Read Ignaciano Lucas 15 Bible Online

Lucas 15 - Ignaciano bible

Lucas 15

¹Taka'e ema Jesús maimitukawaka'i ena natiari'ekeneana'i, tási'a ena tive'ara'iana eta tawacha eta apake'e taye'e eta roma temeña'awanapa te machakaya ema Jesús, taicha nawara'apa nasamararakayare'i ema.

²Te naima'apa ena fariséuana énapa ena escriwánuana, tepanawanapa napanaururuchapa, naka'epa: — Ema maka achane namutuchucha majakapawaka ena naka'ekeneana, nasapi'apa makachanewaka'i eta nanisira'i ena.

³Te masamapa ema Jesús eta juka, máimikutichinawakapa eta máimitusirawaka'i:

⁴“¿Naja'apuka eti, te ekaye'e'ipuka eta cien uvesana, te témitiakapuka eta étana, manakikaya eta apamuriana noventa y nueve te majanearesi'a'i, tási'a tiyanayarepa matanupana eta apana taemitiaru'i te wama'i?

⁵Te máichimawapa eta táemitiaru'i manakapa te machepa, tichawapa tiúrisamurepaipa.

⁶Títekapapa te mapena, máichu'apa ena machakayapenana májiriareana. Taka'e, máichapa ena: ‘Yare eti apana iúrisamureware nuye'e nuti. Taicha níchimawaipa'i eta uvesa táemitiaru'i.’

⁷Ene taka'e'i eta maúrisamurewa'i ema Viya te anuma, maye'e makaini achane manakika'i eta mapekaturana, naye'e nákani noventa y nueve achaneana tiúritaresirana'i, wa'i nakamunu'ini naeñauchava'ini.

⁸“Taka'e, ¿naja'apukaini esu esena, tikaye'e'i eta diez reale, te témitiyechapuka eta etape, sutanusirayare, suyustakainapa eta sumika'u. Supi'ikainapapuka tamutu te taju'e eta supena sukamesayare'i suichimawa?

⁹Te suíchimawapa. Suíchu'awakainapa ena suchakayapenana suájiriareana. Taka'e, suíchawakainapa: ‘Yare, eti apana iúrisamureware nuye'e nuti, taicha níchimawaipa eta reale nukamitiaru'i’

¹⁰Ene maka'e'i ema Viya, eta máurisamurewaya te namuri ena ángeleana, eta máeñauchirawapa mákani achane kapekaturara'ini, máinajisiraipa'i eta mapekaturanaini.”

¹¹Ema Jesús, ániwarepa maka'e: “Matiari'i ema achane, apinana'i ena machichanaveana,

¹²jena sachekene'i, máichapa ema maiya ema machicha amuyapana: ‘Tata, píjarakanu puiti eta pikaye'ekeneana.’ Taka'e, ema naiya, máijarakawakapa eta máima'akeneana ena apinana machichanaveana.

¹³Taka'e, étaichu'i jena sácheana'i, tétupirikawapa ema amaperu, tiyanapa. Mamapa tamutu eta máijararu'i ema maiya. Tiyanapa te apana awasare. Eta ánaki, máitaiya'i tamutu eta máima'akeneanaini, tamutupa mamapachichijika'i maichapa eta tamaurikeneana.

¹⁴Jena sácheana'i, táitekapauchapa eta eku'a eta awasare mávi'a'i ema amaperu. Ema amaperu títara'aipa'i eta máima'akeneanaini. Tási'a, tájinapa maviya'ini eta manika.

¹⁵Tikakenurekapa maye'e ema achane. Taka'e ema makenu, mawanekapa ema amaperu eta majaneasinaya eta kúchiana.

¹⁶Ichapesera eta máekuawa'i. Majamurachaine'i manika'ini eta taniru eta kúchiana, taicha nájina náitati'ini ema.

¹⁷Tékekawapa eta mapanereruana'i. Émajiwapa tipanerekene'awapa eta mapanereru'i: ‘¡Ena mawanarana ema tata, tiúri'i eta nanisira. Nútisera ani tikapakanuinapa eta nékuawa!

¹⁸Nuchawaya te nupena. Te nítekapapa, níchayare ema: Tátachicha, nukapekaturaipa maye'e ema Viya, etapa eta piye'e piti Tata;

¹⁹tayanainepuka táimikutijirikawa'ini wa'i pichichanuina. Pikatajikanusera. Pijakapanu, nímiekenuchawaine piye'e piti Tata. Nákutine ena piwanarana.’

²⁰Taka'e, tiyanapa tichawa'i te mapena me maiya. “Te tiáne'ipa títekapa ema amaperu, máima'apa ema maiya. Ichapeine'i eta majapanuira'i. Enurujipa tiyana tijunapa mákapa. Majupa'akapa ema machicha. Máetserarekapa eta máurisamurewa'i.

²¹Ema amaperu, maichapa: ‘Tata, nukapekaturapa maye'e ema Viya étapa eta piye'e, tayanainepuka táimikutijirikawainepuka, wa'i pichichanuina.’

²²Wicha'a maitapirika'ini ema amaperu. Ema maiya, mawanekapa ena mawanarana. Máichapa: ‘Etátajirika, íama eta muíriare tiúrinapana. Emuiriacha ema maka nuchicha. Íama eta tiúrinapana surtija; masurutijaina. Iámaware eta tiúrinapana eparupewa, máeparupewaina.

²³Ekapaka eta chikeru tiujepana vinika. ¡Víchayare eta piesta!

²⁴Taicha ema nuchicha tichawa'i Tímikutijirikawa'i eta máepenakenena'ini ema, puítisera tiúchujikapa tichawapa ani nuye'e. Máemitiaru'i, puítisera víchimawaipa'i ema.’ Taka'e, tepanawapa eta piesta.

²⁵“Ema emana machicha máechavi'i, tiyana'i te isaniti. Te tichawapa, te napena, masamapa eta piesta te taju'e.

²⁶Máichu'apa ema émana nakajurure mayaserekapa, tája'a takayema eta juka piesta.

²⁷Ema makajurure maichapa: ‘Ema piparape títekapa'i. Tási'a, ema piya máimikapakapa eta étana chikeru tiújepana. Maichayare'i eta ichape piesta.’

²⁸Taka'e, tisemaine'i ema maechavi waipa máwara'a'ini masiapa'ini. Te máechapa ema naiya, tiúchukapa. Makamesapa makasiapa.

²⁹Emasera tisemaicha'a'i, maichapa: ‘Ánakiapapa eta nítatiravi'i nuti. Tájina nímatiya'ini nákapaemachavi'ini te piwanairipiana. Tási'asera, tájina píjarakanu'ini eta etanaina'ini chíwachichainapukaini eta nunika'ini nukapiestara'ipukaini nuti, nákachane'ini ena nájiriareana.

³⁰Tási'a puiti eta machavira'i ema pichicha, pímikapakaine'i eta chikeru tiújepana, taicha eta máitekapira'i ema émana pichichatataji. Ema máka títa'akawa'i eta píjararuini'i náichavene'i ena esenana tú'usiana.

³¹“Ema maiya majikapapa: ‘Píma'a, nuchichachicha píti ánakiapaipa eta péja'asiranu'i. Tási'a, tamutu eta nukaye'ekeneana'i, piye'eana'iware píti.

³²Táurikaichucha vicha eta piesta eta viúrisamurewaina'i, taicha tímikutijirikawa'i eta máepenakenena'ini ema maka piparape Puítisera tiúchujikaipa, tichawapa ema. Ema máemitiaru'i te vimira'u, puítisera viápechawawarepa víma'a ema.’ ”