Read Ignaciano Marcos 4 Bible Online

Marcos 4 - Ignaciano bible

Marcos 4

¹Taka'e, tepanawawarepa tímitureka'i ema Jesús te tachausi eta kákiure. Kamuriana'iware ena achaneana títekapauchana'i ema Jesús, tási'a tíawaku'apa te pakure téjakapa eta máimituresira'i. Ena achaneana nanasipa eta te tachausi eta te tiájipa'i.

²Taka'e, tepanawapa timitureka'i, kamuri eta máimikutichakeneana'i eta máimitusirawaka'i. Eta máimituresira'i máichawakapa:

³“Esamanuicha'a eta juka: Matiari'i ema achane, tiyanapa téwapana'i te máesane.

⁴Eta mapaisirapa'i témirikapa eta táki te achene. Tási'a eta nanukuirapa'i ena achaneana, nákatayayajikapa eta táki táemiriru'i te achene. Tási'a te táima'apa eta káyureana, tanikapa.

⁵Tási'a, eta apamuri témirikapa te wá'ichu tamitutu'ini eta máteji, taicha máripa'i eta apake'e. Tímarukawanepaneni táicha,

⁶té'esera te tíjurepa eta sache, takapajikapa, taicha wá'ichu táuparewaka'ini.

⁷Tási'a eta apamuri témirikapa te tatarakukuji eta itapekiji, tiúrina'ineni eta táimarusira'i, étasera eta itapejiana takachurikapa eta tajurusira'i, táepakuchapa eta sukurekana. Tánasipa, waipa taka'i'ini.

⁸Étasera eta apamuri témirikapa te tiúrina máteji, tási'a tiúrinapana'i eta tajurusira'i. Eta étajawa takaye'e'i treintaki eta táki, eta apana takaye'e sesentaki, eta apana takaye'e cienki.”

⁹Tási'a maka'epa ema Jesús: “Nákani tikakiñana'i nasamararaka.”

¹⁰Taka'e, te najunijikapa ena achaneana, témeña'awanapa eta maye'e ema Jesús ena dósekeneana máimitureana, nayaserekapa tája'apuka takayema'i eta máimikutichakene'i maye'e ema téwakara'i.

¹¹Taka'e, májikapawakapa: “Émasera ema Viya timimaticha'e eti, eta juka maeñaure'i te mawasa ema Viya akenuka te anuma, énasera ena tiavi'ana te aneka, apana eta nimitusira énasera nimikutichinayare'i apaesa nákaikutiaranu,

¹²apaesa tayanapane naimararaka wa'i nakukaikutiara, tási'a tayanapane nasamararaka wá'isera nakukaikutiara.

¹³Taka'e máichawakapa: “¿Wa'i ekaikutiara'ini eta juka nímikutiarachakene'i? ¿Waipaine'ipuka ekaikutiaraima'i eta apamuriana?

¹⁴Ema tewakara'i, takuti ema techeisi'a'i eta echéjirirukawa.

¹⁵Eta ewaraki taemiriru'i te achene, makuti'i ema achane tisama'i eta echéjirirukawa. Émasera ema Wínaraji mayurukapa wa'i máisapa'ini tánasi'ini te nasamureana, naemitisikapa eta echéjirirukawa masamakene'i.

¹⁶Ena apamuriana nakuti'i eta ewaraki takaewakene'i te tatarukukuji eta máripa'i: te nasamararaka eta echéjirirukawa, natupiruwane'i nasuapa,

¹⁷wá'isera nárata'a'ini yatupina'íni, wa'i nakuti'íni eta ewaraki tiúpare, ánipichu eta náe'isira'i, taicha wa'i nakamicha'ini, wá'iware túmesamureanaina'ini eta nakatichaira ena achaneana, enewane vemitisika eta vikasiñaira'i ema Viya.

¹⁸Natiari'iware ena apamuriana achaneana nakuti eta ewaraki takaewakene'i te tatarakukuji eta itapekiji, te nasamararaka eta echéjirirukawa,

¹⁹étasera eta tawayuakawaka'i eta tájiparakana eta náitaresira. Ta'apapirikawaka'i eta nawaraira'i kaima'akeneana, tamutu eta juka táemetavika'i eta nawaraira'i té'ikanuana.

²⁰Natiari'isera ena apamuriana achaneana nakuti eta tiúrina máteji. Ena, nasamararaka'i náunaka'i yátupi eta nímiturapiana, nakuti'i eta ewaraki te tetupikawa, eta étajawa takaye'e'i trainta eta apana takaye'e'i sesenta eta apana takaye'e cien.”

