Read Ignaciano Marcos 6 Bible Online

Marcos 6 - Ignaciano bible

Marcos 6

¹Ema Jesús tichawapa te máwasa apake'e, tási'a nae'ikapaipa ena máimitureana.

²Te titekapapa eta sache sáwarumu'u, tiyanapa taye'e eta peti náurujisirarewa ena juriyuana, tepanawapa timitureka. Tási'a kamuriana ena tisamararakana'i ema Jesús, tási'a tiyaserejirikakanapa, ichape eta narami ena: — ¿Tavi'apuka makarawa'uine ema maka eta juka? ¿Távi'apuka maviya'i eta maitukakene?

³¿Wa'i émaina ema maka, ema carpintero suchicha esu María, maparape ema Santiago, ema José, ema Judas émapa ema Simón? ¿Tási'a wa'i ánina navi'a ena esenana maparapenaveana, tikawasana'i eta ani viye'e? Tási'a wa'i nasuapa'i ema.

⁴Émasera ema Jesús máichawakapa: — Nájina tijakapaina ema profeta, máuchure'i te mawasaichu, taicha ema majaneana'i, te'esera te apanana awasare najachapayare'i.

⁵Wá'isera maicha'ini ánaki eta tiáramikare, takarichu eta makanarasira'i ena nakajumakeneana eta máemama'asirawaka'i te mawa'uana.

⁶Tási'a ichapeine'i eta náramira'i ena, taicha ena achaneana wa'i nasuapa'ini ema. Ema Jesús tamutu'i mapaika eta awasarechichana tachakayara'ana, tímiturekapa'i.

⁷Taka'e maichu'apa ena dósekeneana máimitureana, tási'a, tepanawapa mawanekawakapa, apinanapa'i eta napaisirayarepa'i, máijarakawakapa eta náitupajijiasirawayare narata'airayare nákijika ena éreanana.

⁸Mawanekawakapa, takuija nakuama eta napaisirayarepa'i te achene etachucha námayare eta nayupairiki. Wá'iware nakuama eta naniruruku'a te sara'i étapa eta plata.

⁹Tiúrisera eta nakaeparupewa, wa'isera ekuama eta apana taitsiwaina tarataichu eta te ekaye'ekene te iake'e.

¹⁰Taka'e máichawakapa: — Te ítekapapa taye'e eta jákani peti ítekapi'aya, enasinumayare taye'e, tiámainukawa te táitekapa eta iúchusirayare te awasare, epaenumawaya ejunijika eta ítekapi'a'i.

¹¹Te wá'ipuka nakujakapa'e te jákani awasare, wá'iware nakuwara'a nakusama'e, iúchukawaneyare. Étatapewachawanumayasera eta máteji te íwapeana táikutiarayare eta máikuñasirawakayare ema Viya, taicha eta namawaraira'i najakapa'e'ini.

¹²Taka'e tiyananapa ena máimitureana kametarairuanapaipa naye'e ena achaneana, apaesa nainajika eta napekaturana eta naichira eta tamaurikeneana, nachawa naimati ema Viya.

¹³Taka'e nakijikapaipa ena ereanana, nakanarakapaipa ena nakajumakeneana kamurikeneana nayari'akapaipa taye'e eta aceite.

¹⁴Ema rey Aluresi, masamairikapa ema Jesús, taicha náechejisi'a'i namutu ena achaneana. Ena apamuriana naka'e'i: “Ema Juan Tikachasirikara'i, tichawa'i téchepuka te máekari, táitusiawa máituruka'i makuchuka eta tiáramikareana.”

¹⁵Ena apamuriana naka'e'i: “Émara ema profetaini Elías.” Tási'a ena apamuriana: “Émaichu'i profeta, nakutikene'i ena antivuanaini profetana.”

¹⁶Te masamairikapa eta jukana ema Aluresi, maka'epa: — Émaipa'i ema Juan. Nútijakaruwa'i nukawanairipi náechatinuka, puiti téchepuka'i te máekari.

¹⁷Taicha ema Aluresi mave'a'i esu Herodías, esu mayena'i ema maparape Filipo, taka'e étapa temerataka'i ema Juan, makasiapapa te nakaeratairare.

