Read Ignaciano Lucas 10 Bible Online

Lucas 10 - Ignaciano bible

Lucas 10

¹Te táekenepa eta júkana, ema Viákenu Jesucristo manerejikawarepa ena setenta-keneana apamuriana máimitureana'iware. Tiyananapa tikametarairuanayare'i te awasareana eta manukuiyayarepa'i ema. Apinanawakapa'i eta napaisirayare ena.

²Máichawakapa: “Tétavikawapa eta vikamunuirawa ena tímikataka'avianaya taye'e eta juka vématanerepi'i. Eta taka'e eyaseakayaresera ema Tikaye'e eta juka emátaneka máijaraka'avi ena náimikataka'avi.

³Eyana eti, íma'a eta nuwaneka'e'i, ekuti'i eta uvesana te tamuri eta sárare táiñe'ikeneana ichini.

⁴Eta epaisirayare, tájina iámaima'i eta tarera, wá'iware iámaima'i eta eplatane. Wá'iware iámaima'i eta eparupewa; eyayauchawayarepa'isera eta epaisirayarepa'i te achene.

⁵Te jákani peti ítekapi'ayare, eka'eyare eta échejisirayare ena achaneana: ‘Ema Viya, tiúricha'eyare eti te juka peti.’

⁶Narari'iyare ena achaneana nawara'aya eta náuriwaya maye'e ema Viya. Eta échejisirawakayare, tatupiruwaya me Viya máijaraka eta náuriwaya. Té'esera wa'i nakuwara'a najákapa'e, wa'i ekukaeñamakawa naye'e, taicha enapa téchinawana.

⁷Ánasi te jákani peti, tási'a enika, era eta nakaye'ekene'i ena, taicha ema tikaematanera'i taurikayare naijaraka eta mawacha. Wá'iware ekupamira'a eta petiana.

⁸Te itekapi'apuka jakani awasare najachapa'epuka tiuri, enikaya jakani naijaraka'e;

⁹ekanarakawaka ena nakajumakeneana narari'ikeneanapa'i, tási'a, emétakawaka: ‘Eta mawasa ema Viya akenuka te anuma tiane'ipa titekapaucha'e eta eye'e.’

¹⁰Té'esera nakuija nakujachapa'e te jákani awasare ítekapi'ayarepa'i, iuchukawanepa te calleana eka'eya:

¹¹‘¡Vétatapewachawa'i eta juka tawaparu támakene'i eta víwape! Tawara'asera vimetaka'e eta mawasa ema Viya akenuka te anuma tiane'ipa titekapaucha'e eta eye'e.’

¹²Numetaka'e numetaka'e, te táitekapa eta juicio, tiápajupanaya eta náikuñayare, takachurikayare eta nakaikuñaira'i ena achaneana wínarajikeneana tikawasanaini te Sodoma.

¹³“¡Je'eyapukaini, Corazín! ¡Je'eyapukaini, Betsaida! Taicha te népiyaka'ini eta tiaramikare te Tiro etapa te Sidón, ena naitsiwachaipaini eta naitaresira me Viya, nakamuiri'aipaini eta tisesu amáratataji, naepurasikawaipa'ini eta tsimapa te nachuti enewanena'ini náimerekawa'ini yátupi eta náeñauchirawa'i.

¹⁴Tasi'asera te jena sácheyare titekapaya eta ekuñaraki, murakapanayare ejachapa eta íkuñayare eti, takachurikayare eta nakaikuñairaya ena achaneana tikawasana'i te jena Tiro etapa Sidón.

¹⁵Piti pikawasa'i te Cafarnaúm, ¿pimijachaipapuka pisiapayare te anuma? ¡Tiakijikavianayare te taupenakene pusu!

¹⁶“Nákani tisama'eanayare eti, nuti'i tisamanuana'i, tási'a nákani tépuru'eanayare eti, nuti'i tépurunuana'i, tási'a nákani tépurununa'i nuti, náepuru'iraware ema Tata.”

¹⁷Tichawanapa ena setenta-keneana. Tiúrisamurereakanapaipa eta náitekapira'i. Ánipa naka'e: — ¡Tata, Vítauchaipa eta piwanairipi. Virata'a'iware viákijikawaka ena éreanana taicha eta vipiarasira'i eta píjare!

¹⁸Ema Jesús maichawakapa: — Nunekapira'i eta mákipaisirawa'i ema Wínaraji, takuti'i eta te emarere eta táija'uchirawa'i eta makakijira'i te anuma.

¹⁹Táitaurewakene nuti, ichape eta nujaneasira'e'i. Tayanapanepuka iákatayaka eta kichare, alacránpuka, tájinasera táicharaka'ema'i. Eta juka ítupajijiasirawaya níjararu'e'i, etapa eta ita'asirayare ema Wínaraji, énapa ena majupa'ana'i.

²⁰Wá'isera ekukasiñawawaika eta erata'aira'i iákijika ena éreanana. Iúrisamurereakawasera eta táejasiraipa te anuma eta íjare.

