Read Ignaciano Lucas 13 Bible Online

Lucas 13 - Ignaciano bible

Lucas 13

¹Étaichu te jena sache, nametakaipa ema Jesús eta máichakene'i ema Pilato, eta máimikapasirawaka'i ena Galileona, ena tiyujarakana'i te templo, tépenanapa te tachakayana'i eta sárareana nakaparuana'i námawa'uasana'i.

²Ema Jesús máichawakapa: ¿Eti ímijachaipa táimikaparu'i eta nasipekaturaiwana'i ena nani naye'e ena apamuriana najaneanana'i te Galilea?

³Wá'ira étaparakaina, takamunusera éñauchawawane eti, machu táija'uchawa eta épenira.

⁴Némecha'e, ena nani dieciochokeneana takaparuana'i eta táewajaisirawa'i eta torre te Siloé. ¿Ímijachapapuka táichapewa'i eta naviurewa, imijachapapuka ena kapekatura'ipanana'i naye'e ena apamuriana tikawasana'i te Jerusalén?

⁵Nútisera numetaka'e, wa'i etaparakaina. Eti'ipa, te wa'i ekueñauchawa, éneichuware tíja'uchawaya eta épenira.”

⁶Eta máechejirisira'i ema Jesús: “Matiari'i ema achane, masukure eta higo. Má'irikire'isera.

⁷Taka'e, máichapa ema mamusura: ‘Mapanapa añu wa'i tika'i eta juka nusukure. Péchupaikayare puiti taicha tiápitawairikaipa eta te juka isaniti.’

⁸Émasera ema musu majikapapa: ‘Tiúripanapukaini tata, vikuchapaicha'a'ini etanainawareni añu. Nuwara'a némurina'echa te máteji, apaesa taka'ipapukaini.

⁹Té'esera wá'ikenenaicha'apuka takuka'i, néchupaikasarepa.’ ”

¹⁰Te apanapa sáwaru, ema Jesús tímiturekawarepa taye'e eta peti náurujisirarewa ena juriyuana ena juriyuana;

¹¹Sutiari'i'i esu esena máwa'aru'i ema éreana, tépiñumaike'e'i eta suítaresira. Wa'i táuri'ini sutupina'a'ini. Dieciocho añuipa eta sukajumaira'i.

¹²Te máima'apa ema Jesús, máichu'apa, taka'e, supauchapa. Máichapa esu: — Páurevi piti esena, pikajuma'i. Puítisera pinarakainapa eta pijumaini'i.

¹³Taka'e, ema Jesús manakapa eta mawa'uana te suápusi. Enewanepa titupina'a'i esu, tinarakapa eta sujumaini'i. Ichapeine'i eta sukunachira'i ema Viya.

¹⁴Matiari'i'iware ema tákenuru'a'i eta peti náurujisirarewa ena juriyuana. Eta máimaira'i eta juka, tisemaine'i taicha eta makanarasira'i ema Jesús esu sukajumakene te jena sache sáwaru takapika'ukene'i. Tási'a, máichawakapa ena achaneana: — Saisi sache tatupara'a eta vikaemataneraya, énerichuware eta ekaipuirayarewa eti ekajumakeneana wa'isera ekuiteka te sawarumu'u.

¹⁵Tási'a, ema Viákenu Jesús, majikapapa: — Eti apimirana, ¿tétavikawa'i eta tamurakawa eta esamureana, te tikaitiki'i eta epera te jákani sache sáwaru, evejapuakayare'i eta ésichirayare eta une, tayanapane takapika'ukene'inéni eta sache?

¹⁶Suvetijicha esu suka esena vikutikene'i achane, mámariekene'i ema viáchukaini Abraham, tikatajikakare'i eta nukanarasirayare'i taye'e eta máitiarapi ema Wínaraji. Taicha dieciocho añuipa'i eta máekajumachira'i esu. ¿Wa'ipuka táurika'ini nukanaraka'ini puiti juka sache sáwarumu'u?

¹⁷Eta nasamira'i ema Jesús, namutu ena tikatianakana'i titsiri'anaine'i. Énasera ena apamuriana achaneana tiúrisamureanaine'i, taicha eta náimaira'i eta táurikakarekeneana máichakeneana'i ema Jesús.

¹⁸Ániware maka'e ema Jesús: “¿Taja'apuka takuti eta mawasa'i ema Viya akenuka te anuma, taja'apukaini vimikuticha'ini?

