Read Ignaciano Marcos 14 Bible Online

Marcos 14 - Ignaciano bible

Marcos 14

¹Apinaine'i sache eta piesta tikaijare Pascua, eta táepanawaira eta nanisira'i eta pan maye'ere levadura. Ena tachutiri'ana naye'eana ena tiyujarakara'iana, tási'a énapa ena escriwánuana, natanuka'i eta náicharakayare eta nakaratasirayare ema Jesús, nawara'a'i nawayuakayare'i eta nakaratasira, tási'a étapa eta nakapasirayare'i.

²Énasera naka'e'i: — Wicha'a vikukarataka ema achichu eta juka piéstairaya, machu tája'apuka náicharaka'avi ena achaneana.

³Ema Jesús tiyana'i te Betania, te mapena ema tikaijare Simón, ema karachacha'aini'i. Taka'e, eta maejasira'i te mesa, títekapapa esu esena suámapa'i eta perfume te butella'ichicha, tikaijare nardo, táetaviucha'i eta tasiwachawa'i. Suvechuji'apa eta butella'ichicha, suépusasikapa eta táijiyeamakene perfume te máchuti ema Jesús.

⁴Natiari'isera ena wa'i náurika'ini eta suémepururesira'i eta tasiwachakene'i perfume, ánipa naka'e: — ¿Taja'a takayema suemepurureka eta juka tasiwachakene'i perfume?

⁵Tiúripana'ini takaijararekasi'ini eta juka táijiyeamakene, takutiwacha'i eta etana añu eta vikaematanera, vive'a'ini eta kamurikene plata, vímikatasi'a'ini ena páureana. Tási'a nakaeka'ijirikaipa'i esu esena.

⁶Émasera ema Jesús máichawakapa: — Ésamirika esu suka esena, ¿tája'a takayema ekaeka'i eti esu suka? Tétavikawa eta táuriwa eta suíchiranu'i.

⁷Ena páureana, tamutuchucha sácheana ekachanerawakayare ena. Te áwara'apapuka ímikataka. Nútisera wa'i nánasikenema'i eta eye'e.

⁸Esu suka esena suícha'i eta suímirata'aruwa'i: eta juka suépusa'asiranu'i eta perfume, sukainapuka'i esu eta suíjiyechira'i eta náke'e taye'eyare'i eta nukaekarasirayare.

⁹Nutupiruwa numetaka'e, nákani tikametarairuanayare eta tiurinakene echéjirirukawa, náechejisi'ayare eta juka suíchakene'i esu suka esena, témechanayare tamutu awasareana te juka apake'e.

¹⁰Ema Júlasi Iscariote, émaichu'i ema nachamuri'i ena dósekeneana'i máimitureana ema Jesús, tiyanapa maima'apanawaka'i ena tachutiri'ana naye'e ena tiyujarakara'iana, eta máijararesirayare'i ema Jesús.

¹¹Eta nasamira'i, tiúrisamureanaine'i, tási'a tíjarakawanapa eta náijarasirayare'i eta plata ema Júlasi, taka'e matanukapa eta maichararakayare'i eta máijararesirayare'i ema Jesús.

¹²Títekapapa eta sache táepanirawa'i eta tapiestara eta nanisiraya eta pan maye'ere lewadura, étaichuware eta jena sache, nakapasiraya eta uvesa tikaijare cordero taye'e eta Pascua. Ena máimitureana nayaserekapa ema Jesús: — ¿Távi'apuka piwara'a eta wakaiju'e vétupirisi'ayare eta vinisirayare eta uvesachicha te Pascua?

¹³Taka'e, mawanekawakapa ena apinana máimitureana. Máichawakapa: — Eyana te awasare. Ánaki iákapajikayare ema achane, tiámapa'i eta une te yupi, é'ikayare,

¹⁴tási'a te masiapi'ayare, emetakayare ema tikaye'e eta peti: ‘Ema Maestro tiwaneka'avi'i pímecha'avi: ¿Tavi'apuka eta cuartu nunisi'ayare te Pascua, nukachaneyare ena nímitureana?’

¹⁵Ema tímecha'enapa eta ichape cuartu te anuke'e piso, táurikeneipa'i eta jákara. Étupirisina'avipa eta viniruyare eta ánaki.

¹⁶Ena máimitureana tiuchukanapa, nakaiju'epa te awasare, étapaichu'i eta makayemakene'i ema Jesús, tási'a náetupirikapa eta naniruyare taye'e eta Pascua.