¹⁸Taicha ema Juan máichapa ema Aluresi: “Wa'i tiuri eta pichakene'i pive'a'i esu pichinena, mayena'i ema piparape.”

¹⁹Esu Herodías, tétavikawa eta sukatichira'i ema Juan, suwara'a'i sukapaka, wá'isera suitujikawa'ini,

²⁰taicha ema Aluresi tipika'i, taicha máecha'i eta masantuwa'i ema. Eta taka'e'i, makatiucha'i ema, apaesa takuija sukuícharaka esu. Ema Aluresi máurika'i masamararaka eta máimiturapiana.

²¹Títekapapa eta maichirayare'i eta ichape piesta ema Aluresi, taicha maijaremu'u'i ema, máichu'apa ena maewanachana, énapa ena tachutiri'ana, énaware ena tikaima'akeneana tikawasana'i taye'e eta Galilea.

²²Te tinikanapa téranapa, esu suchicha esu Herodías tisiapapa te návi'a'i ena achaneana, tírimaikapa te namira'u, ema Aluresi máurikaine'i ichape, énapa ena machimarana, taka'e máichapa esu amaperu: — Piyaseakanu eta piwara'akenena, nuti nijarakaviya.

²³Nujuracha te pimira'u, piyaseakanu eta piwara'akenena. Nuti níjarakaviyare jákani piyasearunuyare, tayanapane wákutikaka eta níma'akeneana.

²⁴Taka'e, tiyanapa tiúchuka'i esu amaperu, suyaserepanapa esu suena, ánipa suícha'i: — ¿Tája'apuka eta nuyaseaka eñi ñina Aluresi? Esu Herodías sujikapapa: — Píyaseakaya eta ñichuti eñi Juan, puíti'ichu ñíjarakavi.

²⁵Tijurikatipa tisiapa'i esu amaperu te mávi'a'i ema rey, tási'a suichapa: — Nuwara'a píjarakanu puítinaichu eta ñichuti eñi Juan tíkachasirikara'i te kuruja.

²⁶Eta masamira'i ema rey, ichapeine'i eta mapanereresira'i, tájinapasera máicharakawa'ini, taicha máechejiriruwaipa'i, majurachaipa'i te namira'u ena machimarana'i eta máijarasirayare'i eta suyasearapi'i.

²⁷Taka'e, enurujipa mawaneka ema suntaru eta te nakaeratairare, mayana mayuchatipikenu'apana ema Juan

²⁸tási'a mámapaipa'i eta machutini te kuruja, máijarakapa esu amaperu, tási'a esu suíjarakapa esu suena.

²⁹Te nasamairikapa ena máimitureana'i ema Juan, tiyananapa nave'apa eta máke'eni, náekarapanapa.

³⁰Te táekenepa eta juka, tiúrujikawana ena apústuleana maye'e ema Jesús, tási'a nametakapa tamutu eta náichakeneana'i, tási'a étapa eta náimiturapiana'i.

³¹Ema Jesús máichawakapa: — Yare, puiti viyana wákarichu vinaraka ánipina. Taicha wa'i naéjiakawana'ini ena achaneana, téwachajirikakana'i. Wa'i náitujikawa'ini nanikanuma'ini ena.

³²Taka'e ema Jesús, tási'a énapa ena maye'eana apústuleana, tiawaku'anapa te pakure tiyananapa terajikawa'i.

³³Kamuriana'isera ena tinekapaikene'ana'i eta nakaiju'era'i, tiyananapa tijunapanapaipa'i, nametakawakapaipa ena apamuriana achaneana, tási'a nakachuriakapa títekapawaneana'i.

³⁴Te tiúkupaikapa ema Jesús te pakure, máima'apa ena kamurikeneana achaneana, majapanuwakaine'i eta máimairawaka'i ena, taicha nakuti'i eta uvesana nájina tijaneakaina, taka'e, tepanawa eta máimitusirawaka'i.

³⁵Te kápere'ipa, nakachakayapa ena máimitureana, tási'a náichapa: — Pimetakawaka ena achaneana, kápere'ipa, tiyere'iwaka'i eta pétiana.

³⁶Táurikapa piwanekawaka ena nayanapa, nawachareka eta nanika te jákani awasarechichana te vichakayara'ana, natanupana eta nanika.

