Read Ignaciano Marcos 3 Bible Online

Marcos 3 - Ignaciano bible

Marcos 3

¹Ema Jesús tisiapawarepa te peti náurujisirarewa ena juriyuana, tási'a matiari'i ema émana achane, tépenawa'u'i eta mawa'u.

²Tási'a najiñañararaka'i ema Jesús, eta maipuchirayare'i ema achane te jena sache sáwarumu'u. Natanunuirika'i eta tiviuchayare'i.

³Taka'e ema Jesús máichapa ema achane tépenawa'u'i: — Péchepuka, tási'a pitúpi'a ani te namira'u.

⁴Tási'a, mayáserekapa ema apana: — ¿Taja'apuka táurika víchayare te sawarumu'u: víchayare eta táurinakene, étapuka víchayare eta tamaurikeneana? ¿Táurikapuka vipuchawaka ena achaneana? ¿Vikaparekapuka? Énasera tímatinamurianapa.

⁵Taka'e ema Jesús máesenimuri'apa ena tichayakana'i, tisemaine'i, katisamurewaine'i taicha eta namúrakasamurewa'i ena achaneana, maichapa ema achane. — Pikánukecha eta piwa'u. Ema achane énewanepa makanukecha'i eta mawa'u, tási'a tinarakapa.

⁶Énasera te tiuchukanapa ena fariséuana tepanawanapa eta napanerechira'i, tisamakakanapa ena machanerana ema Aluresi, eta nakapasirayare'i ema Jesús.

⁷Ema Jesús tiyanapa te tachausi eta kákiure, mámapa ena máimitureana. Náe'ikaware ena ichapemurikeneana achaneana tikawasana'i te Galilea.

⁸Te nasamairikapa eta máichakeneana'i, títekapanapa ena ichapemurikeneana achaneana, tiási'ana'i te Jerusalén, te Judea, te Idumea, te'epa te tinapaika eta Jordán, enapa ena tikawasana'i te Tiro etapa te Sidón.

⁹Eta taka'e ema Jesús matuparakawakapa ena máimitureana natsesina'ini étasina eta pakure, apaesa wa'i nakútupiaraka ena ichapemurikeneana achaneana.

¹⁰Taicha kamurianaipa'i ena makanararuana'i ena nakajumakeneana, namutu ena nakajumakeneana nawara'a'i náemama'aka.

¹¹Taka'e ena éreanana tiáwa'akana'i ena achaneana, te náima'apa ema Jesús, tíakipaikawanapa te mamira'u ema. Tipiararekanapa: — ¡Pítira Machicha ema Viya!

¹²Tási'asera ema Jesús mawanekaipa'i muraka wa'i nakumetajirika, eta émaira'i tikanarakawaka'i.

¹³Te taekenepa ema Jesús tiapanapa te tapusi eta mari, tási'a maichu'awakapa ena maimitureana makurujiruana'i,

¹⁴manerejikapa ena dósekekeneana maye'eanayare'i apústule. Matuparakawakapa tauri eta nakametarairuraya eta maechejiriruwa,

¹⁵taka'e máijarakapa eta náitupajijiasirawaya, narata'airayare nakuchuka ena éreanana tiáwa'akana'i ena achaneana.

¹⁶Ena nakana ena dúceana manerejiruana'i: Ema Simón tikaijareware Pedro.

¹⁷Ema Santiago émapa ema maparapeichu Juan, machichanaveana ema Zebedeo, ema kapija'i Boanerges (eta takayemakene'i, “tachicha eta tirureka”)

¹⁸ema Andrés, Felipe, Bartolomé, Mateo, Tomás, émapa ema Santiago machicha ema Alfeo Tadeo, ema Simón ema Cananeo,

¹⁹émapa ema Júlasi Iscariote, ema tíjarareka'i ema Jesús.

²⁰Taka'e, tichawapa ema Jesús te maitekapirare. Tiápechawanawarepa tiúrujikawana ena achaneana. Taka'e waipa náitujikawa'ini tinikana taicha tétavikawa'i eta nasimutuwa'i ena achaneana.

²¹Ena maparapenaveana ema Jesús te nasamairikapa, tiyananapa náepanayare'i ema, taicha náimijachaipa'i máurishi'i.

²²Éneichuware ena escriwánuana náitekapirawa'i, násinepa'i te Jerusalén naka'epa: “Ema Beelzebú, émakene'i ema nákenumuri'i ena éreanana, éma'i tijaraka'i eta máitupajijiasirawa'i ema maka achane, eta makuchusirawaka'i.”

²³Ema Jesús máichu'awakapa, máimikutichinapa ánipa maka'e: “¿Ímijachapuka ema Wínaraji maimijunaya ema apana Wínaraji?

²⁴Nímikutichina'eya, ena machanerana ema akenuka, ena wa'i típutsimuri'akakanaima'i, te tiputsimuri'akakanapa énajikakainapa tiakipaikakana,

²⁵émaipa mákani achane te kamuriana'i ena machichanaveana, wáipaine'i típutsimuriawanaima'i náe'ajirikaka'ini.

²⁶Éneware maka'e'i ema Wínaraji, te maiputsikawa, waipa makurata'a'i makurujikawaka ena manerejiruana. Taka'e titekapainapa eta maitavira.

²⁷“Nájina tirata'aina, masiapiraina'ini te mapena ema achane túmekene'i. Takamunu'i nakaratakanumayare, náitiakanumayare'i ema, jé'esare náituruyechasareyarepa eta máima'akeneana.

²⁸“Nutupiruwa numetaka'e, ema Viya maemetavikaya eta naviurewana'i nákani achaneana eta napekaturana, tamutu jákani naka'ira'i:

²⁹te'esera mákaini kaeka'i'i ema Machanewa Viya, tajinapa majapanukarewaina, maitawakakainapa eta maikuñayare.”

³⁰Taka'e'i eta máechejiriruwa'i ema Jesús, taicha ena tachutiri'ana naimijachapa mawa'aka'i eta machanewa éreana.

³¹Taka'e, titekapanapa esu maena énapa ena maparapenaveana ema Jesús, te naurujisiawa'i tási'a nanasipasera nakuchapa te aneka taka'e naimichu'apa.

³²Enasera ena kamurikeneana achaneana nachayaka'i ema Jesús naichapa: — Esu pena, énapa ena piparapenaveana narari'i ani te aneka tanukaviana'i nawara'a'i techejikaviana.

³³Taka'e ema, majikapapa: — ¿Naja'asika ena yatupikeneana'i, meme, nuparapenaveana?

³⁴Taka'e, máesenimuri'apa ena téjakana'i te machakaya, maka'epa: — Je'eware ena nani tejakana'i te nuchakaya, ena memeana'i, enaichuwa nuparapeana'i.

³⁵Taicha namutu nákani naicha eta mawanairipi ema Tata, ema nuparape esu nuparape, esu meme'i.