Read Ignaciano Lucas 12 Bible Online

Lucas 12 - Ignaciano bible

Lucas 12

¹Taka'e, te jena sácheana'i, títekaparakanapaichucha ena kamurikeneana achaneana. Tiyututukawanapa, tupiajirikakanapa. Ema Jesús natiwapa maechejika ena maimitureana maichawaka: “Échapawa taye'e eta lewadura eta tasisijisira'i eta masa. Takuti'ichu eta tapareasira'i eta apimirairana'i ena fariséuana.

²Taicha tajina tiyumurukawaima'i, eta naeñaureana, tamutuyare'i téchakareya, tájinaware tépakuchaima'i jákani nayumurureana, tamutuyare'i téchakareya.

³Taicha tamutu jákani ekayemakene'i eti te timapikukene, tamutu tikaecherayare te tijara'i, tási'a etapa eta eñaureana'i, tási'a etapa eta ekayemakene'i te eye'e pusentu, tamutu tisamakareyare te petiana.

⁴“Étipa eti némunakasareana, numetaka'e: Wa'i ekupika nákani nakapakapuka eta iáke'e, takarichusera náituruekene'ayare.

⁵Numetaka'ewa, makarichu ema Viya epikayare, taicha makarichu ema técha'i eta ítaresirana. Jé'eware, ema marata'a'i makamitiekene'a eta iáchanewana taye'e eta táiñe'ikene yuku, Jé'eware ema epikayare.

⁶“¿Eta te vijarareka eta sinku'i káyurechicha vijakapayare'i eta tawacha? Eti ímijachapapuka wa'i tasiwacha'ini eta, téñamakareana'isera me Viya, ema téchawaka'i eta táitaresirana'i.

⁷Evetijipa eti, éñamakarepana'i me Viya. Ema técha'e'iware tamutu eta ítaresirana. Eta taka'e, wa'i ekueñamawa eti, taicha tétavikawa'i eta emunawa'i eti maye'e. Ema, máimati'i eta tatupa eta echutimakana.

⁸“Numetaka'e puiti, nuti Manerejirunu'i ema Viya: Namutu ena tímereuchawana'i eta náe'isiranu'i te namira'u ena achaneana, nuti apanaware nímereuchaya eta nuchanerairawaka'i ena te namira'u ena ángeleana maye'eana'i ema Tata;

⁹nákanisera wa'i náwara'a'ini náimereuchawa'ini eta náe'isiranu'i, nuti apanawa nímereuchaya eta wa'i nuchaneranaina'ini ena te namira'u ena ángeleana maye'eana'i ema Viya.

¹⁰“Ema Viya maemetavikaya eta maviurewana'i maye'e ema Machicha ema Ajaira, te'esera mákaini kaeka'i'i ema Machanewa Viya.

¹¹“Te'esera te nama'epa eti te peti náurujisirarewa ena juriyuanana, te namira'u ena juéseana enapa ena akenukana. Wa'i ekueñamawa eta échejiuchirawayare, ekatiuchirawayare,

¹²Ema Machanewa Viya tímituka'eyare eta táuriwaya eta ekayemayare te jena sache ekayasesere'inapa.

¹³Matiari'i ema achane te namuri ena kamurikeneana achaneana. Máechejikapa ema Jesús: — Maestro, pímikatakanu, pimetaka ema nuparape máijarakanu eta nuye'e parte eta nímaekeneruyare eta máima'akeneni ema tikachichanuini.

¹⁴Ema Jesús majikapapa: — Wa'i nútina nécha, eta máima'akeneanaini ema tikachicha'eni.

¹⁵Éneichu máichawakaware: — Échapawaware eti, machu émuna'irikawa, ejamurara'i taye'e eta tíma'akareana. Taicha eta tíma'akareana te juka apake'e, wa'i étaina tikaitareka'eyare, wa'i táeñamakare'ini.

¹⁶Taka'e, máimikutiarachinaware: “Matiari'i ema achane riku, tiúrina eta máewaru.

¹⁷Taka'e, ema riku mapanerechapa: ‘¿Taja'a nichaya? Ánike'epa eta juka néwaru, tájinapa núnasi'a.’

¹⁸Tasi'a maka'epa: ‘Nechapa eta nicharakawaya, tiúripanapuka nuvetata'a eta núnawara'i nujanejuecha. Ichapepanainapa nicha eta táitsiwaya. Tiúripanainapa, apaesa táirijika tamutu eta néchatijiru étapa eta apamuriana nukaye'ekeneana.

¹⁹Tási'a, nuka'enapa: Jé'eware puiti tétávikawapa eta núriwayare. Tájinapa níchirawaima'i. Tarata'akene juka añuanayare, nukanarakawaya nuti, tamutu sache tiúriya eta nunisira, neraya. Ichape eta núrisamurewaya.’

