Read Ignaciano Marcos 15 Bible Online

Marcos 15 - Ignaciano bible

Marcos 15

¹Te tijarara'ipa, tiúrujikawanapa ena tachutiri'ana ena tiyujarakara'iana, nakachanewaka'i ena viyakarana, énapa ena escriwánuana: énapa ena Akenukara'ana. Námapa, naitivuchapa, námapa te mamira'u ema Pilato.

²Ema Pilato mayaserekapa: — ¿Jé'esareji Rey-vi'i píti naye'e ena juriyuana? — Pitupiruwa'i eta piyaseresiranu'i, — Majikapapa ema Jesús.

³Taicha, ena tachutiri'ana tiyujarakara'iana nametauchapa ema Jesús, kamuri eta maviurewa'i,

⁴Taka'e, mápechaware mayasereka ema Pilato, máichapa: — ¿Wa'i péchejiuchawa eta juka nametauchiravi'i? Kamuri eta piviurewa'i náicha.

⁵Émasera ema Jesús wá'ikene majikapa'ini, tási'a, máramipa ema Pilato.

⁶Ema Pilato te Páskuamu'uana, makaitikayare'i ema émana makaeratakene mákani nawara'akeneyare'i ena achaneana.

⁷Taka'e, matiari'i'i te nakaératairare ena ajairana, ichape eta naviurewa'i ena té'ajirikakara'iana te revolución, nakapasirapa'i ena achaneana. Te namuri, matiari'i'i ema achane tikaijare Barrabás.

⁸Ena achaneana titekapanapa tási'a tepanawanapa nayaseakapa ema Pilato máicha'ini eta maye'erepi.

⁹Ema Pilato májikapawakapa: — ¿Ewara'apuka nukaitika ema naeye'e Rey ena juriyuana?

¹⁰Taicha máimatiakaipa'i eta nametauchira'i ema Jesús ena tachutiri'ana ena tiyujarakara'iana, taicha nakápinaru'i ema.

¹¹Énasera ena tachutiri'ana naye'e ena tiyujarakara'iana náimitukapa ena achaneana, eta émaina máuchuku'a ema Barrabás.

¹²Ema Pilato mayaserekawarepa: — ¿Tája'asika nícharakayare ema tikaijare Rey naeye'e ena juriyuana?

¹³Ena najikapapa, tipiararekanapa: — ¡Pémetatareka te crusu!

¹⁴Ema Pilato máichawakapa: — ¿Tája'asika eta maviurewa? Énasera tipiararekanawarepa: — ¡Pémetatareka te crusu!

¹⁵Taka'e ema Pilato mawara'a'i tiúriyare'i naye'e ena achaneana, makaitikapa ema Barrabás, tási'a te taekenepa eta mawanesira'i eta naestaka, maijarakawakapa naetataka te crusu.

¹⁶Ena suntaruana námapa ema Jesús te taye'e canchón eta palacio tikaijare pretorio, tási'a nakurujikapa namutu ena suntaruana.

¹⁷Nanakawarepa eta muíriare mularume títsime, náitsamemakapa eta itapepi eta majarapiyare'i náicha.

¹⁸Taka'e tepanawanapa tipiararekana'i, nakawayuemarajipa: — ¡Píti naye'evi'iji Rey ena juriyuana!

¹⁹Tási'a náepuchisikapa te machuti taye'e eta kurinaki, nátutukichapa, naepuyumirauchawa tási'a natsukamirauchawa.

²⁰Te taekenepa eta nakaeka'ijirisira'i ema, navejamu'iakawarepa eta mamuiri'a títsime, namuiriachapa eta mamuiri'aichu, tási'a, nakuchukapa námapa eta te makaetataiyayare'i.

²¹Emana achane tikaijare Simón, maiya ema Alejandro, émapa ema Rufo, maitekapirawa'i ema te máesane. Eta maetavisirapa'i ema ánaki. Napamikapa ema manaraku'a eta macrusura ema Jesús.

²²Námapa ema Jesús taye'e eta tikaijare Gólgota (eta takayemakene'i: “Tavirare eta náperana ena naépenakeneana”),

²³tási'a náesichapa eta vino, tikasirikiama eta tikaijare mirra, émasera ema Jesús waipa majachapa'ini.

²⁴Taka'e, náetatakapa te crusu. Tási'a ena suntaruana, nasuerte'achapa eta mamuiri'a ema Jesús eta náijarajirisirakaka'i. Naima'ayare'i nája'apuka ema tiamayare'i eta.

²⁵Te náetatakapa ema, las nuéveipa'i eta yátikara'ira'i.

²⁶Tási'a nanakapa eta ajureka táechejisi'a'i eta tiviucha'i eta makaikuñaira'i: Ani taka'e'i “Ema Rey naye'e ena juriyuana.”

