Read Ignaciano Lucas 14 Bible Online

Lucas 14 - Ignaciano bible

Lucas 14

¹Taka'e, te jena sache sáwaru'i, ema Jesús tikaichu'akasi'i tinipanaya te mapena ema émana náiyamuri ena fariséuana. Tikaichu'akasiana'iware ena apamuriana fariséuana, énapa ena máestroana taye'e máimiturapiana ema Moisés. Nawara'a'i nakaikutiarayare'i ema Jesús.

²Tíja'uchawapa tímerekawa te nataraku ema émana achane makajumakene. Tiámakiapewaka'i ema.

³Ema Jesús, eta máimaira'i ema makajumakene, mayaserekawakapa ena natiari'ikeneana'i: — ¿Táurikapuka vikanarakawaka ena nakajumakeneana puiti juka sawarumu'uira'i takapika'ukene'i?

⁴Énasera wa'i najikapa'ini, timatinanarichucha. Tási'a, ema Jesús makaratawauchapa ema makajumakene, eta makaratawauchira'i, énewanepa tinaraka, taka'e, máewatakapa mayana te mapena.

⁵Tási'a, máichawakapa ena fariseoana: — Németeaka májina émanaina achane, wa'i makujapanu'ini eta mapera burriku, te tiyarakuawa'ipuka te pusu maveku'ayare'i, eta máeñamira'i, maveku'ayare'i, tayanapane'inéni eta sache sawarumu'u.

⁶Énasera wa'i napatsikawa'ini najikapa'ini, timatinanarichucha.

⁷Eta máimararasirawaka'i ema Jesús ena makumpirachakeneana'i ema fariseo, énajiwa'i tinerejiuchawana eta náejasi'ayare'i tiúrinapanana. Taka'e, ema Jesús maechejirikawakapa:

⁸— Te natiari'inapuka nakumpiracha'e, wa'i ekainapupuikawaima'i ekaejakawa taye'e eta téjasi'akareana taicha tijurikati eta máejasi'ayare'i mákani tikapika'upana'i eye'e eti;

⁹Taicha ema kumpirachavi'i jurikati maichavi: ‘Pijaraka eta pejasine'i ema maka apana nichu'akene.’ Titsiri'akarepa eta makaejakavi'ini te náekenemuri.

¹⁰Te ekaichu'akasipuka, ekaejakawaya te náekenemuri, apaesa ema técha'i maicha'enapa: ‘Yare nairiare ani pejasi'aya te tiurinapana te navi'a'i ena tikapika'uanapana.’ Tási'a, ekunachakarenasarepa naye'e ena natiari'ikeneana.

¹¹Taicha nákani tikasiñawawaikana'i tímijachawana'i tikapika'uana, ema Viya máimikatsiriakawakayare'i. Nákanisera mánsuana'i eta náitaresira, ichapeyare eta nakunachakarewayare me Viya.

¹²Ema Jesús maechejirika ema fariseo, ema tikumpirareka'i: — Píti apanaware, te pénirikayare, wa'i nakukarichu píchu'awaka ena pémunakasareana'icha, ena piparapenaveanapuka énaipa ena ríkuana, táichavenena'i eta piwarairaina'i títsirijikawanaya eta piye'e.

¹³Píchu'awakayarewa ena páureana, nákani naka'ema'iana'i, túpupawakiana, masariana, púchukiana;

¹⁴taicha ena nani, wa'i títsirijikawanaima'i eta piye'e. Táitsiwasera tétavikawayare eta piúrikakarewayare píti eta pijakapirayare eta píkuchi'i te jena sácheyare pikachanewakayare ena náurikeneana'i makaechepureanaya ema Viya.

¹⁵Taka'e, eta nasamira'i ema Jesús ena natiari'ikeneana'i te mesa, téchejikapa ema émana, maichapa ema Jesús: — ¡Tétavikawayare eta máurikakarewaya te masiapapuka eta máwasa ema Viya akenuka te anuma, tinikayare te mamesara!

¹⁶Ema Jesús máichapa: — Matiari'i'i ema émana achane ténirika'i. Tási'a maichu'awakapa ena kamurikeneana achaneana.