²⁰Tási'asera ema Viya máichapa: ‘Tétávikawa eta pisunsuwa piti. Puiti jena yati pépenaya, eta piúnaruana'i ¿naja'apapuka tisapi'aya?’

²¹Ene naka'e ena achaneana tikurujirikana eta náima'akeneana naye'echirawaichu. Te'esera te mamira'u ema Viya ena paureana'i.”

²²Te taekenepa, ema Jesús máichawakapa ena máimitureana: “Eta juka nicha'e: Wa'i ekukaeñamarakawa eta enikakenerepi étapa eta emuiri'arapi puiti juka sacheana.

²³Wa'i étaina eta vitaresira tiuripana taye'e eta viniripi, étapa eta viake'e tiuripana taye'e eta vimuiri'arapi.

²⁴Epanerecha eta káyureana tiararaikana te anuke'e: wa'iware táewaka'ini, táechatijirika'ipukaini, táunaka'ipukaini eta tanikakeneyare. Émasera ema Tata Vikaiyakene máechapajirika'i, máijarasira'i eta tanikakenerepiana. ¡Evetijipa eti, iápajupanawa'i eta éñamakaréwa'i taye'e eta káyureana!

²⁵Tayanapanepuka eta ekaeñamarakawa'ini, ¿nájina narata'aima'i nakarataka eta naitaresira etanaina'ipukaini ura?

²⁶Wa'i étijiwaima'i íturukawa ekajurukawa'ini, wá'iware táurika'ini ekaeñamarakawa'ini taye'e eta júkana.

²⁷“Epanerecha eta tajurusira'i eta flúreana, wa'i takaeñamarakawa'ini takaematane'ini, táijurureka'ipukaini eta tamuiri'ana. Nájina nákuti eta takamuiri'aira eta táurinawa, émaipa ema Salomón tamutu eta makaye'ekeneana, wa'isera márata'a'ini makutinasi'ini eta taurinawa eta.

²⁸Apanasika ema Viya máijaraka'i eta táurinawa'i eta flúreana, ánipichu'ineni eta táitaresira'i. ¡Evetijipa eti eta máechapajirisira'e'i, máijarasira'eyare'i eta emuiri'arapi eti achaneana, wa'ineni ákasiñawa'ini!

²⁹Eta taka'e, wa'i ekupanererereka eta enikakenerepiana, étaipa te échuriakapuka eta une érayare.

³⁰Taicha tamutu eta júkana taiparakana nakamunukeneana taimipanerereka ena achaneana máimatira'ana ema Viya, etisera échaipa'i imatipa'i eta matiari'ira'i ema Ekaiyakene te anuma, máimati'i ema tamutu eta ekamunukeneana'i.

³¹Etisera, tatiwayare esenikayare ema Viya, taicha akenuka'i ema te anuma, ítauchayare tamutu eta mawara'akeneana'i, ema tíjaraka'eyare tamutu eta juka ekamunukeneana.

³²“Wa'i ekupika, eti nuchichanaveana; tayanapane wa'i kamuri'ena, eti máichu'akeneana'i ema Ekaiyakene'i. Eta taka'e, tétavikawa'i eta mawapinairawa'i eta majakapira'e'i.

³³Íjararekayare eta íma'akeneana, íjarakayare nákani tikamunuwana'i. Máima'ainepa ema Viya, tíjaraka'eyare eta táitsiwayare ánaki te anuma, máitawakakainapa eta ekaima'akeneraya. Wá'iware táeñamawakare, taicha nájinapa tiámeyecha'ema'i, tajinaware kachusirina.

³⁴Te tavi'a'i eta íma'akeneana eti, éneichuware ánaki tavi'ayarewa eta pisamure.

³⁵Eti, yátupina eta ekuchapiranuya eta nuchaviraya. Etsekawaya tamutu sácheana,

³⁶“Ákuti'i nákani achaneana músuana titsekawana'i te tapaja, navejiekenéraya ema nákenu eta machaviraipa'i mási'aira'i maye'e ema arayena. Te máe'a'amekapa eta tapaja, enewaneyarepa ena navejiekene'ayare'i.

³⁷Tétavikawasera eta náurikakarewa'i ena músuana, eta machimapira'i ema nákenu eta nakuchapira'i, wa'i náimakaekene'a'ini. Nutupiruwa numetaka'e: Yátupinasarepa eta máurisamurewayare ema nákenu, makaejakawakainapa te mamesara, máenikawakainapa.

³⁸Tiurisamurekareya, makaini mamusura makuchapiraya ema makenu, tayanapane tajarara'ipapuka.

