Read Ignaciano Lucas 11 Bible Online

Lucas 11 - Ignaciano bible

Lucas 11

¹Taka'e, te jákani apanapa sache, ema Jesús mávi'a'i eta te mayujarasirare'i. Te títayujarapa, témeña'awapa ema émana máimiture, máichapa: — Tata, pímituka'avi eta viyujarasirayare, tákuti eta máimitusirawaka'i ema Juan ena máimitureana'i.

²Ema Jesús máichawakapa: — Taka'eyare eta eyujarauchirawaina: Tata, piti piávi'a'i te anuma, vipikaucha'i eta píjare. Piteka pakarichu viye'evina rey.

³Píjaraka'avi eta vinikakene vikamunukene, tamutu sacheana.

⁴Pájapanu'avi eta viviurewana piye'e, takuti eta vijapanuirawaka'i viti, ena tiviucha'avina'i Wa'i pikuisapa'avi vicha eta tamaurikene.’

⁵Taka'e máichaware ema Jesús: — Nímikutichina'eya. Matiari'i ema achane, máitekapaucha'i ema máitunakasare, te enumu'u yati, máichainapapuka: ‘Pikatajikanu, nukapukavi mapanaina pan,

⁶Taicha títekapauchanu'i ema nítunakasare viajérupa'i. Tájinasera nuviya nukumpiracha'ini.’

⁷Ema apana majikapainanapa: ‘Pésamirisinanu; eta tapaja takaeratakene'i, tímakana'iware ena nuchichanaveana; wa'i nítujikawa néchepuka níjarakavi'ini eta pan.’

⁸Ema maitunakasare, wá'isera máipuraji'ini máechepuka'ini máijaraka'ini eta mayasesereru'i. Té'esera te tímiyanawapuka mapiararaka ema tikamunuwa'i, németeaka tipamikawayare'i téchepuka, máijarakayare'i eta makamunukenepa'i.

⁹Eta taka'e, numetaka'e: Eyaseaka ema Viya, ema tijaraka'eya; échejika ema Viya íchimawaya eta ekamunukeneana; íchu'a tási'a ema tisáma'eya.

¹⁰Taicha mákani tiyasesereka, majachapayare; ema titanureka maichimawayare eta matanure, tási'a mákani techejika te tapaja, navejiaikene'aya.

¹¹“¿Eti'ipa te natiari'ipuka ena echichanaveana, wa'i epatsikawaima'i íjarakaima'i nanika eta marija'i ena echichanaveana. Te nayaseaka'epuka eta jima, wa'i íjarakaima'i nanika eta pachepare,

¹²étaipa te tiyaseaka'eanapuka eta warayu'a, wá'iware táurikaima'i íjaraka'ini eta alacrán?

¹³Etiripa murakasamure'e'ineni, ituka'i ijaraka ena echichanaveana eta jakani tiurinana nayasearapiana'i, ¡mavetijicha ema Tata tiávi'a'i te anuma tíjaraka'eyare'i ema Machanewa Viya, tamutu eta táurikeneana eyasearuanayare'i!”

¹⁴Ema Jesús makanaraka'i ema achane. Úpaini'i eta máitaresira, taicha eta máwa'asira'i ema éreana. Taka'e eta máuchusirapa ema éreana, tiúripa téchejika. Náramine'i ena achaneana eta juka.

¹⁵Énasera naka'epa: “Ema Beelzebú ema nákenumuri'i ena éreanana, éma'i tijaraka'i eta máitupajijiasirawa'i ema maka achane, eta makuchusirawaka'i.”

¹⁶Ena apamuriana nawara'apa naimiakipaikaya'i, nayaseakapa máimereka'ni eta tiáramikareana, tiasi'a te anuma.

¹⁷Émasera maecha'i eta napanereru'i, taka'e máichawakapa: “Nímikutichina'eya, ena machanerana ema akenuka, ena wa'i típutsimuri'akakanaima'i, te tiputsimuri'akakanapa énajikakainapa tiakipaikakana, tási'a tamutu eta napenana tiakipairijikakanainapa.

¹⁸Éneware maka'e'i ema Wínaraji te maiputsikawa émakeneina, ¿timiyanawayarepuka makarataka eta maitupajijiasirawa'i? Puiti nícha'e, taicha eti ímijacha'i tijarakanu'i eta maitupaijiaruwa ema Beelzebú,

¹⁹Te taka'e'ipuka, ¿naja'asika tijaraka'i eta naitupajijiasirawa'i ena machanerana eta narata'aira'i kuchurekana? Eta taka'e, enaichu nákipaika'e'ini eti.