¹⁷Te tiúripa eta tinikakare, mawanekapa ema mawanara mametakawaka náitekapa ena machimaranaya taicha tiúripa'i eta tinikakare: “Yarepa emutu tiuripa eta tinikakare.”

¹⁸Namutupasera natanukapa eta náetseraruyare'i. Ema émana maka'epa: ‘Wa'icha'a nítujikawaima'i níteka. Nuyananumayare níma'apanayare eta nuwachareru'i eta apake'e.’

¹⁹Ema apana, maka'ewarepa: ‘Wícha'a nítujikawaima'i níteka, taicha nuyananumayare níma'apanayare eta nuwachareruana'i sinku yúntakene eta vuiye.’

²⁰Ema apana ániware maka'e: ‘Nupaenumawa nítauchawa'i eta nuve'akakaira'i, eta taka'e, wa'i nítujikawaima'i níteka.’

²¹Tichawapa ema makajurure, mametakapa ema mákenu. Taka'e tisemapa ema mákenu, máichawarepa ema makajurure: ‘Tiuri, piyana puíti'ichu te plaza, te calleana, píchu'awaka ena páureana, ena masariana, ena púchukiana, nákani pétupiaruanayare naka'ema'ikeneana'i.’

²²Te tichawapa ema makajurure, mametakapa ema mákenu: ‘Tata, nítauchaipa eta juka piwanairipi'i. Jukaicha'asera eta juka téjasi'akareana.’

²³Taka'e ema mákenu mawanekawarepa ema makajurure: ‘Piyanaware puíti'ichu te isanitiana, píchu'awaka, nákanipa piákapajiruanayarepa'i te achene, pikamesawaka náiteka, apaesa nayuritikawa eta juka téjasi'akareana.

²⁴Nájinawa néniruima'i ena náinapureana'i níchu'akeneana'i te nupena.”

²⁵Kamuriana ena achaneana té'ikana'i ema Jesús. Tási'asera, ema máesenimuri'apa, máichawakapa:

²⁶-Te etiari'ipuka eti ewara'anayare é'ikanu, takamunu epamikawaya yátupina eta é'isiranuya. Nútinapa émunakapanayare, németavikainapa eta émunasirawakaini ena tikachicha'eana, énapa ena eyenana, ena echichanaveanapuka, eparapenaveanapuka. Wáipaware éñamaima'i eta ítaresira.

²⁷Nákani apaesaichu eta nawaraira'i té'ikanuana'i, wa'i taurika'ini eta é'isiranu'i.

²⁸Takutikene te epanerecha'ipuka eti épiyarekaya peti apinapuka piso, wa'i táurika'ini émunanasikawa'ini, epanerechanumayare'i ítauchiraina'i eta ewara'akene'i epiyaka.

²⁹Wa'i akaemuñawaima'i épiyareka eta tiúrina peti, te wa'i árata'aima'i ítaucha. Taka'e ena achaneana kaeka'i'enapa.

³⁰Tási'a, naka'énapapuka: “¡Íma'apa, wá'ira márata'a'ini máitaucha'ini eta jena peti, táurinakeneyare'i! Ichape eta mamelaya.”

³¹Émaipa mákani rey, te mawaraira'i máichayare eta guerra, makanayare'i mákani apana rey kamuripanana'i ena machanerana, mapanerechanumayare'i te marata'ayarepuka makanara, taicha ema wa'i kamurianaina'ini ena machanerana.

³²Eta máimaira'i wa'i márata'ayare'i, wá'iware tíjarakawaima'i máe'akaka'ini. Tási'a, máimiwanerekainapa maye'e ema mánarayare'ini táitawapa eta semanere'i.

³³Ene eka'e'i eti eta ewaraira'i é'ikanu, epanerechanumayare'i eta ínajisirayare tamutu. Taicha te wa'i erata'ayare, wa'i ekukaemuñawa e'ikanu'ini.

³⁴Eta icheve tétavikawa'i táuriwa'i; taicha tikamunukare'i. Étasera eta icheve te tepa'apapa, tépurukarepa.

³⁵Tájinapa takamunukarewaina tikakijinapa. Ene naka'e'i ena tínajikawana eta náe'isiranu'i. Te ewara'apuka ekaikutiara, tawara'a eta epanerechinawaya.