anuma, máima'apa ema Machanewa Viya tiúkupaikapaipa'i, mawasima'ipaipa eta paluma, tavenesikapa ema Jesús.

¹¹Taka'e, nasamapa eta ma'u ema Viya tási'akene'i te anuma. Ani maka'e'i: “Pítira nuchicha némunarukene, núrisamurecha piye'e.”

¹²Te taekenepa, eta juka ema Machanewa Viya mámapa ema Jesús, ánaki te máwapa'i wama'i.

¹³Eta mayerewa'i ema Jesús cuarenta sache kuarentaware yati eta maijimaira'i. Tási'a, ema Wínaraji mawara'apa makaitsamaraji, enasera ena ángeleana najaneaka'i, makachanemuri'i eta sárareana te mávi'a'i ema Jesús.

¹⁴Taka'e, ema Jesús, eta masamairisirapa eta makaerataira'i ema Juan, tiyanapa tichawa te máwasa Nazaret te Galilea. Tepanawapa tikametarairu eta Arairu maechejiriruwa ema Viya.

¹⁵Ánipa taka'e'i eta mametarapi: “Eta mawasa ema Viya akenuka te anuma tiane'ipa titekapaucha'e eta eye'e. Échawa éñauchawa me Viya tási'a ejákapa eta ekasiñawairaina me Viya, esuapapa eta Arairu maechejiriruwa.”

¹⁶Taka'e eta mapaisirapa'i ema Jesús te tachausi eta Kákiure te Galilea, máima'awakapa ena apinana kaparapekakana, ema émana tikaijare'i Simón Pedro, émapa ema Andrés. Eta náematanerepi ena nani, ténikara'iana'i. Nákijiereka'i eta nayuta'e te une.

¹⁷Taka'e, ema Jesús máichawakapa ena: — Yare, é'ikanu, nuti níjaraka'eyare eta apana ématanerepiyare, eti ítukawaparaka'i eta jima, taka'eyare eta itusirawayare ena achaneana.

¹⁸Enewanepa náinajikapa ena eta náenisira'i, tiyananapa náe'ikapa ema Jesús.

¹⁹Ánakipanawarepa máima'awarepa ema Jesús ena apinana tikaparapekakana, ema Santiago émapa Juan téjakana'i te napakure, emapa ema naiya Zebedeo, náititijirika'i eta nayuta'e.

²⁰Ema Jesús máichu'awarepa ena apinana, tási'a náe'ikapa, najunijikapa ema naiya Zebedeo, manasipa ema te pakure, makachane'i ena mamusurana.

²¹Títekapanapa te Cafarnaúm, tási'a jena sache sáwarumu'u, ema Jesús tisiapapa te peti naúrujisirarewa ena juriyuana, tási'a tepanawapa máimitukawaka'i.

²²Ena achaneana naramine'i eta máimiturapiana'i, tétavikawa'i eta máitusira'i mayunapaika'i tamutu. Suapakare'i eta máimiturapiana, wa'i makuti'ini ena escriwánuana.

²³Te peti náurujisirarewa ena juriyuana, matiari'i'i ema achane máwa'aru'i ema machanewa ema éreana, tipiarareka'i:

²⁴— ¿Taja'a takayema pimisiaparakawa'i eta viye'e, piti Jesús Nazareno? Piti piteka'i pijarareka'aviya, nuti nimativi, piti Machichavi ema Viya Sántukenevi'i.

²⁵Ema Jesús makajachapa ema machanewa ema éreana máichapa: — ¡Pámatina, pijunijiaka ema maka achane!

²⁶Ema achane tíja'uchawapa tiákipaikawa'i, tipiararekapa muraka maicha ema machanewa ema éreana. Tási'a majunijiakapa ema achane.

²⁷Tiáramekanaine'i namutu ena natiari'ikeneana'i, tási'a tiyaserejirikakanapa: — ¿Tája'asika eta juka? ¡Ema maka tétavikawa'i eta máitupajijiasirawa'i, eta mayunapaisira'i tamutu! ¡Marata'a'i mákijika eta machanewa ema éreana, tási'a nasuapa'iware!

²⁸Tási'a enewanepa nasamajirika eta máichakeneana'i ema Jesús, énaipa ena tikawasana'i te tinapaika te Galilea.

²⁹Tiúchukanapa taye'e eta peti náurujisirarewa ena juriyuana, ema Jesús tiyanapa te mapena ema Simón me'epa ema Andrés. Náe'ikawarepa ema Santiago émapa ema Juan.

³⁰Esu máimase ema Simón tiveka'i te suachawara'i, tikajuma'i eta muraka fiebre. Nametakapa ema Jesús,

³¹tási'a ema mapauchapa, makaratawauchapa eta suwa'u, esu techepukapa, enewanepa táetaviaka'i eta fiebre, tási'a tepanawapa suéchapajirikawakapa.

³²Te timapikukupa'ipa taeriruipa'i eta sache, títekaparakanapa namutu ena nakajumakeneana'i máwa'aruana'i ema éreana, eta te mavi'a'i ema Jesús.

³³Namutu ena achaneana tikawasana'i taye'e eta awasare tiúrujikawanapa te tapaja eta peti te mapena ema Simón.

³⁴Ema Jesús makanarakawakapa'i apanapaneneji eta jumareana najumanapa'i ena achaneana, tási'a makuchuchujikawakapa maverana ena éreanana. Wá'isera máisapa'ini naechejika'ini ena éreanana, taicha ena náimati'i ema.

³⁵Te tijarara'ipa, téchepukapa ema Jesús, tási'a tiuchukapa taye'e eta awasare. Tiyanapa eta te mayujarasirare'i.

³⁶Ema Simón, énapa ena machamuriana, tiyananapa natanupana'i ema Jesús,

³⁷tási'a te náichimawapa, náichapa: — Namutupa titanukaviana'i.

³⁸Émasera májikapawakapa: — Viyanayare te apana awasareana vichakayara'ana, eneichuware ánaki nukametarairuyare, taicha nutuparakasiwaichu'i, eta timitekanu'i.

³⁹Taka'e, ema Jesús tipaikapa tamutu eta te Galilea, tikametarairupaipa eta te petiana náurujisirarewa ena juriyuana, tási'a makuchukawakapaipa'i ena éreanana náwa'aruana'i ena achaneana.

⁴⁰Taka'e, maka'epaipa ema émana achane makajumakene karachame, témeña'awapa maye'e ema Jesús. Tépuyukapa te mamira'u, tási'a, máichapa: — Tata, nukasiñawa'i eta piye'e, pikanarakanupaini eta nujuma'i.

⁴¹Taka'e ema Jesús majapanuine'i ema; maemamakapa te mawa'u, majikapapa: — Nuwara'a nukanarakavi. ¡Puiti tajinapa pichirawaima'i!

⁴²Enewanepa tinaraka'i, waipa karachacha'aina'ini.

⁴³Taka'e, ema Jesús máewatakapa ema achane, matuparakapa wa'i makumetajirika:

⁴⁴— Pima'a wa'i pikumetajirika piyanayaresera pímerekawa maye'e ema tiyujarakara'i, pikamawa'uyarepa'i eta pi'asulupayachiraya taicha eta makanarasiravi'i taicha eta juka eta mawanairipi'i ema Moisés.

⁴⁵Taka'e tiyanapa ema achane, timétajirikapaipa'i namutu ena achaneana eta máichawakenewa'i. Eta taka'e'i, ema Jesús waipa máimerekawa'ini te awasareana, manasipa te tachachaku, énasera ena achaneana tiyananaichucha napaucha'i.