Read Ignaciano Marcos 7 Bible Online

Marcos 7 - Ignaciano bible

Marcos 7

¹Nakachakayapa ena fariséuana maye'e ema Jesús, énapa ena escriwánuana, tiási'ana'i te Jerusalén.

²Eta juka te naima'apa, eta wa'i nakasipawa'u'ini eta nanisira'i ena máimitureana ema Jesús. Taka'e, ena fariséuana, eta náimaira'i eta namaitauchira'i eta naye'erepi, ichapeine'i eta nasemanewa'i, taicha náimijarecha'i máeperaji eta juka.

³(Taicha namutu ena juriyuana, énapa ena fariséuana, nae'ika'i eta naye'erepianaini ena nachukanaveanaini. Te wa'i tikasipawa'unumana, wá'iware náisapaima'i tinikana.

⁴Étaipa te nási'apa'ipuka te mercado, te plaza, te títekapanapa te napena, tikasipawa'uanayare'i. Mavera eta apamuri naye'erepiana'i tipikauchakareana'i naye'e. Étaipa eta nasipasiraparaka eta náereresiana wasu, eta jarra, eta náwakuru'iana étapa eta nayereruwana.)

⁵Eta taka'e, ena fariséuana, tási'a énapa ena escriwánuana nayaserekapa: — ¿Taja'a takayema ena pímitureana wa'i nae'ika'ini eta viye'erepiana nanakipairu'i ena viáchukanaveanaini? Wa'i nakasipawa'u'ini eta nanisirayare.

⁶Ema Jesús májikapawakapa: — Tatupiruwa'i eta máechejiriruwa'i ema profeta Isaías te techejisia'epa eti apimirana, te majuchapa: ‘Eta juka awasare, tétserajikanuana'i te najakachuchasera, wá'isera taetupikawa'ini eta nasamureana, tiyere'inuanaichucha nuye'e.

⁷Tamapurujipa eta éñeuchirawana'i nuye'e, eta naimiturapiana nawanairipianachucha ena achaneana.’

⁸Ichape eta éjekapirawa'i eti, taicha tasapi'apa epikaucha'i eta eye'erepiana. Étasera eta mawanairipi ema Viya, waipa epikaucha'ini. Tasapi'apa épuru'i eta mawanairipiana ena achaneana.

⁹Éneichuware máichawarepa: — Tasapi'apa ituka'i ichiraya eta eye'erepiana, eti épurupa eta mawanairipiana'i ema Viya.

¹⁰Maka'epa ema Moisés: ‘Pipikauchaya pémunakayarewa ema piya ésupa esu pena’, tási'a ‘Ema achane maejeucha esu maena emapuka ema maiya tépenayare.’

¹¹Étisera eka'e'i, mákani achane tiuri'i maicha ema maiya, esupuka esu maena: ‘Wa'i nituikawaima'i nímikatakavi, taicha tamutu eta nukaye'ekeneni'i (níjarakaipa ema Viya”).

¹²Tasi'a eka'e'iware eta máima'akeneana'i, eta ímiturapi eti waipa tatuparakaima'i ema achane eta máimikatasiraya ema maiya ésupa esu maena.

¹³Ani taka'e'i eta ekaepa'aira eta tasuapakarewa'i eta mawanairipiana ema Viya. Tasapi'apa, ímikapikáucha'i eta eye'erepianachucha. Jarari'iware eta apamuriana éjekapirawana tawasikeneana'i.

¹⁴Taka'e, máichu'apa ema Jesús ena achaneana, tási'a máichawakapa: — Esamanuicha'a emutu eti apaesa ákaikutiara:

¹⁵Eta vinikakene, waipaine'i tajararekaima'i mákani achane. Étasera eta tauchure te masamure ema achane, étasera tajararekaya eta maitaresira.”

¹⁶Étisera te ewara'apuka ekaikutiara esamararakayare yátupina.

¹⁷Taka'e, te tiyanarakanapa ena achaneana, makarinepa ema Jesús énapa ena máimitureana, nayaserekapa eta maimiturapi'i.