³⁹Tási'a échayare eti eta juka: mákaini achane tikapena eta peti maecha'ini, taja'apuka urayare eta yati máitekapirayare ema tiamera'i, tikuneuchawaipa'ini ema, wáipasare nakuameyecha'ini.

⁴⁰Eti ekuneuchawayare, taicha wa'i écha'ini tájamu'uyarepuka eta machavirayare ema machicha ema achane.”

⁴¹Ema Pedro mayaserekapa: — Tata, píka'e'i eta juka pímikutiarachakene'i, ¿viye'eyarechupuka viti, vimutupuka viti vé'ikaviana'i?

⁴²Maka'epa ema Tata Viákenu: “¿Makañári'ipuka ema nákenururi ena musuana máetaviucha'i eta mauriwa, tisuapajira'iware, ema makenu matuparaka'i ena tiavi'ana'i te mapena eta máijarasiraya eta nanikakene tamutu sacheana?

⁴³Tétavikawa eta máurikakarewaya ema maka tikatupara'a'i, te tamutu'i máitaucha'i jákani machimapirana ema mákenu.

⁴⁴Yatupi numetaka'e, eta tamutuira'i tiuri eta machimapira'i, matuparakainapa ema téchayare'i tamutu eta máima'akeneana.

⁴⁵Té'esera, wá'ipuka tiuri eta mapanereruana ema mákani makajurure, máimijachaichucha tiyereyare'i eta máitekapirayare'i ema mákenu, táka'e, tepanawapapuka mae'awaka ena apamuriana makajururana, énapa ena wanarakana'i, máichapapuka eta tinikakare, térapa, tikawa'apa,

⁴⁶jena sache waipa manekapauchawa'ini te títekapapa ema mákenu. Machimarakapa ema maeja'aru eta mamapachichijisira'i eta máima'akeneana. Eta taka'e, ema mákenu makawanairipinapa náestakayare muraka nakutiyare ena apimirana eta nakatajiwaira, taicha eta mamasuapajiraiwa'i.

⁴⁷Takutikene mákani musu, te máecha'i eta mawara'akeneana'i ema mákenu, tási'a wa'i máitaucha'i eta mawana'iana'i ema, murakayare'i eta makaikuñairayare.

⁴⁸Mákanisera musu, te wa'i máecha'i eta takayemakeneana, tási'a téjekapawapa ema, apaesayaréchu eta máikuñayare. Nákani najachapapana, eneichuware chapemuripanaya eta nayasea'ana, nákaini nasuapakenepana'i, murakapanaya eta nayasea'ana.

⁴⁹“Nuti, eta nítesira'i, tímikutijirikawa'ini nuyustapana'ini eta yuku te juka apake'e, ¡taja'apuka eta nuwarairaina'ini eta tamuruipaini!

⁵⁰Yátupiyare eta nukatajiwairayare, naicha ena tikatianakanuana. Eti apanawa, tikatianaka'eanayare.

⁵¹¿Esuapapuka eti eta juka timitekanu'i namayarepa'i eta iuriwayare tejuka apake'e? Numetaka'e wá'isera ene taka'e, tikatianaka'eanayare. Táichaveneya eta é'isiranu'i.

⁵²Te jakani peti kapenana'i sinkuana ena achaneana, mapanana ena té'ikanuanaya, tási'a apinana ena tikatianakanuanaya. Té'esera apinana'ipuka ena té'ikanuana'i, mapanana ena tikatianakanuana'i.

⁵³Mákani achane, sukani esena, te natiari'i ena nachichanaveana, nachinenapuka suimasepuka, nakatichayare'i ena tikachichana'i táichaveneyare'i eta náe'isiranu'i ena.”

⁵⁴Ema Jesús máichawakapa ena achaneana: “Te íma'a timapikurume, émeteakaipa tikiwayare. Ene taka'e'i.

⁵⁵Te tékatikawa te wana, émeteakaipa wáipaware tikiwaima'i. Eneware taka'e'i.

⁵⁶¡Apimirana! Taicha eti imatiekene'a'i eta taichararakawa'i eta anuma, ¿ímijachawa'i wa'i ituka'ini ímatiekene'a'ini eta taikutiara eta jukana sacheana?

⁵⁷“¿Tája'a takayema wa'i áwara'a'ini é'ika eta juka yátupikeneana?

⁵⁸Te matiari'ipuka mákani achane metauchavi'i. Tatuparaka'i tatiwaya máetupirikanumaya eta mayaseasirayare eta majapanuiraya, mapurare wicha'a namavi'ini me juez. Taicha ema juez mawanekainapa ema pulicia maeratakavi te nakaeratairare.

⁵⁹Numetakavi, wa'i piuchukawanema'i ánaki, tiamainukawa te pitawachachapa tamutu eta pinteve'i.”