¹⁷Te mapikuku'ipa títekapapa ema Jesús makachanewakapa'i ena dósekeneana máimitureana.

¹⁸Eta nánisira'i te mesa, ema Jesús máichawakapa: — Nutupiruwa numetaka'e, marari'i ani te etaraku ema tíjararekanuyare.

¹⁹Ena ichapeine'i eta nakatisamurewaira'i, tási'a tepanawanapa tiyaserejirijikakanapa émanapachu: — ¿Nútipuka jákani?

²⁰Ema Jesús majikapawakapa: — Ema émana te etaraku eti dósekeneana, ema tétamuka'i eta pan te juka nukuruja.

²¹Ema Machicha ema Ajaira, títauchawayare'i maye'e eta táechejiriruwa'i eta Ajureka, ¡páuresamisera ema tíjararekanuyare! Tiúripanaichu'ini wa'i makuchuka'ini te suju'e esu máena.

²²Taka'e, eta nanisira'i, ema Jesús mave'apa te mawa'uana eta pan, tási'a, mayujarauchapa, mayuvetukapa máijarakawakapa ena, tási'a máichawakapa: — Éraya, eta juka eta náke'e.

²³Taka'e, mave'awarepa eta wasu náerirare, ma'asulupayachawarepa ema Viya, máijarakawarepa ena, tási'a namutupa teranapa.

²⁴Tási'a máichawakapa: — Eta juka eta nítine. Eta táepusairuwa'i, eta taitauchirawa'i eta vitratune, eta íti taepusairuwa'i naye'e ena ichapemurikeneana.

²⁵Yatupisera numetaka'e: Waipa nápechawaima'i néra'iwareni eta juka tachi eta uwa, tiámainukawa te táitauchawapa eta nusiapiraya te mawasa ema Viya akenuka te anuma.

²⁶Taka'e, te títawanapa, eta najiraira'i eta jirasare. Tuíchukanapa, tiyananapa te simena eta tikaijare Ulivukiji.

²⁷Ema Jesús máichawakapa: — Emutu eti ejunijikanuyare. Taicha taka'e'i eta taechejiriruwa eta Ajureka: ‘Nísapayare nakarataka ema Pastor eta nakapasirayare, tási'a téjanerepaikainapa eta uvesana.’

²⁸Té'esera te néchepukapa te nékari, napechawainapa nukurujika'e te Galilea.

²⁹Ema Pedro máichapa: — Tayanapane najunijikavi ena apamuriana nútisera wa'i nujunijikavima'i.

³⁰Ema Jesús májikapapa: — Nutupiruwa numetakavi: Puiti juka yati, te tamira'upaicha'a eta táechejisirayare eta warayu, mapa'eyare eta péñauchirawayare.

³¹Émasera tijaranurusi'i: — Tayanapane pímikapakanu, wá'ikenesera néñauchavima'i. Tási'a namutupa étaichuware naka'e'i eta naéchejiriruwa'i.

³²Taka'e, tíyananapa eta te tikaijare Getsemaní. Ema Jesús máichawakapa ena máimitureana: — Éjakaicha'a eta ani te juka, nuti nuyanayare nuyujarakayare.

³³Tási'a mámapa ema Pedro, ema Santiago, tási'a émapa ema Juan, tási'a tépanawapa eta máeñamirawa'i, tikatisamurewapa.

³⁴Máichawakapa: — Tétavikawa eta táeñamirawa muraka eta nusamure. Tawara'a tikapakanu. Áka'echa'a ani te juka, wá'isera ekuimaka, ekuneuchanu'i.

³⁵Tipaipanapa ánakipanachicha'i. Máetipaisinapa eta mamira te apake'e, tási'a mayaseakapa ema Viya, eta tájina takuemaituka.

³⁶Eta mayurasira'i maka'e'i “Abbá, Tata, tamutu eta piwara'akene titauchawa tájina temaitukavina, pikatajikanusera pikatiuchanu eta juka nichararakawaya, wá'isera takuitauchawa eta nuwara'akene nuti, étasera eta piwara'akene piti, eta taitauchawa.”

³⁷Tási'a, tichawapa eta te návi'a'i ena máimitureana. Máima'aine'i ena, tímakanaichucha. Máichapa ema Pedro: — Piti Simón, ¿pímakaichucha? ¿Wáipaine'i pímikatakanu'ini pijaneakanu'ini étanaina'ipukaini ura páka'e'ini?

