Read Ignaciano Marcos 16 Bible Online

Marcos 16 - Ignaciano bible

Marcos 16

¹Taka'e te jena sache sawarukene'i, tiyanapa esu María Magdalena, esu Salomé, ésupa esu apana María. Tiwacharekanapa eta tíjiyekene perfume nayariasi'ayare eta máke'e ema Jesús.

²Te apanapa sache, lumínkukene'i, nayatirupa tiyanana te máekari. Te tiúchukapa eta sache, títekapanapa ena eta te máekari.

³Eta napaisirapa'i, tiyaserejirikakanapaipa'i: — ¿Nája'apuka tikaerajikayare eta mari, taji'a eta ñekari?

⁴Te'esera te, náima'apa eta mari tájinaipa'i te tapajakura eta máekari, eta juka mari ichapeme'i.

⁵Te tisiapanapa eta te máekari, náima'aine'i ema amaperu achane tejaka'i te waure, eta mamuiri'a tétavikawa'i eta tajapuwa'i. Ena esenana tiáramekanaine'i.

⁶Émasera máichawakapa: — Wa'i ekupika. Eti etánukapa'i ema Jesús Nazareno, ema makaetatakené'i. Májinaipa'i ani, téchepukaipa'i te máekari. Yare, íma'a eta juka mávineni'i.

⁷Eyana emétakawaka ena máimitureana, tási'a émapa ema Pedro: ‘Ema tiyanayare te Galilea, ánaki makuchapia'eyare ema. Échawaichu'i eta makayemakeneana'i.’

⁸Taka'e ena esenana, tiúchukanapa te máekari, tiyananapa. Eta nayanira'i, nájinasera nametaruina'ini, taicha eta napisira'i.

⁹Eta máechepusira'i ema Jesús te máekari te jena lumínkukene'i, te yátikara'i sutiwapa máimeresiawa'i suye'e esu María Magdalena. (Esu suka María esu máepachiaru'i ena siétekeneana éreanana te suáke'e.)

¹⁰Esu tiyanapa, sumetapanawaka'i ena té'ikanaini'i ema Jesús. Ena, tétavikawa'i eta napanerechira'i, tási'a tíya'ana'i.

¹¹Eta juka eta nasamira'i, wá'isera nasuapa'ini eta sumetarapi'i, eta máechepusira'i ema Jesús eta machavira'i títareka, étapa eta máimeresirawa'i eta suye'e.

¹²Te táekenepa eta juka, tímerekawawarepa ema Jesús naye'e ena apinana máimitureana eta napaisirapa'i, nakaiju'eirapa'i eta awasarechicha. Ti'ápamuichawa'isera eta mamira. Wa'i náimatiwane'ini ema.

¹³Taka'e, tichawawaneanapa nametapana ena apamuriana nachamuriana. Wá'iwaresera nasuapa'ini ena apinana, eta nametasira'i.

¹⁴Tiuri, te táekenepa, tiúrujikawana'i eta nanisira'i ena únsekeneana maimitureana. Taka'e, tíja'uchawapa tímerekawa ema Jesús eta naye'e. Makajachamuripa eta namasuapira'i eta nametarapiana'i, ena tíma'ana'i ema eta máechepusiraipa'i.

¹⁵Tási'a máichawakapa: “Eyana epaika tamutu eta awasareana eta te juka apake'e, ekametarairuyare eta tiúrina echéjirirukawa naye'e ena achaneana.

¹⁶Nukuchuku'awakayare namutu ena tisuapajira'ianaya ena tikaikachasianaya. Énasera ena wa'i tisuapana, tikaikuñanayare.

¹⁷Ena tisuapajira'iana náimerekayare eta juka tiáramikareana: Náimijunijikayare ena éreanana naye'e ena achaneana, taicha námapikayare eta níjare. Náitukayare téchejikana eta apanana echéjirirukawana namaitukakeneana'i

¹⁸te nakarataka'ipuka eta kichareana, tájina táicharakaima'i, te térana'ipuka eta veneno, tájinaware náichawaima'i. Nanakayare eta nawa'uana naye'e ena nákani nakajumakeneana, tinarakanayare.”

¹⁹Taka'e, te títawapa tamutu eta mametarapiana'i ema Viákenu Jesús, tiyanapa tiyapa te anuma. Ema Viya makaejakapa te mawaure.

²⁰Taka'e, tiyananapa te tamutu awasareana ena máimitureana, tikametarairuanapaipa eta tiúrinakene echéjirirukawana. Ichape eta máimikatasirawakapa'i ema Viya. Tétavikawa'i tajakapakarewa'i máicha, eta náimiturapianapa'i. Taicha máijarakawakapa'i eta náimeresirapa'i eta tiáramikareana tikunachakareana'i.