²¹Éneichuware maka'ewarepa: “Waipaine'i nayustakaima'i eta yukupi, tási'a nanakapapukaini te tápeku eta náetsatsame te náimasirare, takamunu'i nanakayare'i te anuke'e, apaesa tamikauchasarepa tamutu,

²²Takutikene, tayanapanepuka tajina tiyumurukawaima'i, eta naeñaureana, tamutuyare'i téchakareya, tájinaware tépakuchaima'i jákani nayumurureana, tamutuyare'i téchakareya.

²³Ena nákani nakakiña, nasamaine.”

²⁴Éneichuware máichawakapa: “Epanerecha eta esamakeneya. Etaichu eta íkutiriki'i naye'e ena apamuriana, éneichuware ema Viya tijaraka'eyarewa eti, eta íkutiyarewa murakapanaya.

²⁵Taicha ema tikaima'akene najanechinaya eta apana maima'akeneya, emasera mákani achane tajina maima'akenena naverejinaya tamutu eta maima'akeneanaini tayanapanepuka ánimurichichaichu.

²⁶Taka'e ema Jesús máichawakapa: “Eta mawasa ema Viya akenuka te anuma, yátupi'i eta nasuapira'i eta maimiturapiana, arairu eta napanereruana. Takuti'i eta máewaraki mákani achane téwaka'i te máesane:

²⁷tayanapane ema achane timaka'ipuka, tejamika'ipuka, yatimu'u, sachemu'u. Eta sera ta éwaraki tímarukaichucha. Tijurukaware, wá'iware makaikutiara'ini eta tajurusira'i.

²⁸Taicha eta apake'e, eta tikaimaruka'i. Takuchuka'i tatiwa eta tapakaji, táe'ikapa eta taenaki. Te tika'ipa, tiúchukapa eta takiana.

²⁹Te tiya'apa eta vewaraki, tikaechatijipa, taicha étainapa eta tavirawa eta ta'i.”

³⁰Ániware maka'e ema Jesús: “¿Taja'apuka takuti eta mawasa'i ema Viya akenuka te anuma, taja'apukaini vimikuticha'ini?

³¹Takuti'i eta taki eta mostaza takaewakene te maesane ema achane. Ímatichu'i eti ánichichapana'i taye'e eta apamuriana ewarakiana taye'e te juka viawapairu apake'e,

³²tási'asera te tímarukapa, tiúnayare'i eta táenaki, takutiyare'i eta yukuki eta táichapewa, takachurikayare'i eta apamuriana ewarakiana, járajapainapa eta káyureana, táepiyakainapa eta tamakajiana te tatawawajiana.”

³³Ema Jesús máimikutiaracha'i eta máimitusirawakapa'i, apaesa nakaikutiara eta máimiturapiana, apaesaware náituruekene'a eta máechejiriruwa.

³⁴Tájina éta'ena te tímitureka, wa'i makunaka'ini eta máimikutichira. Té'esera te makarichupa énapa ena máimitureana, máimikaecherachapa tamutu eta máimikutiarachakeneana'i.

³⁵Te kápere'ichichapa, etaichu'i eta jena sache, máichapa ema Jesús ena máimitureana: — Viyana te apachara eta kákiure.

³⁶Taka'e nanakikapa ena achaneana, tási'a námapa ema Jesús te pakure. Náe'ikapa ena apamuriana te apanaware pakure makachanewakapaipa.

³⁷Te tupierekanapa, tachimarakapa eta muraka tékatikawa, tépakukapa ichape eta kákiure, tiane'ipa tepacharakawana, eta napakure tinikapa eta une.

³⁸Émasera ema Jesús tave'apa eta ichapu timakapa te ta'ivu eta pakure te machunusi'i. Nakajamikapa ema, tási'a náichapa: — ¡Tata Maestro! Pikatiucha'avi, vérikainapa, ¿wá'ipuka péñamawa eta verisiraya?

³⁹Ema Jesús téchepukapa mawanekapa taemajakawa eta tékatikawa, tási'a máichapa eta ichapeama une: — ¡Pamatina! ¡Pésamirikawa! Taka'e eta tékatikawa temajakawapa, tájinapa táichirawaina'ini.

⁴⁰Taka'e, ema Jesús máichawakapa ena máimitureana: — ¿Tája'a takayema iárameka'i, wicha'a'i ekasiñawa'ini eta eye'e?

⁴¹Ena tétavikawaine'i eta náramira'i. Tiyaserejirikakanapa: — ¿Naja'apuka ema maka, taicha tamutu'i tasuapa'i, makamatinaka'i eta tékatikawa, étapa eta táepakusira'i eta kákiure?