²⁷Natiari'iware ena tikaetatana'iware, ena apinana tiámera'iana, ema émana te mawaure, ema apana te sapane.

²⁸Taka'e, tamutu títauchawa'i eta táechejiriruwana eta Takapika'ukene Ajureka, ani taka'e'i: ‘Náimijacha'i ema nachamuri'i ena namaurikeneana’

²⁹Ena tiánukumirauchanapa'i, tépiupiusikawanapaipa eta nakaeka'irapaipa'i tási'a ánipa naka'e: — ¡Píti Pika'echejiriruwa'i eta piákipaisirayare'íji eta mapena ema Viya, piráta'a'iwareji pímichawa pikatupi'a eta mapanayareichu sache,

³⁰Piúkupaika te jara crusu, pikatiuchawa pítijiwaina!

³¹Éneichuware ena tachutiri'ana naye'e ena yujarakara'iana, nakaeka'ijirikaware ema, énapa ena escriwánuana. Náichajirikakapa: — Ema máka, makatiuchawaka ena apamuriana achaneana. Tási'a puiti wá'iware márata'a'ini émajiwaina'ini makatiuchawa'ini.

³²¡Te yátupina pítira'i ema Cristo, Rey-viye'e viti, israelítana pikatiuchawapa, piukupaikapa te jara crusu, apaesa visuapasarepa eta vímairaina'i! Ena tiámera'iana tikaetatana'iware te machakaya, éneichuware nakaeka'ijirikaware ena apanaware.

³³Te titekapapa, te tupiriku'a eta sache tási'a ticheku'a te las trespa kapere'i, timapikupa tamutu eta apake'e.

³⁴Etaichu'i eta jena ura, tipiarakapa muraka ema Jesús: — “Eloí, Eloí, ¿lemá sabactani?” Te véchejiriruwa, (ani taka'e: “Tata Nukaiyakene, Tata Nukaiyakene, ¿taja'a takayema pijunijikanu'i?”)

³⁵Taka'e, ena natiari'ikeneana'i ena tisamana'i, ániwarepa naka'e: — Esama, ema maka mapiaraka'i ema profeta Elías.

³⁶Taka'e ema apana tiyanapa tijunapapa máepanapa'i eta kajareji, maetamukapa te tisisika vino. Máitiakapa te kurinaki, tási'a máimikapayakapa te majaka ema Jesús, apaesa machuchujikayare'i, tási'a maka'epa: — Ésamirikachucha, víma'ayare te títekapayarepuka makukupaipana ema Elías te macrusura.

³⁷Émasera ema Jesús tiápechawawarepa tipiarareka'i muraka, tási'a tépenapa.

³⁸Tási'a, tétsayumekapa eta cortina taye'e eta mapena ema Viya, tepanawa te anuke'e, tícheku'a te apake'e.

³⁹Ema kapita romano, eta matupi'aira'i te mamira'u ema Jesús, te máima'apa eta maepenira'i, maka'epa: — Yátupikene'i ema maka achane Machicha'i ema Viya.

⁴⁰Natiari'iware ena esenana, nayerere'i'i eta naimararasira'i, Sutiari'i esu María Magdalena, esu apana María maena ema Santiago émapa José, tási'a ésupa esu Salomé.

⁴¹Ena nani esenana, ena náumuriwana ena té'ikarairikanapa'i ema Jesús eta mapaisirapa'i te mási'apa te Galilea. Natiari'iware ena kamuriana apamuriana esenana náitekapakene'i te Jerusalén, té'ikanapa'i ema.

⁴²Te kapere'ipa eta jena sachekene'i viernesi, ena títserereakawanaipa eta najachapiraya'i eta sawaru.

⁴³Ema José tikawasa'i te Arimatea, taka'e tétumechawapa, tiyanapa me Pilato, mayaseapana'i eta máke'e ema Jesús, taicha émaichu'i tikuchapa'i eta taitekapirayare'i eta mawasa ema Viya akenuka te anuma.

⁴⁴Máramine'i ema Pilato eta máija'úchirawa'i tépenawane ema Jesús. Tási'a, máimichu'apa ema nakapitara, mayaserekapa te yátupi'ipuka tépenaipa ema Jesús.

⁴⁵Tási'a, eta mametasira'i ema nakapitara ema Pilato, eta máepeniraipa'i ema Jesús, máisapapa naijaraka ema José eta máke'e ema Jesús.

⁴⁶Taka'e, ema José, mámapa eta tiúrina sáwana mawachareru'i. Tási'a, makukupaikapa eta máke'e ema Jesús, náyuruakapa taye'e eta tijapukene sáwana, náiyaraku'apa taye'e eta máekari eta te mari nasekajueru'i. Tási'a, naji'achapa te tapaja eta máekari.

⁴⁷Esu María Magdalena, ésupa esu María maena ema José, téjakana'i ena, náimararaka'i eta ekari.