¹⁸Ema máichawakapa: — ¿Éneichuware eti wa'i ekaikutiara'ini? ¿Wá'ipuka ekaikutiara'ini tamutu eta juka tasiapakeneana'i te vijaka vinikasareana'i, wa'i maeperajina, taicha wa'i tasiapa te visamure,

¹⁹taicha eta vinikakeneana wa'i tasiapa'ini te visamure, tatupiruichucha te viju'e tási'a, te tiúchukapa eta, apanapa eta táuchusi'a'i? Etajuka maichakene'i ema, mawaraira'i timinekapa'avi eta vinikakeneana tamutu'i tipachina,

²⁰Maka'ewarepa ema: — Étasera jákani panererukana tamaurikeneana, naichakeneana ena achaneana, étara timaeperajikawaka'i ena.

²¹Taicha te ama'e eta nasamureana ena achaneana, napanerecha'i eta tamaurikeneana, mave'a esu apana esena, tikaparekana, tiámerekana,

²²mákani mave'a esu apana esena, ena kapinarurua'iana, tiwayuemana, techeji'iana. Nákani tipanerechana'i eta apaye'eana, ena tikapinarura'iana, ena mapikauraira'ana, kamuri'i eta napanereruana'i ena máecharaireana.

²³Tamutu eta jukana tamaurikeneana, tiási'a'i te ama'e eta nasamureana. Jé'esare eta jukana tamaeperajika ema achane.

²⁴Tiyanapa ema Jesús te tinapaika te Tiro ánaki tisiapapa te peti, wá'isera máwara'a'ini náecha'ini ena achaneana eta matiari'ira'i, tási'asera náechaichucha.

²⁵Taka'e, susamairikapa ema, esu suena esu amaperu máwa'aru'i ema machanewa ema éreana. Taka'e tiyanapa suépuyumirauchapa te maiwapechakaya ema Jesús.

²⁶Esu esena wa'i israelitaina'ini, eta suasine'i esu te awasare tikaijare Sirofenicia, suyaseuchapa maye'e ema Jesús eta máimijunijika'ini ema éreana suye'e esu suchicha.

²⁷Émasera ema Jesús máichapa: — Ísapa, natiwaina nanika ena echichanaveana, taicha wa'i táurika'ini everejika'ini eta naniru ena echichanaveana, eta íjarasiraina'ini tanika eta tamukuana.

²⁸Esu esena sujikapapa: — Éne'ineni taka'e'i Tata, apanasika eta tamukuana tinikana'i eta maniriemacha, te tapeku eta mesa, eta nakamiririjiru'i ena nachichanaveana.

²⁹Ema Jesús máichapa esu: — Eta péchejisira'i. Puiti piyanapa pichawa te pipena, táichavene eta pikasiñairanu'i, nímijunijikaipa ema éreana suye'e esu pichicha.

³⁰Taka'e, tichawapa esu esena te supena. Suchimapapa tíveka'i esu suchicha te suachawara'i. Jé'esareine'i, narakaipa majunijiakaipa'i ema éreana esu.

³¹Taka'e ema Jesús, tichawawarepa tiuchuka'i taye'e eta awasare tikaijare Tiro. Nánuku'apa eta tikaijare Decápolis, taka'e títekapanapa te tachausi eta Kákiure te Galilea, tinapaika te Decápolis.

³²Taka'e, ena achaneana námapa ema émana achane maye'e ema Jesús. Tú'ukiña, úpaware ema. Máechejiuchapa eta manaka eta mawa'u maye'e ema achane.

³³Ema Jesús mañajichapa ema achane naye'e ena achaneana. Manakapa eta masuveraki te makiñana taka'e, tiátutukiwauchawapa, tási'a, máemamakapa eta manene.

³⁴Taka'e, máesenikapa te anuma, tiamichapa taka'e, máichapa ema achane eta taka'e: “¡Efatá!” (Echéjirirukawa arameo, eta juka taka'e'i eta “¡Téchuji'a!”)

³⁵Enurujipa tisamara'ipa ema achane, tijimuyapa eta manene, tiúripa téchejika.

³⁶Taka'e, ema Jesús matuparakapa ena achaneana, eta wa'i nakumetajirika ena apamuriana, énasera timetajirikanaichucha.

³⁷Tétavikawa eta náramira'i ena nametaruana'i ánipa naka'e: “Tétavikawa táurikakarewa tamutu eta máichakeneana'i ema Jesús. Ena nárami'i eta maichakeneana'i, ¡Tisamara'ianawarepa máicha ena tú'ukiñana, ena úpana techeikanawa maicha!”