¹⁹Tási'asera te tímarukapa, tiúnayare'i eta táenaki, takutiyare'i eta yukuki eta táichapewa, takachurikayare'i eta apamuriana ewarakiana, járajapainapa eta káyureana, táepiyakainapa eta tamakajiana te tatawawajiana.”

²⁰Éneichuware maka'e'i ema Jesús: “¿Taja'apuka nímikutichina'eyarewa eta mawasa ema Viya akenuka te anuma?

²¹Tímikutijirikawa'i eta levadura, esu súkani esena tiúri'i eta tasisijisira eta suépiyaru'i masa, tayanapane apinapukaini arruwa eta suye'e jarina, tasi'ajika'isera, jé'esare tiápukayare'i taicha.”

²²Ema Jesús tiyanaware tipaika. Máimitukawaka'i ena achaneana te jákani awasare máitekapi'apa'i, makaiju'e'i eta Jerusalén.

²³Matiari'i'i ema tiyasesereka'i ema, ánipa maicha: — Tata Viákenu, ¿wá'ipuka kamuri'avianainaya viti viúchuku'anaya?. Tási'a, ema majikapapa:

²⁴— Ámeta esiapa, taye'e eta tapaja ánikuchichapana, taicha numetaka'e kamurianayare ena tiwara'anaya tisiapana, tási'a wá'isera títujikawanaima'i.

²⁵Te taekenepa, ema tikaye'e eta peti techepukainapa, tási'a máeratakainapa eta tapaja, tási'a eti, etiari'ikene'i te aneka e'a'amekainapa eta tapaja, eka'enapa: ‘Tata, pivejiekene'a'avi.’ Émasera jikapa'énapa: ‘Nája'a'esika eti.’

²⁶Taka'e, eti épanawainapa íchanuya: ‘Víti'ichu pikachanekeneana'i te mesa eta vinisira'i. Pímituka'avi'iware te plaza te jena viáwasa.’

²⁷Tasi'asera ema jikapa'énapa: ‘Wa'i nuchanera'éna eti. ¡Évuisi'a eta te juka eti maurira'ana!’

²⁸Taka'e jarajapainapa eta sache naiyairayare etapa eta naeñamirawayare, taichavene eta naimairaipa ema Abraham, ema Isaac, émapa Jacobo, namutu ena profetana, eta navi'airaipa te mawasa ema Viya akenuka te anuma, étisera enasinapa te aneka.

²⁹Taicha titekapanayare ena achaneana, nasi'akeneya te tinapaika te kaja'a, etapa te wana. Éneichuware tiasi'anayarewa te tinapaika eta tauchusine eta sache, etapa te taerisine eta sache. Taicha te mawasa ema Viya Akénuka te anuma, maenimuri'ainapa.

³⁰Tási'a, te jena sácheyare, nákani tékene'ana'i puiti, nasapi'ainapa tisiapanayare. Étisera eti ínapureana'i puiti, étinawarepa wa'i ítujikawaima'i esiapa.

³¹Taka'e, te jena sache, títekapanapa ena fariséuana te mávi'a'i ema Jesús. Náichapa: — Piyana, pitatajiwa piúchuka eta te juka. Taicha ema Herodes mawara'a tikapakaviyare.

³²Émasera ema Jesús majikapapa: — Eyana emetaka ema mákara tikaetemara'ikene: ‘Wa'i típikararekanuima'i nuti eta juka mametarapi'i. Nunasiyarecha'a puiti, nukanararekanumayare ena nakajumakeneana énapa ena náwa'aruana'i ena éreanana te mapanakenenapa sache nitawainapa.’

³³Taicha puiti nimiyanawayarecha'a nupaikayare nunasiyarecha'a, achichupa te'epa apana sache nuyanasarepa, taicha wa'i taurika'ini maepena'ini ema profeta, te aneka taye'e eta Jerusalén.

³⁴“¡Jerusalén, Jerusalén, eti ekapakawaka'i ena profetana, tási'a eyukasikawaka'i te márija'iana ena maewataruana ema Viya, tiamana eta techakare! ¡Ichapemuri'ineni eta níchuira'e'i eti, iúrujiakanu'ini, tákuti'ini eta warayu te takurujimuri'a eta tachichanaveana te tapawase. Étisera wa'i áwara'a'ini!

³⁵Puiti imararaka eti eta epenana tamutuinapa tikakipaikasiyare. Numetaka'ewane puiti waipa iápechawaima'i íma'anu, tiámainukawainapa te áka'epa: ‘¡Ichape eta vikunachiravi'i píti wanairukakenévi'i maye'e ema Tata Viakenu!’ ”