³⁷Émasera ema Jesús májikapawakapa: — Íjaraka étina eta nanika. Ena nájikapapa: — ¿Piwara'a viyana viwachareka eta pan?, takamunu'i kamuri plata, tiane'i etana añu eta vikaemataneraina, tapaenumawapa tarata'a viwachareka eta venisi'awaka ena achaneana.

³⁸Ema Jesús máichawakapa: — ¿Áyana eta pan ekaye'e puiti? Eyana íma'a. Te náechapa, nametakapa: — Sinkuchicha'i eta pan, apikipa eta jima jitaruka.

³⁹Taka'e, makawanairipipa náeja'apaika namutu te muíjipa'i, náijamuripaichu'i,

⁴⁰tási'a, téja'apaikanapa ena achaneana, náijamuripaichu'i eta náejasira'i. Cien, sinkuenta

⁴¹Taka'e, ema Jesús mave'apa eta sinkukeneana pan, étapa eta apiki jima, máesenikapa eta te anuma, ma'asulupayachapa ema Viya, mayuvetukawakapa eta pan, tási'a máijarakapa ena máimitureana. Ena, náijarakapaipa ena achaneana, éneichuware mayuvetu'epa eta apiki jima, náijarakawakapaipa.

⁴²Námutupa, tisatu'eanapa eta nanisira'i,

⁴³tási'a, tikaemachawanaicha'aware, dóse'ikene saye eta tainikacha náemacharajiana'i, eta pan, étapa eta jima.

⁴⁴Ena tinikana'i, sinku milkeneana'i ena ajairana.

⁴⁵Te tamutupa, enewanepa mawaneka'i ema Jesús ena máimitureana tiáwaku'ana'i te pakure. Tínapukanayare'i tiánuekana te apachara eta te kákiure, tinapaika te awasare Betsaida. Émasera manasiyarecha'a'i kametawanumayarecha'a'i naye'e ena achaneana.

⁴⁶Taka'e, te tamutupa eta makametawaira'i naye'e ena achaneana, tiyanapa tiápana'i te tapusi anuke'ekene mari, tiyujarakayare'i

⁴⁷Te tiúyatipa jena yati, ena maimitureanana napaenumawapa'i tupierekana te kákiure. Tasi'a ema Jesús manasicha'a makarichu'i te anuke'ekene mari,

⁴⁸tási'a, tachimarakawakapa eta muraka tékatikawa, nákapaki'apa'i. Te tijararamapepa, naíma'apa ema Jesús mapaikanauchapa'i eta une, tási'a tiane'ipa máetavimiraucha.

⁴⁹Te naíma'apa, ena máimitureana tipikanarine'i eta náimaira'i eta mapaikaesirapa'i eta une, náimijachaipa'i kunare tipiararekanapa;

⁵⁰taicha namutu náima'a'i tiaramekanaine'i. Máechejikawanepa ema, ánipa maicha: — ¡Wa'i ekupika! ¡Nútichucha, étumechawa!

⁵¹Taka'e, ema Jesús tiáwaku'apa te pakure, tíja'uchawapa tíchekapa eta tékatikawa. Náramirine'i ichape ena máimitureana,

⁵²wícha'a nakaikutiara'ini eta takayemakene'i eta makaejapasira'i eta pan, ena murakasamureanaichucha.

⁵³Taka'e, te apanapa sache, tiápechawanawarepa tiánuekana, naitiakapa eta napakure te tachausi eta kákiure. Títekapanapa te awasare tikaijare Genesaret.

⁵⁴Te tiúkupaikanapa, natiari'imuripaware ena achaneana, náimatiwanepa ema Jesús.

⁵⁵Tiyananapa tijunapana'i timetajirikanapa, tamutu eta awasarechichana tachakayara'ana'i. Taka'e, tiúrujikawanapa ena achaneana te máitekapi'ayare'i ema Jesús. Námawakapaipa'i te áchuji ena nakajumakeneana.

⁵⁶Éneichuware, te jákani mayani'apa'i te acheneana té'epuka calleana, nanakipaikapa'i ena nakajumakeneana, nayaseakawarepa ema eta máisapiraina'ini náemamajiaka eta tacheyarapi eta mamuiri'a, taka'e, nákani témamajiakanapa'i, enewanepaipa tinarakanapa'i.