Read Ignaciano Marcos 5 Bible Online

Marcos 5 - Ignaciano bible

Marcos 5

¹Títekapanapa te apachara eta kákiure te apake'e Gerasa.

²Te tiúkupaikapa ema Jesús te pakure, temeña'awapa ema émana achane máwa'aru'i ema machanewa ema éreanana. Ema maka achane mauchujisine'i te ekari,

³taicha makapenajuecha'i eta. Nájina nárata'a'ini náitiaka'ini ema, etaipa eta ichapepi cadena wa'i tárata'a'ini.

⁴Taicha máeje'aipa nakarataka, náitiwaucha'i te cadena, nanakaware eta grillo te mapiki, émasera mavenarurujika eta cadena, etapa eta maye'e grillo etasera nájina narata'a'ini namansucha'ini ema maka achane.

⁵Tamutu sacheana, yatiana tipiararereka'i te maripa'i, te'eware te ekari, temestakerekawapa'i, tijarachawa'i te márija'iana.

⁶Te'esera tiyere'ipaicha'a, máima'apa ema Jesús, tijunapapa mapauchapana'i, máepuyumirauchapa te mamira'u ema

⁷maka'epa eta mapiararesira'i: — ¡Wa'i pikuimisiapawa nuye'e, Jesús, Machichavi'i ema Viya! ¡Pájapanunu, wícha'a pikuwanekanu te nukaikuñaiyayare!

⁸Taka'e'i eta máechejisira'i, taicha ema Jesús mawanekaipa'i: — ¡Iuchuka eti machanewa éreanana, enakika ema achane!

⁹Ema Jesús mayaserekapa: — ¿Tája'a píjare piti? Ema majikapapa: — Nukaijare nasimutuwa, taicha kamuri'avi'i.

¹⁰Tási'a ichapepa eta mayaseuchirawa'i maye'e ema Jesús, apaesa wa'i makuakijika ema machanewana ema wínaraji eta te nawasa.

¹¹Ánaki te tachaya eta mari, tatiari'iwaka'i eta kamurikeneana kúchiana tini'ikana'i,

¹²taka'e, ena éreanana tiyaseuchawanapa maye'e ema Jesús: — Písapa'avi visiapa'akawaka eta jénana kúchiana.

¹³Taka'e, ema Jesús makuchumuri'apa te máke'e ema achane, máisapapa nasiapa'akawaka eta kúchiana. Taka'e te tasamapa eta kúchiana, eta nasiapa'asirawaka'i ena éreanana, tijunaparakanapa témiririjikanapa te tachausi eta kákiure téririjikanapa.

¹⁴Ena tijaneakanaini'i eta kúchiana, tiuchukanapa tijunanapa, tiyananapa timetajirikanapaipa te awasare te'epa te wama'iana, tamutu eta taichawakenewa'i. Taka'e ena achaneana tiyananapa náima'apana eta naichararakawa'i.

¹⁵Te títekapanapa, náima'apa ema achane náwa'aruini'i ena éreanana, téjakaipa'i te machakaya ema Jesús. Tájinaipa máichirawaina'ini tikamuiri'aipa'iware. Tási'a ena achaneana eta naimaira'i tipikanaine'i,

¹⁶te náitametakapa ena tíma'ana'i eta táichawakenewa'i eta kúchiana, etapa eta makuchuchujisira'i ena éreanana te make'e ema achane.

¹⁷Taka'e tepanawanapa nayaseaka ema Jesús wa'i makuitekapa'ini te náwasana, machawa'ini te másine'i.

¹⁸Te tiáwaku'ayarepa ema Jesús te pakure, ema achane manararu'i makamesapa eta mawaraira máe'ika ema.

¹⁹Émasera ema Jesús, wa'i máisapa'ini, maichapa: — Piyanachucha te pipena pichawa naye'e ena pijaneanana te piáwasa. Pimetakaya eta makanarasiravi'i ema Viya, taicha eta majapanuiravi'i.

²⁰Tiyanapa tichawa'i ema achane, mametakawakapaipa namutu eta makanarasira'i ema Jesús. Náramine'i namutu ena tikawasana'i eta tikaijare Decápolis, ichapeine'i nárami eta manarasira'i.

²¹Te tichawapa ema Jesús te pakure, eta masi'airapa'i te apachara eta kákiure, náurujiakapa ena ichapemurikeneana achaneana, tási'a ema manasipa te tachausi.

²²Taka'e, titekapapa ema nakenumiri ena juriyuana, ema tikaijare Jairo. Ema tuparairuka'i taye'e eta peti náurujisirarewa ena juriyuana. Te máitekapauchapa tépuyukapa te maiwapechakaya ema Jesús

²³taka'e makamesapa muraka maichapa: — Esu nuchicha téñamajirikawaipa. Pikatajikanupaini pinasinanu'ini eta piwa'u suye'e, apaesa suitareka.