²⁰Émakene'isera ema Viya, tíjarakanu'i eta juka nurata'aira'i nukuchukawaka ena éreanana. Eta juka étara íkutiaraya eti eta matuparasiranu'i ema Viya eta nútiyare'i nécha tamutu. Núti'ipa nuti ekuchapakene'i.

²¹“Takutikene mákani achane tumekene'i. Makarataka'i eta matakiriki eta majaneasira'i jákani makaye'ekeneana, nájina tiámeyechaima'i.

²²Té'esera maka'epaipa mákani achane túmepana'i maye'e, maverejikayare eta matakirikini makasiñakene'i, mamechinayarepa tamutu eta maeñamakeneana. Tási'a, maijarakasichapa ena maemunakasareana.

²³“Te wa'i ekusuapanu eta nichakeneana'i, je'eware ekatichanu'i, te wa'iware ekuimikatakanu eta naitesiraina nuye'e, tímikutijirikawa epanajirikawaka ena achaneana.

²⁴“Éneichuware eti ekuti mákani achane máinajiru'i eta machanewa ema éreana. Ema tiyaninapa matanukainapa eta masiapi'ayare'i, eta mamaichimavira'i, mapanerechayare'i tichawa: ‘Nuchawayare te peti, eta te nuchusine'i.’

²⁵Te títekapapa ema éreana maye'e ema achane máwa'aruini'i, máima'apa makuti'ipa eta peti takapi'ikene.

²⁶Taka'e tíchuarekapa ena siétekeneana machamuriana wínarajipanana, nasiapa'akainawarepa namutu ena, jé'esare tiápajukawainapa eta mawínarajiwa ema paure achane.”

²⁷Techejikaicha'a'i ema Jesús eta juka máechejiriruwana'i, tipiarakapa esu ésuna esena te namuri ena achaneana. Ánipa suka'e'i: — ¡Tétavikawapa eta sukunachakarewa'i esu pena, táichavene'i eta suínasiravi'i, suájisiravi'i eta sukajurusiravi'i!

²⁸Ema Jesús majikapapa: — ¡Tiápajukawayaresera eta nakunachakarewayare'i namutu ena tisamanayare eta máechejiriruwana'i ema Viya, yátupiyare'i eta nasuapirayarewa!

²⁹Ena kamurikeneana achaneana timiyanawanaichucha titekaparakana te machakaya ema Jesús, tási'a ema tepanawapa máichawakapa: “Ena achaneana puiti juka sacheana náetaviucha'i eta nawínarajiwana, tiyaseakanuana'i nicha eta tiáramikareana, wáipasera nijarakaima'i eta tiáramikareana, takarine'i eta máichakene'i ema Jonás.

³⁰Ema profetaini Jonás yátupi'i ekutiarare'i ema eta mawanesira'i ema Viya naye'e ena achaneana tikawasana'i te awasare Nínive. Ene nuka'e'i nuti Machichanu ema achane, ekutiararenu'i puiti eye'e eti achaneana.

³¹Te taitekapapa eta sacheyare nakaikuñairayare ena achaneana, esu reina taye'e eta Wana techepukainapa taicha esu te, susamairikapa eta máitupajijiasirawa'i yátupi ema Salomón. Esu, tayere'ikene'ineni eta suawasa, tiyana'isera sukapayaka ema Salomón taicha suwara'a'i susamayare'i ema, taicha eta jarari'ikeneana'i ichapepana'i maye'e ema Salomón.

³²Takutikene ena achaneana tikawasana'i akane te Nínive. Tisipekaturara'iana ena. Natupiruwa'isera nasuapa eta mametarairu ema Jonás. Téñauchawawaneana'i. Eti esamanu'i wa'isera esuapanu'ini, nuti'ineni nukapika'upana maye'e ema Jonás.

³³“Najinaware tiyustakaina eta namika'u, tási'asera, nayumurukapapukaini, nanakawarepukaini te tápeku eta náetsatsame náimasirare, takamunu'i nanakayare'i te anuke'e. Jé'esare tikaecherayarepa tamutu apaesa nákani tisiapanapa'i, tímairikanainapa.

³⁴Eta piuki'ana takuti'i eta vimika'u tamikaucha'i eta viake'e, taka'e te tiurinawaka'i eta piúki'ana, tiurinaware tamikauchiyare eta piachanewa, te'esera wa'ipuka tiuri tamutu eta piake'e timapikuyare.