²¹Te taepaninewaini, ema Jesús eta máurisamurewa'i maicha ema Machanewa Viya. Tási'a, maka'epa: “Tata Nukaiyakene, tétavikawa eta nukunachiravi, jé'eware píti tákenuvi'i eta anuma étapa te juka apake'e. Títauchawaipa eta pipanereru'i. Wa'i písapa'ini náituka'ini eta júkana ena achaneana tímijachawana'i téchemara'iana. Eta tata Nukaiyakene taicha eta tapiwara'akene'i.

²²“Ema Tata Nukaiyakene, ema tíjarakanu'i eta nútiraya néchaya tamutu. Nájina timatina ema machicha emachucha ema Vikaiyakene, nájinawa timatina ema Vikaiyakene emachucha ema machicha manerejiru.”

²³Taka'e, mañajichamuripa ena máimitureana, máichawakapa: “Tétavikawa'i eta iúrikakarewa eti taicha tíjaraka'e'i ema Viya eta juka ímaira'i puiti eta níchakeneana'i;

²⁴jé'esare, numetaka'e, akane ichapemuriana ena víyara'anaini profetana énapa ena réyeanaini, tétavikawa'i eta nawaraira'i tímatinuana, nawaraira'iware náima'a eta juka níchakeneana'i íma'akeneana'i, nawara'awarepa nasama eta nímituresira'i, wáipasera naituruka'ini nakapayaka'ini.

²⁵Matiari'i'i ema émana escriwánuana, mawara'a'i téchejirikawayare'i maye'e ema Jesús, eta mawaraira'i makaikutiarayare'i, mayaserekapa: — Tata maestro, ¿tája'apukaini nícharakawaini, eta nítujisiraini eta maichekuarakirena te apana vitaresira?

²⁶Ema Jesús majikapa: — ¿Tája'asika takayema'i eta táechejiriruwa'i eta Takapika'ukene Ajureka? ¿Tája'a takayema'i eta pisamira'i eta péchejikuira'i?

²⁷Ema escriwánuana majikapapa: — ‘Pémunaka ema Viya, pijaraka tamutu eta pisamure eta piachanewa, étapa eta pipanereruana’, tási'a ‘pémunakawa ema piparaepiya, tákuti eta pémunasirawa'i piti.’

²⁸Ema Jesús máichapa: — Tétupikawa eta juka pijikapiranu'i. Te pítaucha eta juka, piúchuku'ayare eta pitaresira.

²⁹Émasera ema escriwánu wa'i mawara'a'ini apake'ereruina'ini. Máichapa ema Jesús: — ¿Nája'asika ema nuparaepiya'i?

³⁰Ema Jesús máichawarepa: — Matiari'i ema émana achane, tipaika'i te achene, mási'a te Jerusalén, tiyanayare'i te Jericó. Eta mapaisirapa'i te achene, náuchujiuchapa ena tiámera'iana, náepuchirikapa. Tiane'i nakapakayareni. Námeyechapa eta mámakeneanapa'i étapa eta mamuiri'a.

³¹Tási'a, maka'epaipa ema émana tiyujarakara'i. Máima'apa ema achane te apake'e te achenechakaya. Wá'isera májapanu'ini máichejiucha'ini. Máetavikaichucha.

³²Tási'a, maka'epaipaware ema apana achane. Ema, téchapajirika'i eta templo. Éneichuware te máima'apa, máetavikaichuchaware.

³³Taka'e, maka'epaipaware ema apana achane. Ema samaritano, te máima'apa ema makájarakene'i, majapanuine'i.

³⁴Témeña'awapa maye'e ema. Máipuchapa te aceite étapa eta vino eta majarana. Máepakuchawakapa te amáratataji tási'a, manaraku'apa manakakechapa te maperapa'i kawayu. Mámapa te máitekapi'ayare'i. Máipupuarakaipa'i.

³⁵Te apanapa sache, tiyanayarepa ema samaritano. Tivekuakawapa apipe eta maplatane. Mawachachapa ema tikapena'i eta peti. Tási'a, máichapa: “Pikatajikanu. Péchapajirisinánu ema maka achane. Te tatiari'inapuka eta makamunuirawa, píjarasinanuya. Níma'avine nuti nuwachachaviyare te nuchawa.’

³⁶Tiuri puiti, ¿nája'apuka ena nani mapanakeneana'i témunaka'i ema maparaepiya, ema najararukene'i ena tiámera'iana?

³⁷Ema escriwánu majikapapa: — Ema tijapanu'i ema. Ema Jesús máichapa: — Píma'aipajira, ene pika'eyare piti apanaware.

³⁸Ema Jesús tímiyanawawarepa eta mapaisira'i, tási'a máitekapauchapa eta awasarechicha suawasa esu ésuna esena tikaijaru'i Marta.

³⁹Esu Marta sutiari'i'i esu suparape tikaijaru'i María, taka'e, esu María téjakapa te máiwapechakaya ema Jesús. Susamararakaipa eta máimiturapiana.

⁴⁰Ésusera esu Marta ta'apapirikaichucha eta sukaparujira'i, taicha eta suénisirayare ema Jesús, tási'a suíchapa: — Tata, pikatajikanupa, piwanesinanu esu suka súimikatakanuichu.

⁴¹Émasera ema Jesús majikapapa: — Marta, Marta, tétavikawapa eta ta'apapirisiravi eta pématanerepiana,

⁴²Esu suka María tétupikawa'i eta supanereru. Nájina tiverejikaima'i eta suwara'akene'i.