²⁴Ema Jesús, tiyanapa máe'ika'i ema achane, náe'ikawarepa ena kamurikeneana achaneana naenumu'uchapa tikapiti'ejikakanaipa ena.

²⁵Te natarakumuri ena kamurikeneana achaneana, sutiari'ipa'iware esu esena sukajumakene'i, doce añuipa'i eta sukajumaira'i táichira'i eta suítine.

²⁶Ichapeipa eta sukatajiwaira'i taicha kamurianaipa ena típuchana'i médicuana. Títa'aipa eta suíma'akeneanaini'i, tájinasera wa'i suátiware'ini, suwayu'apaichucha eta sujuma.

²⁷Te susamairikapa eta naechejisi'aira'i ema Jesús, esu suka esena sukasirikimuripa ena achaneana, supauchapa te makeku suémamakapa eta tacheyarapi eta mamuiri'a.

²⁸Taicha nupanereru'i: “Taratachuchaini némamajiaka'ini eta ñimuiri'a, apaesa nunaraka'ini.”

²⁹Taka'e, te suémamakapa eta mamuiri'a. Enewaneine'i tícheka eta suítine, tisamawapa eta suake'e esu eta sunarasiraipa'i taye'e eta sujumaini'i.

³⁰Ema Jesús makaikutiarawanepa eta tauchusira'i eta máitupaijiasirawa. Enurujipa téviurukawa'i te namurikene ena achaneana mayaserekawakapa: — ¿Nája'a témamajiakanu'i?

³¹Ena máimitureana naichapa: — Ena achaneana namutupa, téñatu'ejirikaviana'i tási'a ‘¿piyasereka'avicha'awa naja'a'ipuka témamajiakaviana'i?’

³²Émasera ema Jesús máesenimuri'apa, matanukapa nája'apuka ena témamajiakana'i.

³³Tási'a, supauchapa esu esena suecha'i eta ésuira'i, tiyayakareipa eta supisira'i, suécha'i eta suíchakene'i esu. Suépuyumirauchapa te mamira'u, sutupiruwapa sumetaka.

³⁴Máichapa ema Jesús: — Nuchicha pinarakapa puiti táichavene'i eta pikasiñawaira'i me Viya. Wa'i pikueñamawa, waipa tichawaima'i eta pijumaini'i.

³⁵Wicha'a maitapirika'ini eta maéchejirisirawa'i ema Jesús, te títekapananecha ena achaneana tiási'ana'i te mapena ema nákenumuri te peti naurujisirarewa ena juriyuana, nametakapa: — Esu pichicha tépenaipa, ¿waipa pikukamesa ema Maestro?

³⁶Émasera ema Jesús, wa'i masuapa'ini eta namétasira'i, mawara'aichucha tiyana, taka'e máichapa ema nákenumuri te peti naurujisirarewa ena juriyuana: — Wa'i pikueñamawa, pikasiñawachucha me Viya, esu pichicha titarekayare.

³⁷Tási'a waipa máisapa'ini náe'ika'i ena apamuriana, nakarichu'i ema Pedro, Santiago, émapa ema Juan, ema maparape ema Santiago.

³⁸Te títekapanapa te mapena ema tachutiri'a, eta peti naurujisirarewa ena juriyuana, máima'apa ena achaneana, waipa náitukakara'a'ini, tijajamuri'anapa eta náiyaira'i, tipiararekanapa muraka,

³⁹siapapa ema, tási'a máichawakapa: — ¿Tája'a takayema eta íya'arakawa'i? Esu suka amaperu wa'i suépena'ini tímakaichucha.

⁴⁰Ena achaneana nakaeka'ichucha ema Jesús tékawanapa, émasera makuchukawakapa namutu, tási'a tisiapapa te suávi'a'i esu amaperu, ema suiya, ésupa esu suena, énapa ena té'ikanapa'i,

⁴¹makaratawauchapa esu tási'a máichapa: — Talita cum (tevechejiriruwa ani taka'e: ‘Nuchicha, néchejikavi, péjamika, péchepuka.”)

⁴²Énewanepa téjamikapa, téchepukapa, tipaikapa te namira'u. Ichapeine'i eta náramira'i ena achaneana, esu amaperu doce añuipa sukaye'e'i.

⁴³Émasera ema Jesús mawanekawakapa náijaraka eta sunika esu amaperu. Matuparakawarepa muraka eta wa'i nakuechejisi'a eta náima'akene'i.