³⁵Eta taka'e, échapawa; machu ísapa taema'a eta emíka'u eta ítaresira.

³⁶Té'esera támutu jara'i eta iake'e, tétavikawaya eta tamikauchira'eya eta ítaresirana'i, takutiyare eta lámparina eta tajaraiwa.

³⁷Te títapirikapa ema Jesús eta máechejisira'i, témeña'awapa ema émana fariseo, makumpirachapa tinipanayare'i te mapena. Tiyanapa te mapena, te tiúripa eta tinikakare, téjakapa ema Jesús te mesa.

³⁸Ema fariseo eta maimaira'i, maramine'i, eta mamaitauchira'i eta naye'erepiana'i, eta wa'i nakasipawa'u'ini eta nanisirayare.

³⁹Émasera ema Viya máichapa: — Eti fariséuoana, esipasikaichucha te aneka eta wasu, étapa platu, eti iápajupanawa'i eta tachipejiwa'i eta iáchanewana, táichavene eta ewínarajiwa.

⁴⁰¡Maecharaireana! ¿Wa'i echa?, wa'i tákarichuima'i máima'a te aneka, éneichuware máima'a'i eta tiávi'ana'i te ama'e.

⁴¹Tatuparaka'i eti, eta epáchi'airayare, ijarakayare eta ima'akeneana naye'e ena paureana tási'a epáchi'ainasarepa.

⁴²“¡Páure'esami eti fariséuoana!, etachucha ítaucha'i eta ekamawa'uira me Viya eta diésmuri taye'e eta sukurekana, tási'a enakikapa eta kapika'upana'i titukakareana wanairipiana. Étasera tinunayare'i ítaucha tamutu eta wanairipiana.

⁴³“¡Páure'esami eti, fariséuana!, etachucha ewara'a'i ekaejakawayare'i te táurinakene téjasi'akareana te peti naúrujisirarewana ena juriyuana, tási'a ewara'aware ekapika'uyare'i eta échejisiraya ena achaneana te calleana.

⁴⁴“¡Páure'esami eti, ekuti'i eta naekari. Ena achaneana nakatayayajika'i, wá'isera naecha'ini!”

⁴⁵Majikapaware ema émana timitukara'i: — Maestro, eta pika'era'i eta juka tétavikawapa tayunasira'avi'iware víti apanaware.

⁴⁶Émasera ema Jesús maka'epa: — ¡Paure'esami eti escriwánuana!, tája'a takayema epamikawaka'i ena apamuriana eta eye'erepiana, nájinapa tirata'aima'i títaucha, apanasika eti wá'iware ítaucha'ini.

⁴⁷“¡Páure'esami eti!, epiyakana eta náekariana ena profetanaini, nakaparuana'i ena iáchukanaveanaini eti.

⁴⁸Taka'e ímereuchawa'i eta esuapira'i eta naichira'i ena iáchukanaveanaini, taicha ena tikapakana'i ena profetanaini, eti épiyaka'i eta náekariana.

⁴⁹“Eta taka'e ema Viya eta maitupajijiasirawa'i, maka'e'i: ‘Nuwanekayare ena profetana, tási'a éneichuwa nuwanekayarewa ena apústuleana. Tási'a nakapakayarepa'i, napanajirikawakainapa ena apamuriana.’

⁵⁰Eti achaneana etiari'ikeneana'i puiti, ekaikuñayare taicha timuriaka'e'i eta naviurewa'i ena iáchukanaveanaini, taicha eta nakapapajisirawaka'i ena profetanaini akane te tépanawainapa eta apake'e,

⁵¹Ema Abel émapa ema Zacarías, ema nakaparu'i te tamira'u eta mapena ema Viya. Puiti étipa tamuriakayare tamutu eta ekuñarakiyare, eye'e eti achaneana etiari'ikeneana'i puiti.

⁵²“¡Páure'esami eti, escriwánuana!, tamapurujipa eta ímatiekene'aira'i. Étina'ipukaini ítujikawa'ini esiapa'ini, wa'iware isapa'ini nasiapa'ini nákani tiwara'ana'i tichana.”

⁵³Taka'e, eta nasamira'i ema Jesús ena fariséuana énapa ena máestroana, tisemanaine'i eta maye'e. Tépanawanawarepa náitsamarareka eta nayaseresirapa'i.

⁵⁴Nawaraira'i nasama te máejekapawa'ipukaini eta makayemakeneanapa'i, nawaraira'i eta tiviuchayare'i ema.