³⁸Éjamiuchawa, eyujarauchawa apaesa eyaseaka ema Viya eta etumewaina wa'i makuituruka'e ema Wínaraji. Yátupi'ineni eta iáchanewana tarata'a'i tikaratakawa, étasera eta eche, wa'i tarata'aima'i tikaratakawa.

³⁹Taka'e, tiápechawawarepa tiyana tiyujaraka'i, eta mayujarasira'i, étaichuware maka'e eta máechejiriruwana'i.

⁴⁰Tási'a, tichawawanepa te návi'a'i ena máimitureana. Máima'awarepa tímakanaipaware, taicha muraka'i eta náechapune. Tájinaware nakayema'ini táichavene'i eta natsirira'i.

⁴¹Te mapa'ekenepa eta mayujarasira'i, tichawapa. Máichawakapa: — ¿Iápechawaipawa ímaka wícha'apuka enara'akakenéna'ini? Taratapa Jé'esare, puiti títekapapa eta nutupara'a'i nakaratasiranuya ena tikatianakanuana'i ena tikapekaturara'iana.

⁴²Échepukapa, viyanapa, márajapa ema tíjararekanuyare.

⁴³Téchejirikawaicha'a ema Jesús, maka'epainecha ema Júlasi, nachamuri ena ducekeneana maimitureana, mámamuri'apaipa ena kamurikeneana suntaruana, tikaepuchirikianapa'i, étapa eta naye'eana espada. Ena, wanairukana'i naye'e ena akenukara'ana'i enapa ena escriwánuana tachutiri'ana naye'e ena naiyakarana.

⁴⁴Ema Júlasi, tatiari'i'i eta máikutiarayare'i eta náimatirayare'i ena suntaruana ema Jesús. Ani maka'e'i eta máechejiriruwa'i ema Júlasi: “Ekunenuyare, ema nétserareruyare; ema ekaratakaya. Machu ekaitika, muraka eta ekaratasiraina.”

⁴⁵Taka'e, ema Júlasi témeña'awapa maye'e ema Jesús, máichapa: — ¡Tata Maestro! Tási'a maetserarekapa.

⁴⁶Taka'e, ena suntaruana enewanepa nakarataka'i ema Jesús.

⁴⁷Taka'e ema émana nachamuri, eta máimaira nakaratasira'i ema Jesús, mave'apa eta maye'e espada makijikapa eta machaka ema makajurure ema nákenumuri ena tiyujarakara'iana.

⁴⁸Ema Jesús máichawakapa ena achaneana: — ¿Tája'a takayema ekasiña eta espada, ekaepuchirikipa'iware eta ekaratasiranu, tímikutijirikawapa námera'i'ini nuti?

⁴⁹Étayapasika kape juka tamutu'i sácheana nukachane'e'i nímituka'e'i taye'e eta mapena ema Viya, wá'iware epatsikawa'ini ekaratakanu'ini. Taka'e'isera eta, títauchawayare'i tamutu eta taéchejiriruwana eta Takapika'ukene Ajureka.

⁵⁰Tijunarakanapa namutu ena máimitureana nanakikapa ema Jesús.

⁵¹Matiari'iware ema émana amaperu achane té'ikapa'i, tikaepaku'apa'i te sáwana. Taka'e, nakaratakawarepa ema.

⁵²Tijuna'isera, manakikapa eta máepaku'aini'i sáwana. Tiyanapa mamuriarepaipa.

⁵³Taka'e nakaitekapapa ema Jesús te mapena ema nákenumuri ena tiyujarakara'iana, tási'a, tiurujikawanapa ena tachutiri'ana ena tiyujarakara'iana, énapa ena náiyakarana, énapa ena escriwánuana.

⁵⁴Ema Pedro máe'iekene'apa'i ena, mayere'ipa'isera. Te tisiapapa, tisiapawarepa ema te taju'e eta canchón te mapena ema nákenumuri ena tiyujarakara'iana, tási'a téjakaipa'i makachanewakaipa'i ena suntaruana taye'e eta templo, tiasakawa'i te yuku.

⁵⁵Ena tachutiri'ana tiyujarakara'iana, énapa ena Akenukara'ana, natanukaipa'i eta maviureyare'i eta matapirawayare'i ema Jesús, wá'isera náichimawa'ini eta maviurewaina'ini.

⁵⁶Kamuriana'ineni ena tépiyaekene'ana'i ema, wá'isera tákutikaka'ini eta nakayemakeneana'i ena.

⁵⁷Titupi'anaware ena apamuriana tépiya'ira'iana. Ánipa maka'e'i:

⁵⁸Viti visama'i maka'e'i: ‘Nuti nákipaika eta templo náepiyaru'i ena achaneana. Tási'a, te mapanakenenapa sache, nímichawayare nukatupi'a eta apana. Wá'isera tákutima'i eta náepiyaru'i ena achaneana.’

⁵⁹Wá'ikenesera tákutikaka'ini eta náechejiriruwana'i naye'e ena apamuriana.

⁶⁰Taka'e, ema tachutiri'a tiyujarakara'i téchepukapa te namuri ena kamurikeneana achaneana, tási'a mayaserekapa ema Jesús: — ¿Tája'a takayema wa'i pijikapawaka? ¿Yátupipuka eta nakayemakene'i?

⁶¹Émasera ema Jesús timatinaichucha, wa'i majikapa'ini. Ema tachutiri'a ema tiyujarakara'i mapechaware mayasereka'i: — ¿Píti ema Cristo, ema Machicha ema Viya?

⁶²Ema Jesús máichapa: — Nuti'ichu'i. Tási'a eti íma'ayare ema Machicha ema Ajaira eta maéjasirayare te mawaure ema Máitupajijiaruwakene'i, tási'a eta maúkupaisirayare mási'ayare te anuma, támirayarepa'i eta úkajiana.

⁶³Taka'e, ema tachutiri'a tiyujarakara'i eta masamairisira'i, ichapeine'i eta masemira'i, tivetsayujiakawapa eta mamuiri'a eta masemanewa'i, tási'a maka'epa: — Émakenepa visama'i ema maka. Waipa tákamesa vitanuka'ini ena apana naimereucha'ini.

⁶⁴Puiti esamaipa eti, eta juka makayemakene'i tépiyakawa'i Machicha ema Viya, ¿tája'a ekayema? Taka'e, namutupa najikapa. Tikaviurewa'i etainapa táimikapaka.

⁶⁵Tepanawanapa, nátutuaka, tási'a náitiukichaware, tási'a naepuchirikawarepa naichapa: — ¡Te pijarauki'ipuka, pímatiyare nája'a'ipuka ema té'avi'i! Tási'a énapa ena suntaruana taye'e eta templo, náe'amira'apa te mamira.

⁶⁶Ema Pedro, matiari'i eta te canchón taye'e eta palacio, taka'e, suka'epaipa'i esu mawanara ema tiyujarakara'i,

⁶⁷tási'a te suíma'apa ema Pedro tiásakawa'i, suímararakapa, tási'a suíchapa: — Németeaka píti'ichu ñichamuri eñi ñika Jesús, Nazareno.

⁶⁸Ema Pedro teñauchawapa, maka'epa: — Wa'i nímati ema péchejisi'akene'i, wa'iware necha taja'apuka eta pechejisi'a'i. Taka'e tiuchukapa tiyanapa ema te tapajachakaya nauchusirare'i. Taka'e téchejikanecha eta warayu.

⁶⁹Esu nawanara suíma'awarepa tiápechawa ema Pedro. Suíchawakapa ena apamuriana: — Eñi ñika achane, éñi'ichu nachamuri ena té'ikana'i eñi Jesús.

⁷⁰Tiápechawawarepa ema Pedro téñauchawa. Taka'e te tiyerere'ichichapa, ena natiari'ikene'i náichawarepa ema Pedro: — Píti'ichu machamurivi ema Jesús, eta péchejisira, tímatikare'i eta piási'aira'i te Galilea.

⁷¹Taka'e ema Pedro tépanawapa majuracha'i, tási'a tiapechawawa majuracha'i maka'epa: — ¡Wá'ikenesera nímati ema achane, ema échejisi'akene'i eti!

⁷²Énewanepa téchejika'i eta warayu, api'epa eta taechejisira'i, tási'a ema Pedro maéchapa eta máichira'i ema Jesús: — “Te tamira'uinapaicha'a eta api'ekenénapa taéchejika eta warayu, píti mapa'enaipa eta péñauchiranuya.” Taka'e eta máechawaira'i, tíya'apa.